Id-Dikjarazzjoni ta' Schuman
Fejn twieldet l-UE
Fid-9 ta' Mejju 1950, twaqqfu s-sisien tal-Unjoni Ewropea kif nafuha b'dikjarazzjoni straordinarja bbażata fuq żewġ prinċipji ewlenin: il-paċi u s-solidarjetà.
L-Ewropa wara l-gwerra
Fl-1950, il-pajjiżi Ewropej kienu qed jirkupraw bil-mod mill-qerda umana u ekonomika kkawżata mit-Tieni Gwerra Dinjija, fid-dell ta' tensjoni dinjija mġedda mqanqla mill-Gwerra Bierda.
Tifel f'nofs il-fdalijiet tal-Knisja ta' San Kasimir f'Varsavja, 1945.
Tifel f'nofs il-fdalijiet tal-Knisja ta' San Kasimir f'Varsavja, 1945.
Grupp ta' politiċi Ewropej, li l-biċċa l-kbira minnhom esperjenzaw il-ħerba taż-żewġ gwerer dinjin, ħaddnu viżjoni ta' Ewropa magħquda li tevita kunflitt futur bejn il-pajjiżi Ewropej. Dawn il-politiċi aktar tard saru magħrufa bħala l-missirijiet fundaturi tal-Unjoni Ewropea.
Il-viżjoni tagħhom kienet li l-pajjiżi Ewropej jiġbru riżorsi strateġiċi flimkien sabiex il-gwerra bejn rivali storiċi, bħal Franza u l-Ġermanja, issir "mhux biss inkonċepibbli, iżda wkoll materjalment impossibbli."
"Il-ġbir flimkien tal-produzzjoni tal-faħam u tal-azzar... se jibdel id-destin ta' dawn ir-reġjuni li ilhom żmien użati għall-manifattura tal-munizzjonijiet tal-gwerra, li tagħhom huma kienu l-aktar vittmi konstanti."
Paċi u solidarjetà
L-unjoni tal-faħam u l-azzar kienet fil-qalba ta' din il-viżjoni ta' Ewropa magħquda. L-industrija tqila bbażata fuq il-faħam u l-azzar qabel kienet il-prerogattiva tal-istati sovrani u kienet kruċjali għall-gwerra.
Konvinti li l-fużjoni tal-interessi ekonomiċi tagħhom tipprevjeni l-kartelli u l-monopolji u tgħolli l-istandards tal-għajxien, il-gvernijiet ta' Franza, il-Ġermanja tal-Punent, l-Italja, in-Netherlands, il-Belġju u l-Lussemburgu ħadu pass storiku lejn Ewropa magħquda.
Minn ġellieda tar-reżistenza sa avukati u parlamentari, il-pijunieri tal-UE kienu grupp varjat ta' nies li kellhom l-istess ideal: Ewropa paċifika, magħquda u għanja.
Il-monument "Hommage aux Pères fondateurs de l'Europe" quddiem id-dar ta' Robert Schuman. L-istatwi jirrappreżentaw l-erba' fundaturi tal-Ewropa: Alcide de Gasperi, Robert Schuman, Jean Monnet u Konrad Adenauer.
Il-monument "Hommage aux Pères fondateurs de l'Europe" quddiem id-dar ta' Robert Schuman. L-istatwi jirrappreżentaw l-erba' fundaturi tal-Ewropa: Alcide de Gasperi, Robert Schuman, Jean Monnet u Konrad Adenauer.
Fid-9 ta' Mejju 1950, f'dik li saret magħrufa bħala d-Dikjarazzjoni ta' Schuman, il-Ministru għall-Affarijiet Barranin Franċiż Robert Schuman ħabbar il-ħolqien ta' Komunità Ewropea tal-Faħam u l-Azzar li tqiegħdet taħt il-kontroll ta' Awtorità Għolja komuni.
"Il-paċi fid-dinja ma tistax tkun garantita mingħajr ma jsiru sforzi kreattivi propozjonali mal-perikli li jhedduha."
Ewropa magħquda
Fl-1951, wara d-Dikjarazzjoni ta' Schuman, it-Trattat li jistabbilixxi l-Komunità Ewropea tal-Faħam u l-Azzar ġie ffirmat fit-18 ta' April, f'Pariġi. Wara r-ratifika mill-Belġju, ir-Repubblika Federali tal-Ġermanja, Franza, l-Italja, il-Lussemburgu u n-Netherlands (l-ewwel Sitta), it-trattat daħal fis-seħħ fit-23 ta' Lulju 1952.
