Aħna nużaw il-cookies biex niżguraw li nagħtuk l-aħjar esperjenza ta' browsing fis-sit elettroniku tagħna. Sir af aktar dwar kif nużaw il-cookies u kif tista' tbiddel il-konfigurazzjoni tiegħek.

Donald Tusk, President tal-Kunsill Ewropew

Attwalità

Segwi lil Donald Tusk fuq:

Laqgħa bejn l-Asja u l-Ewropa (ASEM), 15-16 ta’ Lulju

Il-President Donald Tusk attenda l-11-il laqgħa Asja-Ewropa (ASEM) f’Ulan Bator, il-Mongolja. Huwa rrappreżenta lill-Unjoni Ewropea, flimkien mal-President tal-Kummissjoni Ewropea, Jean-Claude Juncker, u r-Rappreżentant Għoli Federica Mogherini.

Waqt iċ-ċerimonja tal-ftuħ, il-mexxejja esprimew solidarjetà wara l-eżitu tal-attakk f’Nizza nhar il-Jum Nazzjonali Franċiż. "Illum aħna lkoll, l-Ewropa u l-Asja, ninsabu spalla ma' spalla mal-poplu Franċiż u l-gvern tiegħu. Nikkundannaw din it-traġedja u nkomplu l-ġlieda tagħna kontra l-vjolenza estrema u l-mibegħda", qal il-President Tusk fil-kummenti tiegħu.

Il-mexxejja ddiskutew ukoll is-sitwazzjoni fit-Turkija wara t-tentattiv ta’ kolp ta’ stat militari. “L-UE tappoġġa bis-sħiħ il-gvern elett b'mod demokratiku, l-istituzzjonijiet tal-pajjiż u l-istat tad-dritt. Aħna nappellaw biex jerġa' jkun hemm malajr l-ordni kostituzzjonali fit-Turkija", qal il-President Tusk.

Id-diskussjonijiet fis-summit iffokaw fuq it-tema 20 sena tal-ASEM: sħubija għall-futur permezz tal-konnettività.

Il-mexxejja ddiskutew ukoll kwistjonijiet globali inkluż it-tibdil fil-klima, l-iżvilupp sostenibbli, il-governanza globali, it-terroriżmu u l-migrazzjoni u l-kriżi tar-refuġjati. "Huma neċessarji djalogu u impenn qawwi għall-ordni internazzjonali bbażat fuq ir-regoli. Regoli komuni u prevedibbli jagħmlu l-istati aktar sikuri, nies aktar ħielsa u jħeġġu lill-kumpaniji biex jinvestu b’aktar fiduċja", qal il-President Tusk.

Fil-marġni tas-summit tal-ASEM, il-President Tusk iltaqa’ mal-Prim Ministru ta’ Singapore Lee Hsien Loong biex jiddiskuti t-terroriżmu u l-kooperazzjoni reġjonali. Huwa ltaqa’ wkoll ma’ tal-President tal-Korea t’Isfel Park Geun-hye biex jiddiskuti r-relazzjonijiet bilaterali, il-kummerċ u l-Korea ta’ Fuq.

Il-President Tusk iltaqa’ wkoll mal-Prim Ministru tal-Ġappun Shinzo Abe. Huma kkundannaw l-attakki f’Nizza u Dhaka u tennew l-impenn tagħhom li jaħdmu flimkien fil-ġlieda kontra t-terroriżmu. Dwar ftehim ta’ kummerċ ħieles mal-Ġappun, il-President Tusk reġa' afferma l-impenn tal-UE li tikkonkludi ftehim sal-aħħar tas-ena.

Summit UE-Ċina, 12 -13 ta’ Lulju

It-18-il summit bilaterali bejn iċ-Ċina u l-UE sar f’Beijing fit-12 u t-13 ta’ Lulju. Il-President tal-Kunsill Ewropew Donald Tusk irrappreżenta lill-UE flimkien mal-President tal-Kummissjoni Ewropea Jean-Claude Juncker. Iċ-Ċina kienet irrappreżentata mill-Prim Ministru Li Keqiang.

Waqt is-summit, il-mexxejja ddiskutew l-isfidi komuni, inkluż il-protezzjoni tal-ordni internazzjonali bbażata fuq ir-regoli. "Ordni globali bbażata fuq regoli komuni hija fl-interess reċiproku tagħna, iżda ovvjament hemm differenza bejn x'nifhmu biha aħna fil-prattika," qal il-President Tusk waqt il-konferenza stampa wara s-summit.

Il-mexxejja għamlu progress fis-sħubija strateġika bejn l-UE u ċ-Ċina. Ipprovdew gwida politika għat-tlestija ta' ftehim komprensiv dwar l-investiment u ffirmaw pjan direzzjonali għall-enerġija. Il-mexxejja qablu wkoll li jagħmlu ċiklu ieħor ta’ djalogu dwar id-drittijiet tal-bniedem bejn l-UE u ċ-Ċina din is-sena stess fi Brussell. "M'hemm l-ebda dubju li hemm nuqqas ta’ qbil dwar din il-kwistjoni. Iżda jien nilqa’ l-fatt li ċ-Ċina tinsab lesta li timpenja ruħha," qal il-President Tusk.

Qabel is-summit tal-G20, li ser isir fiċ-Ċina f’Settembru, il-mexxejja qablu li jindirizzaw il-kriżi tal-migrazzjoni fil-livell globali. L-UE tistenna b'interess ukoll li taħdem mill-qrib maċ-Ċina biex jiġu indirizzati l-prijoritajiet tal-politika barranija, inkluż is-Sirja, l-Iraq, l-Afganistan jew l-Afrika. L-istess jgħodd għal kwistjonijiet globali bħall-assistenza għall-iżvilupp jew it-tibdil fil-klima.

Is-summit li jmiss bejn l-UE u ċ-Ċina ser isir is-sena d-dieħla fi Brussell.

Sa mill-1 ta' Diċembru 2014, Donald Tusk qed imexxi l-Kunsill Ewropew - l-istituzzjoni li tistabbilixxi d-direzzjoni u l-prijoritajiet politiċi tal-UE. Huwa responsabbli biex iħejji u jippresiedi l-laqgħat tal-istituzzjoni. Jiżgura wkoll ir-rappreżentanza esterna tal-politika estera u ta' sigurtà komuni tal-UE fil-livell tiegħu.

Il-kontenut jidher bil-lingwa oriġinali jekk it-traduzzjoni ma tkunx disponibbli