Kif jivvota l-Kunsill?
Tliet sistemi ta' votazzjoni
Il-Kunsill tal-Unjoni Ewropea jeżerċita l-funzjonijiet tiegħu bl-użu ta' tliet sistemi ta' votazzjoni distinti.
Maġġoranza kwalifikata
Din hija s-sistema ta' votazzjoni awtomatika, li permezz tagħha d-deċiżjonijiet jittieħdu bl-użu tar-regola ta' "maġġoranza doppja".
Unanimità
Din tapplika għal għadd limitat ta' oqsma sensittivi, li fihom kull stat membru għandu veto.
Maġġoranza sempliċi
Din tapplika prinċipalment għal deċiżjonijiet ta' proċedura.
L-ispeċifiċitajiet dwar kif joperaw dawn ir-regoli tal-votazzjoni huma stabbiliti fl-Artikolu 238 tat-Trattat dwar il-Funzjonament tal-Unjoni Ewropea.
Maġġoranza kwalifikata
Il-Kunsill jiddeċiedi b'maġġoranza kwalifikata għal madwar 80% tal-ħidma leġiżlattiva tiegħu, fejn il-leġiżlazzjoni tiġi adottata b'mod konġunt mal-Parlament Ewropew.
Din is-sistema ta' votazzjoni hija bbażata fuq maġġoranza ta' stati membri li jirrappreżentaw maġġoranza tal-popolazzjoni tal-UE. Din hija magħrufa bħala r-regola tal-"maġġoranza doppja", peress li jridu jiġu sodisfatti żewġ kundizzjonijiet fl-istess ħin:
- tal-inqas 55% tal-istati membri jivvutaw favur (15 minn 27)
- dawk l-istati membri jirrappreżentaw tal-inqas 65% tal-popolazzjoni totali tal-UE
Unanimità
Il-Kunsill irid jivvota b'mod unanimu dwar għadd ta' kwistjonijiet li l-istati membri jqisu li huma sensittivi. F'dawn il-każijiet, kull stat membru għandu dritt għal veto. Fil-votazzjoni unanima, l-astensjoni ma twaqqafx deċiżjoni milli tittieħed.
L-unanimità tapplika, pereżempju, għal:
- il-politika estera u ta' sigurtà komuni
- l-għoti ta' drittijiet ġodda liċ-ċittadini tal-UE
- it-tkabbir tal-UE
- il-finanzi tal-UE (ir-riżorsi proprji u l-baġit fit-tul tal-UE)
- l-armonizzazzjoni tat-tassazzjoni indiretta
- ċerti miżuri fil-qasam tal-ġustizzja u l-affarijiet interni u l-protezzjoni soċjali
Maġġoranza sempliċi
Tintlaħaq maġġoranza sempliċi jekk tal-inqas 14 mis-27 stat membru jivvutaw favur.
Il-Kunsill jiddeċiedi b'maġġoranza sempliċi:
- dwar kwistjonijiet ta' proċedura, bħall-adozzjoni tar-regoli ta' proċedura tiegħu u l-organizzazzjoni tas-Segretarjat Ġenerali tiegħu
- biex jitlob lill-Kummissjoni twettaq studji jew tressaq proposti
Kalkulatur tal-votazzjoni
Il-kalkulatur tal-votazzjoni jgħin biex issir taf jekk il-Kunsill jistax jilħaq wieħed mit-tliet limiti tal-votazzjoni meħtieġa biex jadotta att leġiżlattiv.
Segwi dawn l-erba' passi sempliċi biex tivverifika r-riżultat finali ta' vot tal-Kunsill:
- agħżel regola ta' votazzjoni
- agħżel l-istati membri li qed jieħdu sehem fil-vot
- daħħal il-voti
- ivverifika r-riżultat finali
Kif taħdem il-votazzjoni?
Il-votazzjoni hija att politiku u legali u għalhekk issir biss mill-ministri li jirrappreżentaw l-istati membri rispettivi tagħhom fil-Kunsill.
Il-Coreper (il-kumitat tar-rappreżentanti permanenti) ma jivvutax dwar atti legali, iżda r-rappreżentanti permanenti jistgħu jindikaw minn qabel kif il-ministri tagħhom biħsiebhom jivvutaw fil-Kunsill. Il-"vot indikattiv" jgħin lill-presidenza tal-Kunsill tivvaluta jekk deċiżjoni tkunx lesta għall-adozzjoni. Il-gruppi ta' ħidma ma jivvutawx.
Il-Kunsill jista' jivvota biss jekk tkun preżenti maġġoranza tal-membri tiegħu. Membru tal-Kunsill (rappreżentant ta' stat membru fil-livell ministerjali) jista' jaġixxi f'isem membru wieħed ieħor biss.
Il-votazzjoni tinbeda mill-president tal-Kunsill, jiġifieri l-pajjiż li jkollu l-presidenza b'rotazzjoni. Membru tal-Kunsill jew tal-Kummissjoni jista' wkoll jipproponi li jinbeda vot, iżda maġġoranza tal-membri tal-Kunsill trid tapprova din l-inizjattiva.
Pubblikazzjoni tar-riżultati tal-votazzjoni
Ir-riżultati tal-voti tal-Kunsill awtomatikament isiru pubbliċi meta l-Kunsill jaġixxi biex jadotta liġijiet tal-UE.
Il-mod kif ivvota kull stat membru, flimkien mal-ispjegazzjonijiet tal-voti, id-dikjarazzjonijiet, u l-punti rreġistrati fil-minuti, jiġu ppubblikati fir-reġistru pubbliku tal-Kunsill.
Ara wkoll
L-aħħar reviżjoni: 23 ta' Frar 2026