Dan ippreveda l-ħolqien tal-ewwel organizzazzjoni Ewropea supranazzjonali, il-Komunità Ewropea tal-Faħam u l-Azzar. Filwaqt li l-objettiv immedjat ta' dan l-ewwel trattat kien li jistabbilixxi suq komuni għall-faħam u l-azzar, kellu wkoll l-għan li jqiegħed is-sisien ta' komunità ekonomika li gradwalment kienet se ssir unjoni politika.
It-trattat stabbilixxa Awtorità Għolja, Assemblea Komuni, Kunsill Speċjali ta' Ministri u Qorti tal-Ġustizzja, li kellhom isiru l-istituzzjonijiet tal-Unjoni Ewropea tallum: il-Kummissjoni, il-Parlament, il-Kunsill u l-Qorti tal-Ġustizzja.
Il-Konferenza ta' Messina, li għaliha attendew il-ministri għall-affarijiet barranin tas-sitt Stati Membri tal-Komunità Ewropea tal-Faħam u l-Azzar.
Il-Konferenza ta' Messina, li għaliha attendew il-ministri għall-affarijiet barranin tas-sitt Stati Membri tal-Komunità Ewropea tal-Faħam u l-Azzar.
Il-konferenza li saret f'Messina (l-Italja) fl-1 u t-2 ta' Ġunju 1955 żviluppat il-kunċett ta' suq komuni Ewropew.
Sentejn wara, dan il-kunċett ġie inkorporat fit-Trattati ta' Ruma, li ssemmew għall-belt li fiha l-ewwel Sitta ffirmaw it-trattati fil-25 ta' Marzu 1957. Dawn daħlu fis-seħħ fl-1 ta' Jannar 1958.
Iċ-ċerimonja tal-iffirmar tat-trattati fil-Palazzo dei Conservatori fuq l-Għolja Kapitolina f'Ruma.
Iċ-ċerimonja tal-iffirmar tat-trattati fil-Palazzo dei Conservatori fuq l-Għolja Kapitolina f'Ruma.
"Mingħajr l-Ewropa kellna gwerra. L-Ewropa mhux se tinbena f'daqqa, jew skont pjan wieħed. Se tinbena permezz ta' kisbiet konkreti li l-ewwel ma jibnu hi solidarjetà fil-fatt."
Robert Schuman: Missier l-Ewropa
Ir-raġel li stinka għad-Dikjarazzjoni, Robert Schuman, twieled il-Ġermanja iżda sar ċittadin Franċiż fl-1919, wara li Alsace-Lorraine reġgħet saret parti minn Franza.
Meta bdiet it-Tieni Gwerra Dinjija, Schuman kien ministru subaltern fil-gvern Franċiż.
Sar attiv fir-Reżistenza Franċiża matul il-gwerra u ttieħed priġunier. Wara li rnexxielu jeħlisha mid-deportazzjoni lejn il-kamp ta' konċentrament ta' Dachau, huwa nħeba fi Franza għat-tliet snin ta' wara.
Wara l-gwerra, reġa' lura għall-politika nazzjonali u kellu sensiela ta' karigi tal-ogħla livell: l-ewwel bħala ministru għall-finanzi, bħala prim ministru fl-1947, bħala ministru għall-affarijiet barranin mill-1948 sal-1952 u mbagħad bħala ministru għall-ġustizzja mill-1955 sal-1956.
Bħala ministru għall-affarijiet barranin Franċiż huwa ssorvelja t-tħejjija tad-dikjarazzjoni fil-ministeru tiegħu, li ġiet abbozzata minn Paul Reuter, Bernard Clappier, Jean Monnet, Pierre Uri u Etienne Hirsch.
L-isforzi ta' Robert Schuman biex tinħoloq Ewropa magħquda ma waqfux mal-Komunità Ewropea tal-Faħam u l-Azzar.
Fl-1958, sar l-ewwel President tal-predeċessur tal-Parlament Ewropew attwali.
Meta telaq mill-kariga, il-Parlament tah it-titlu ta' "Missier l-Ewropa".
Jum l-Ewropa
Minħabba l-importanza tad-Dikjarazzjoni ta' Schuman tad-9 ta' Mejju 1950, din il-ġurnata ġiet magħżula bħala "Jum l-Ewropa".
F'ġieħ il-ħidma pijuniera tiegħu għal Ewropa magħquda, iż-żona li tospita l-kwartieri ġenerali ta' diversi istituzzjonijiet tal-Unjoni Ewropea fi Brussell hija msemmija għalih.
Ħajr
Belt Ġermaniża, fit-Tieni Gwerra Dinjija: Awtur mhux magħruf
Tifel f'nofs il-fdalijiet tal-Knisja ta' San Kasimir: permezz ta' wikimedia, Awtur mhux magħruf, dominju pubbliku
L-istampi l-oħra: drittijiet tal-awtur Unjoni Ewropea
Aġġornat l-aħħar 24 April 2025
Built with Shorthand