Maġġoranza kwalifikata

L-aktar metodu ta' votazzjoni użat fil-Kunsill

Il-maġġoranza kwalifikata hija s-sistema ta' votazzjoni l-aktar użata fil-Kunsill, b'madwar 80% tal-leġiżlazzjoni kollha tal-UE adottata permezz tagħha.

Dan għaliex maġġoranza kwalifikata tapplika meta l-Kunsill jieħu deċiżjonijiet skont il-proċedura leġiżlattiva ordinarja, li hija l-proċess primarju tat-teħid ta' deċiżjonijiet għall-adozzjoni tal-liġijiet tal-UE.

Meta l-Kunsill jilħaq maġġoranza kwalifikata, att leġiżlattiv tal-UE jiġi adottat.

Meta tintlaħaq il-maġġoranza kwalifikata?

Il-maġġoranza kwalifikata tinkiseb jekk jiġu ssodisfati żewġ kundizzjonijiet fl-istess ħin:

• tal-inqas 55% tal-istati membri jivvutaw favur (15 minn 27)
• dawk l-istati membri jirrappreżentaw tal-inqas 65% tal-popolazzjoni totali tal-UE

Din il-proċedura hija magħrufa wkoll bħala r-"regola tal-maġġoranza doppja".

Minoranza li timblokka

Il-minoranza li timblokka trid tinkludi mill-inqas erba' stati membri. Jekk ikun hemm inqas minn erba' pajjiżi li jivvutaw kontra, il-maġġoranza kwalifikata titqies li ntlaħqet.

Pereżempju, jekk l-istati membri kollha ħlief tlieta jivvutaw favur l-adozzjoni ta' att leġiżlattiv, il-maġġoranza kwalifikata titqies li ntlaħqet anke jekk l-24 stat membru li jivvutaw favur jirrappreżentaw inqas minn 65% tal-popolazzjoni totali tal-UE.

Fi kliem ieħor, meta jkun hemm inqas minn erba' membri tal-Kunsill li jivvutaw kontra, il-kriterju tal-popolazzjoni jsir irrilevanti għad-determinazzjoni tal-maġġoranza kwalifikata.

Astensjoni

Astensjoni f'votazzjoni b'maġġoranza kwalifikata tgħodd bħala vot kontra, u għalhekk tikkontribwixxi għall-minoranza (li timblokka).

Astensjoni mhix l-istess bħal nonparteċipazzjoni fil-votazzjoni. Kull membru jista' jastjeni fi kwalunkwe ħin.

Maġġoranza kwalifikata msaħħa

Is-sistema ta' maġġoranza kwalifikata msaħħa tapplika meta l-Kunsill jivvota fuq proposta li ma tiġix ippreżentata mill-Kummissjoni Ewropea jew mir-Rappreżentant Għoli tal-Unjoni Ewropea.

Il-maġġoranza kwalifikata msaħħa tinkiseb jekk jiġu ssodisfati żewġ kundizzjonijiet fl-istess ħin:

• tal-inqas 72% tal-istati membri jivvutaw favur (mill-inqas 20 minn 27)
• l-istati membri li jappoġġaw il-proposta jirrappreżentaw mill-inqas 65% tal-popolazzjoni tal-UE

Każijiet speċjali

F'każijiet meta mhux l-istati membri kollha jipparteċipaw fil-votazzjoni, pereżempju minħabba nonparteċipazzjoni f'ċerti oqsma ta' politika (pereżempju l-euro u Schengen), japplikaw regoli speċifiċi tal-votazzjoni.Dawn ir-regoli jiddependu fuq in-natura tal-proposta.

Jekk il-proposta tiġi mill-Kummissjoni jew mir-Rappreżentant Għoli, deċiżjoni tintlaħaq b'maġġoranza kwalifikata jekk 55% tal-istati membri parteċipanti, li jirrappreżentaw mill-inqas 65% tal-popolazzjoni tal-istati membri parteċipanti, jivvutaw favur. F'dan il-każ, minoranza li timblokka trid tinkludi mill-inqas l-għadd minimu ta' stati membri li jirrappreżentaw aktar minn 35% tal-popolazzjoni tal-UE, flimkien ma' stat membru ieħor.

Jekk il-proposta ma tiġix mill-Kummissjoni jew mir-Rappreżentant Għoli, deċiżjoni b'maġġoranza kwalifikata msaħħa tiġi adottata jekk 72% tal-istati membri parteċipanti, li jirrappreżentaw mill-inqas 65% tal-popolazzjoni tal-istati membri parteċipanti, jivvutaw favur.

Ara wkoll