Cén dóigh a vótálann an Chomhairle?

An tromlach cáilithe

Baineann an tromlach cáilithe seo le tuairim is 80 % den obair reachtach a dhéanann an Chomhairle ina nglactar reachtaíocht i gcomhar le Parlaimint na hEorpa.

Tá an córas vótála sin bunaithe ar thromlach na mBallstát a dhéanann ionadaíocht ar thromlach dhaonra an Aontais. Tugtar riail an ‘tromlaigh dhúbailte’ air sin, ós rud é nach mór dhá choinníoll a chomhlíonadh ag an am céanna:

• vótálfaidh 55 %, ar a laghad, de na Ballstáit i bhfabhar an togra (15 as 27)
• arb ionann daonra na mBallstát sin agus 65 %, ar a laghad, de dhaonra iomlán an Aontais

• An tromlach cáilithe

An aontoilíocht

Beidh ar an gComhairle vótáil d'aon toil maidir le hábhair éagsúla a mheasfaidh na Ballstáit a bheith íogair. Sna cásanna sin, beidh ceart crosta ag gach Ballstát. Faoin gcóras vótála seo, ní dhéanfar, le staonadh, cosc a chur ar chinneadh a dhéanamh.

Beidh feidhm ag an aontoilíocht, mar shampla, maidir leis an méid seo:

• an comhbheartas eachtrach agus slándála
• cearta nua a dheonú do shaoránaigh an Aontais
• méadú an Aontais
• airgeadas an Aontais (acmhainní dílse agus buiséad fadtéarmach an Aontais)
• cánachas indíreach a chomhchuibhiú
• bearta áirithe i réimsí an cheartais agus na ngnóthaí baile, agus i réimse na cosanta sóisialta

Cén chaoi a n-oibríonn sé?

Is gníomh polaitiúil agus dlíthiúil é vóta a chaitheamh agus, dá bhrí sin, is iad na hairí a dhéanann ionadaíocht ar an mBallstát faoi seach, agus iadsan amháin, a chaithfidh vóta sa Chomhairle.

Ní vótálfaidh Coreper (coiste na mbuanionadaithe) ar ghníomhartha dlí, ach féadfaidh na buanionadaithe a chur in iúl roimh ré cén dóigh a vótálfaidh a n-aire féin sa Chomhairle. Cuidíonn an ‘vóta táscach’ seo le huachtaránacht na Comhairle a mheas an bhfuiltear réidh le cinneadh a ghlacadh. Ní chaithfidh na meithleacha vóta.

Ní ceadmhach don Chomhairle vótáil ach amháin má tá formhór na gcomhaltaí i láthair. Ní fhéadfaidh comhalta den Chomhairle (ionadaí Ballstáit ar leibhéal aireachta) gníomhú ach thar ceann comhalta amháin eile.

Is é uachtarán na Comhairle, is é sin an tír ag a bhfuil an uachtaránacht rothlach, a chuirfidh tús leis an vótáil. Cé go bhféadfaidh comhalta den Chomhairle nó den Choimisiún vóta a thionscnamh, ní mór do thromlach de chomhaltaí na Comhairle an tionscnamh sin a fhormheas.

Torthaí na vótála a fhoilsiú

Cuirtear torthaí vótáil na Comhairle ar fáil don phobal go huathoibríoch nuair a ghníomhaíonn an Chomhairle chun dlíthe an Aontais a ghlacadh.

Foilsítear an chaoi ar vótáil gach Ballstát, mar aon le cur síos ar an vótáil, ar na ráitis agus ar na míreanna a thaifeadtar sna miontuairiscí, i gclár poiblí na Comhairle.

• Torthaí na vótála poiblí

Féach freisin