Buiséad an Aontais do 2024: a seasamh comhaontaithe ag an gComhairle maidir leis an dréachtbhuiséad

Tháinig ambasadóirí na mBallstát chuig an Aontas (Coreper) ar chomhaontú faoin seasamh ón gComhairle maidir le dréachtbhuiséad an Aontais do 2024. San iomlán, tá luach €187.008 billiún de ghealltanais agus luach €141.167 billiún d’íocaíochtaí sa seasamh ón gComhairle do bhuiséad na bliana seo chugainn.

Ar an iomlán, tá cur chuige stuama glactha ag an gComhairle. Cuireann an Chomhairle i bhfios go láidir a thábhachtaí atá sé go léireofar i gcónaí dlúthpháirtíocht an Aontais le muintir na hÚcráine sa bhuiséad do 2024 agus go bhfreagrófar ar ghéarchéimeanna ann. Meabhraítear don Chomhairle prionsabal na dlúthpháirtíochta agus cuireann sí i dtreis go gcuideofar, trí leas a bhaint as buiséad an Aontais ar bhealach éifeachtach, le borradh a chur faoi iontaoibh mhuintir na hEorpa as an Aontas. Iarrann an Chomhairle freisin go gcuirfí bearta coiteanna i bhfeidhm chun srian a chur leis an gcaiteachas riaracháin atá ag méadú thar a raibh beartaithe ar dtús de thoradh ar bhoilsciú ard agus praghsanna arda fuinnimh.

Leagtar amach achoimre ar sheasamh na Comhairle i dtábla ina soláthraítear an miondealú de réir ceannteidil le haghaidh ‘caiteachas iomlán’ i gceannteideal CAI:

• Seasamh ón gComhairle maidir le dréachtbhuiséad an Aontais 2024 — tábla iomlán (pdf)
• Seasamh ón gComhairle maidir le dréachtbhuiséad an Aontais 2024 — tábla iomlán (Excel)

Is éard atá i ngealltanais, gealltanais dhlíthiúla chun airgead a chaitheamh ar ghníomhaíochtaí a chuirtear chun feidhme i gcaitheamh roinnt blianta airgeadais.

Cumhdaítear le híocaíochtaí caiteachas a eascraíonn as gealltanais arna gcur isteach i mbuiséad an Aontais le linn blianta reatha airgeadais agus blianta airgeadais roimhe sin.

Ina theannta sin, eisíonn an Chomhairle dhá ráiteas maidir leis an méid seo a leanas:

• íocaíochtaí in 2024
• caiteachas riaracháin

Na chéad chéimeanna eile

Tá sé d’aidhm ag an gComhairle a seasamh ar an dréachtbhuiséad ginearálta do 2024 a ghlacadh go foirmiúil trí nós imeachta i scríbhinn dar críoch an 5 Meán Fómhair 2023. Beidh sin ina shainordú d’Uachtaránacht na Spáinne buiséad an Aontais do 2024 a chaibidil le Parlaimint na hEorpa.

Cúlra

Is é seo an ceathrú buiséad bliantúil faoi bhuiséad fadtéarmach an Aontais, an creat airgeadais ilbhliantúil (CAI) do 2021-2027. Comhlánaítear buiséad 2024 le gníomhaíochtaí chun tacú le téarnamh COVID-19 faoi Next Generation EU, plean téarnaimh paindéime an Aontais.

• Seasamh ón gComhairle maidir le buiséad an Aontais do 2024
• Ráitis a ghabhann leis an seasamh ón gComhairle
• Iarscríbhinn theicniúil
• Buiséad 2024: an Chomhairle tagtha ar chomhaontú maidir lena treoirlínte chun buiséad an Aontais don bhliain seo chugainn a bhunú (preaseisiúint an 14 Márta 2023)
• Conclúidí ón gComhairle Eorpach an 17-21 Iúil 2020 (preaseisiúint)
• Buiséad an Aontais do 2024 (eolas cúlra)