Il-baġit tal-UE għall-2024: Il-Kunsill jilħaq qbil dwar il-pożizzjoni tiegħu dwar l-abbozz tal-baġit

Illum, l-ambaxxaturi tal-istati membri għall-UE (Coreper) qablu dwar il-pożizzjoni tal-Kunsill dwar l-abbozz tal-baġit tal-UE għall-2024. B'kollox, il-pożizzjoni tal-Kunsill għall-baġit tas-sena d-dieħla tammonta għal €187.008 biljun f'impenji u €141.167 biljun f'pagamenti.

B'mod ġenerali, il-Kunsill jieħu approċċ prudenti. Il-Kunsill jenfasizza l-importanza li l-baġit għall-2024 ikompli juri s-solidarjetà tal-Unjoni mal-poplu tal-Ukrajna u jwieġeb għall-kriżijiet. Il-Kunsill ifakkar fil-prinċipju ta' solidarjetà u jissottolinja li l-użu effikaċi tal-baġit tal-UE ser isaħħaħ il-kredibbiltà tal-UE maċ-ċittadini Ewropej. Il-Kunsill jappella wkoll għal miżuri komuni biex tiġi kkontrollata n-nefqa amministrattiva li laħqet livell ogħla minn dak li kien ippjanat inizjalment minħabba l-inflazzjoni u l-prezzijiet tal-enerġija għoljin.

Sommarju tal-pożizzjoni tal-Kunsill jinsab f'tabella li tipprovdi t-tqassim skont l-intestatura tan-"nefqa totali" fl-intestaturi tal-QFP:

• o Pożizzjoni tal-Kunsill dwar l-abbozz ta' baġit tal-UE għall-2024 - tabella sħiħa (pdf)
• o Pożizzjoni tal-Kunsill dwar l-abbozz ta' baġit tal-UE għall-2024 - tabella sħiħa (Excel)

Impenji huma wegħdiet legali li jintefqu flus fuq attivitajiet li l-implimentazzjoni tagħhom testendi fuq perjodu ta' diversi snin finanzjarji.

Pagamenti jkopru n-nefqa li tirriżulta minn impenji mdaħħla fil-baġit tal-UE fis-sena finanzjarja attwali u s-snin preċedenti.

Barra minn hekk, il-Kunsill joħroġ ukoll żewġ dikjarazzjonijiet dwar:

• pagamenti fl-2024
• nefqa amministrattiva

Il-passi li jmiss

Il-Kunsill għandu l-għan li jadotta formalment il-pożizzjoni tiegħu dwar l-abbozz tal-baġit ġenerali għall-2024 permezz ta' proċedura bil-miktub li tintemm fil-5 ta' Settembru 2023. Din ser isservi bħala mandat għall-presidenza Spanjola biex tinnegozja l-baġit tal-UE għall-2024 mal-Parlament Ewropew.

Kuntest

Dan huwa r-raba' baġit annwali li hu parti mill-baġit fit-tul tal-UE, il-qafas finanzjarju pluriennali (QFP) għall-perjodu 2021-2027. Il-baġit għall-2024 huwa kkomplementat minn azzjonijiet li jappoġġaw l-irkupru mill-COVID-19 skont in-Next Generation EU, il-pjan tal-UE għall-irkupru mill-pandemija.

• Il-pożizzjoni tal-Kunsill dwar il-baġit tal-UE għall-2024
• Dikjarazzjonijiet li jakkumpanjaw il-pożizzjoni tal-Kunsill
• Anness tekniku
• Baġit 2024: il-Kunsill jaqbel dwar il-linji gwida tiegħu għall-istabbiliment tal-baġit tal-UE għas-sena d-dieħla (stqarrija għall-istampa, 14 ta' Marzu 2023)
• Konklużjonijiet tal-Kunsill Ewropew, 17-21 ta' Lulju 2020 (stqarrija għall-istampa)
• Baġit tal-UE għall-2024 (informazzjoni ġenerali)