"Bainimid úsáid as fianáin lena chinntiú go bhfeabhsaítear d’eispéireas brabhsála. Tá gá le fianáin riachtanacha chun tacú le gnéithe bunriachtanacha de shuíomh gréasáin na Comhairle. Cuidíonn na fianáin roghnacha linn tuarascálacha staidrimh anaithnide, comhiomlánaithe a tháirgeadh chun freastal níos fearr ar do chuid riachtanas.

Féach ár leathanach beartais maidir le fianáin chun tuilleadh eolais a fháil agus chun do shocruithe a athrú.

български español čeština dansk Deutsch eesti Ελληνικά English français Gaeilge hrvatski italiano latviešu lietuvių magyar Malti Nederlands polski português română slovenčina slovenščina suomi svenska
Skip to content

An tromlach cáilithe

Is é an vótáil trí thromlach cáilithe, bunaithe ar riail an tromlaigh dhúbailte, an modh vótála is mó a úsáidtear i gComhairle an Aontais Eorpaigh chun reachtaíocht an Aontais a ghlacadh.

An modh vótála is mó a úsáidtear sa Chomhairle

Is é an tromlach cáilithe an córas vótála is mó a úsáidtear sa Chomhairle, agus glactar thart ar 80 % de reachtaíocht uile an Aontais tríd an gcóras sin.

Is amhlaidh atá toisc go mbíonn feidhm ag an tromlach cáilithe nuair a dhéanann an Chomhairle cinntí faoin ngnáthnós imeachta reachtach, arb é sin an príomhphróiseas cinnteoireachta chun dlíthe an Aontais a ghlacadh.

Nuair a bhainfidh an Chomhairle an tromlach cáilithe amach, glacfar gníomh reachtach de chuid an Aontais.

Cathain a bhaintear an tromlach cáilithe amach?

Ní mór dhá choinníoll a chomhlíonadh ag an am céanna chun an tromlach cáilithe a bhaint amach:

  • vótálfaidh 55 %, ar a laghad, de na Ballstáit i bhfabhar an togra (15 as 27)
  • arb ionann daonra na mBallstát sin agus 65 %, ar a laghad, de dhaonra iomlán an Aontais

Riail an tromlaigh dhúbailte a thugtar freisin ar an nós imeachta seo.

An mionlach blocála

Ní mór ceithre Bhallstát, ar a laghad, a bheith i gceist. Dá uireasa sin, measfar an tromlach cáilithe a bheith bainte amach ann.

Mar shampla, má vótálann gach Ballstát seachas trí cinn i bhfabhar píosa reachtaíochta a ghlacadh, meastar go mbaintear amach an tromlach cáilithe fiú más lú daonra an 24 Bhallstát a vótálfaidh i bhfabhar ná 65 % de dhaonra iomlán an Aontais.

Is ionann sin agus a rá, nuair a vótálfaidh níos lú ná ceithre Bhallstát ina choinne, ní bhainfidh critéar an daonra le hábhar chun an tromlach cáilithe sin a chinneadh.

An staonadh

Is ionann staonadh faoi vótáil trí thromlach cáilithe agus vótáil ina choinne, rud a chuirfidh leis an mionlach (blocála).

Ní hionann staonadh agus gan a bheith rannpháirteach sa vótáil. Is féidir le comhalta ar bith staonadh tráth ar bith.

An tromlach cáilithe treisithe

Beidh feidhm ag an tromlach cáilithe treisithe nuair a vótálfaidh an Chomhairle ar thogra nach dtíolacann an Coimisiún Eorpach ná Ardionadaí an Aontais Eorpaigh.

Ní mór dhá choinníoll a chomhlíonadh ag an am céanna chun an tromlach cáilithe treisithe a bhaint amach:

  • vótálfaidh 72 % de na Ballstáit, ar a laghad, i bhfabhar an togra (20 as 27, ar a laghad)
  • arb ionann daonra na mBallstát sin agus 65 %, ar a laghad, de dhaonra an Aontais

Cásanna speisialta

Beidh rialacha sonracha vótála infheidhme i gcásanna nach nglacfaidh na Ballstáit uile páirt sa vótáil, mar shampla mar gheall ar rogha an diúltaithe i réimsí beartais áirithe (e.g. euro, Schengen). Braitheann na rialacha sin ar chineál an togra.

Más togra ón gCoimisiún nó ón Ardionadaí é, is trí thromlach cáilithe a dhéantar an cinneadh má vótálfaidh 55 % de na Ballstáit rannpháirteacha i bhfabhar an togra, arb ionann é agus 65 %, ar a laghad, de dhaonra na mBallstát rannpháirteach. Sa chás sin, ní mór, ar a laghad, an t-íoslíon Ballstát, arbh mó iad ná 35 % de dhaonra an Aontais, chomh maith le Ballstát amháin eile, a bheith sa mhionlach blocála sin.

Mura togra ón gCoimisiún nó ón Ardionadaí é, is trí thromlach cáilithe treisithe a dhéantar an cinneadh má vótálfaidh 72 % de na Ballstáit rannpháirteacha i bhfabhar an togra, arb ionann é agus 65 %, ar a laghad, de dhaonra na mBallstát rannpháirteach.

Áireamhán vótála

Cuidíonn an t-áireamhán vótála lena fháil amach an féidir leis an gComhairle ceann de na trí thairseach vótála is gá a bhaint amach chun gníomh reachtach a ghlacadh.

Lean na ceithre chéim shimplí seo chun an toradh ar an vótáil a sheiceáil:

  • roghnaigh an riail vótála
  • roghnaigh na Ballstáit atá rannpháirteach sa vótáil
  • cuir isteach na vótaí
  • fíoraigh an toradh
Áireamhán in aice le saighead laistigh de chiorcal.

Féach freisin

Cártaí á gcur i mbosca ballóide ar a bhfuil suaitheantas an Aontais Eorpaigh.

Cén dóigh a vótálann an Chomhairle?

Na hairí ag teacht le chéile dóibh sa Chomhairle.

Cruinnithe na Comhairle – a bhfuil i gceist

Foirgnimh Chomhairle an Aontais Eorpaigh, Pharlaimint na hEorpa agus an Choimisiúin Eorpaigh, agus saigheada á nascadh.

Ról na Comhairle i gcinnteoireacht an Aontais

An t-athbhreithniú deireanach: an 23 Feabhra 2026