Traineeships Consilium
Darbtejn fis-sena, il-Kunsill joffri traineeships imħallsa ta' ħames xhur fi Brussell. Għaliex ma tapplikax u tikseb għarfien siewi dwar il-ħidma tal-Unjoni Ewropea?
Il-programm ta' traineeships tagħna
Il-programm ta' traineeship Consilium jippermetti lill-gradwati minn sfondi differenti jiksbu esperjenza diretta fit-tfassil tal-politika tal-UE.
Aħna noffru traineeships f'oqsma differenti, bħall-politika, il-liġi, l-amministrazzjoni, il-komunikazzjonijiet, it-traduzzjoni u l-IT.
110 pożizzjonijiet ta' traineeship huma disponibbli kull sena.
L-applikazzjonijiet issa huma miftuħa!
Tista' tapplika għal traineeship Consilium sal-15 ta' Settembru 2026, f'12:00 (ħin ta' Brussell).
It-traineeships ser ikunu mill-1 ta' Frar sat-30 ta' Ġunju 2027.
Kif tapplika għal traineeship
Min jista' japplika?
It-traineeships Consilium miftuħin għal kulħadd, soġġetti għal ċerti kriterji ta' eliġibbiltà.
Ċittadinanza tal-UE
Lawrja ta' Baċellerat jew ogħla
Għarfien tajjeb ħafna tal-Ingliż jew tal-Franċiż u ta' mill-inqas lingwa oħra tal-UE
L-ebda esperjenza ta' xogħol preċedenti f'istituzzjoni oħra tal-UE
X'noffru
Il-programm ta' traineeship tagħna jagħti lill-professjonisti żgħażagħ l-opportunità li jiksbu għarfien dwar il-ħidma tal-UE, ikunu involuti fl-attivitajiet ta' kuljum tal-Kunsill, jitgħallmu mill-kollegi u l-konsulenti tagħhom u jikkontribwixxu għat-tfassil ta' deċiżjonijiet importanti.
It-traineeships huma bi ħlas u jinkludu allowances u benefiċċji oħra.
Programm ta' azzjoni pożittiva għal trainees b'diżabilità
Kull sena, nirriżervaw sa sitt traineeships għal ċittadini tal-UE b'diżabilità rikonoxxuta.
Il-programm tagħna joffrilhom għarfien uniku dwar il-politika u t-tfassil tal-liġijiet tal-UE, filwaqt li jipprovdilhom arranġamenti speċjali fuq il-post tax-xogħol, kif meħtieġ.
Traineeships għal studenti minn skejjel nazzjonali tal-amministrazzjoni
Minbarra l-programm ta' traineeship ġenerali tagħna, noffru wkoll lill-istudenti fi skejjel nazzjonali tal-amministrazzjoni għarfien uniku dwar il-proċessi u l-politika tal-istituzzjonijiet tal-UE. Dawn it-traineeships idumu bejn xahrejn u ħames xhur.
Kalendarju tat-traineeships
Aħna noffru traineeships darbtejn fis-sena.
L-ewwel perjodu ta' traineeship huwa mill-1 ta' Frar sat-30 ta' Ġunju. Tista' tapplika minn nofs Lulju sa nofs Settembru, u l-kandidati jintgħażlu bejn Ottubru u Diċembru.
It-tieni perjodu ta' traineeship huwa mill-1 ta' Settembru sal-31 ta' Jannar. L-applikazzjonijiet jistgħu jintbagħtu fi Frar u Marzu u l-għażla tal-kandidati ssir minn April sa Ġunju.
Mistoqsijiet komuni
Għandek xi mistoqsijiet oħra? Ara l-FAQ tagħna biex issib it-tweġibiet għall-mistoqsijiet l-aktar frekwenti tagħna.
Regoli tal-Kunsill dwar it-traineeships
L-aħħar reviżjoni: 23 ta' Lulju 2026