Uachtaránacht Chomhairle an Aontais Eorpaigh

A ndéanann an uachtaránacht

Tá uachtaránacht na Comhairle freagrach as obair na Comhairle i dtaca le reachtaíocht an Aontais a fhorbairt; cinntíonn sí leanúnachas chlár oibre an Aontais, próisis reachtacha ordúla agus comhar i measc na mBallstát.

Is ríthábhachtach an ról atá aici do chobhsaíocht an Aontais agus d’fheidhmiú a fheidhmeanna reachtacha.

Na cúig phríomhchúram

Ar phríomhchúraimí na huachtaránachta tá: cruinnithe a phleanáil, a chomhordú agus cathaoirleacht a dhéanamh orthu, ionadaíocht a dhéanamh thar ceann na Comhairle, caibidlíocht a dhéanamh le hinstitiúidí eile an Aontais, cumarsáid a dhéanamh i dtaca lena cuid gníomhaíochtaí agus bróicéireacht mhacánta a dhéanamh chun teacht ar chomhaontuithe sa Chomhairle.

Cruinnithe a phleanáil, a chomhordú agus cathaoirleacht a dhéanamh orthu

Déanann an uachtaránacht na cruinnithe a thionólann an Chomhairle (cé is moite den Chomhairle Gnóthaí Eachtracha) agus formhór chomhlachtaí ullmhúcháin na Comhairle a phleanáil agus a chomhordú, agus déanann sí cathaoirleacht orthu freisin.

An bróicéir macánta

Is bróicéir macánta sa phlé í an uachtaránacht, agus molann sí comhréitigh d’fhonn teacht ar chomhaontú sa Chomhairle.

Ionadaíocht a dhéanamh thar ceann na Comhairle

Déanann an uachtaránacht ionadaíocht thar ceann na Comhairle agus í i mbun gnóthaíochta le Parlaimint na hEorpa, leis an gCoimisiún Eorpach agus le hinstitiúidí eile an Aontais.

Caibidlíocht a dhéanamh le hinstitiúidí eile an Aontais

Déanann sí caibidlíocht thar ceann na Comhairle chun teacht ar chomhaontú le hinstitiúidí eile an Aontais i dtaca le comhaid reachtacha.

Cumarsáid a dhéanamh maidir lena cuid gníomhaíochtaí

Cuireann an uachtaránacht le heolas agus le feasacht an phobail faoi ghníomhaíochtaí na Comhairle, mar shampla trí sheisiúin faisnéise don phreas a ullmhú.

Is dual don uachtaránacht a bheith neodrach. Is bróicéir macánta ról na huachtaránachta. Ní ceadmhach don tír ag a bhfuil an uachtaránacht fabhar a bheith aici dá tosaíochtaí féin ná do thosaíochtaí Ballstáit ar leith.

Ós rud é go bhfuil 27 mBallstát ann agus go mbíonn an uachtaránacht ar a sheal féin ag gach Ballstát, beidh uachtaránacht na Comhairle ag Ballstát, bíodh sé mór nó beag, uair amháin gach 13.5 bliain.

Oibríonn an uachtaránacht i ndlúthchomhar le:

• Uachtarán na Comhairle Eorpaí
• Ardionadaí an Aontais do Ghnóthaí Eachtracha agus don Bheartas Slándála

Tacaíonn an uachtaránacht leo ina gcuid oibre agus d’fhéadfadh sé go n-iarrfaí uirthi ó am go ham dualgais áirithe a dhéanamh thar ceann an Ardionadaí, mar shampla ionadaíocht a dhéanamh thar ceann na Comhairle Gnóthaí Eachtracha i bParlaimint na hEorpa, nó cathaoirleacht a dhéanamh ar an gComhairle Gnóthaí Eachtracha nuair a phléann sí saincheisteanna an chomhbheartais tráchtála.

Uachtaránacht rothlach

Bíonn uachtaránacht na Comhairle ar a sheal féin ag gach Ballstát ar feadh 6 mhí. Is le cinneadh ón gComhairle a shocraítear an t-ord ina mbíonn an uachtaránacht ag gach Ballstát.

I rith na 6 mhí sin, beidh an uachtaránacht ina cathaoirleach ar chruinnithe ar gach leibhéal sa Chomhairle, ag cabhrú le leanúnachas na hoibre reachtaí a chinntiú.

• Liosta d’uachtaránachtaí Chomhairle an Aontais Eorpaigh

Cé aige a bheidh an chéad uachtaránacht eile?

An fhoireann trí Uachtaránacht

Bíonn na grúpaí de thrí Bhallstát ag a bhfuil uachtaránachtaí comhleanúnacha ag obair i ndlúthchomhar.

Is le Conradh Liospóin in 2009 a tugadh isteach an córas trí Uachtaránacht. Leagann an fhoireann trí Uachtaránacht spriocanna fadtéarmacha amach agus ullmhaíonn sí clár oibre comhpháirteach lena gcinntear na hábhair agus na príomh-shaincheisteanna a dtabharfaidh an Chomhairle aghaidh orthu thar thréimhse 18 mí.

Ar bhonn an chláir trí Uachtaránacht sin, ullmhóidh gach ceann de na trí thír clár 6 mhí, ar clár níos mionsonraithe é.

Is iad an fhoireann trí Uachtaránacht reatha:

• Éire
• an Liotuáin
• an Ghréig

• Clár na dtrí Uachtaránacht - Éire, an Liotuáin agus an Ghréig

Féach freisin

• Ord agus eagar ar obair na Comhairle