Żur il-Kunsill

Hemm diversi modi kif iżżur il-Kunsill:

• esplora ċ-ċentru tal-viżitaturi tagħna u ż-żoni pubbliċi tal-Kunsill waħdek
• itlob sessjoni ta' informazzjoni personalizzata ma' uffiċjal tal-Kunsill għal gruppi ta' 20 parteċipant jew aktar
• ingħaqad ma' żjara ggwidata tal-binjiet tal-Kunsill nhar ta' Ġimgħa

Iż-żjarat kollha fil-Kunsill huma b'xejn u jridu jiġu bbukkjati.

Żjarat fi gruppi

Gruppi ta' mill-inqas 20 parteċipant jistgħu jżuru l-Kunsill u jitolbu sessjoni ta' informazzjoni fakultattiva u esklużiva mingħand membru tal-persunal tal-Kunsill.

Żjarat fi gruppi jistgħu jiġu organizzati fil-biċċa l-kbira tal-ġranet ta' fost il-ġimgħa bejn:

• id-09:00 u l-11:00
• is-13:30 u l-16:00

Ma jsirux żjarat fi gruppi matul ix-xahar ta' Awwissu.

Il-gruppi kollha jeħtieġ li jibbukkjaw iż-żjara tagħhom online. It-talba biex tibbukkja jeħtieġ li ssir mill-inqas 20 jum ta' xogħol qabel iż-żjara. Ladarba nirċievu t-talba tiegħek, membru mit-tim taż-żjarat tagħna jikkuntattjak biex jikkonferma ż-żjara tiegħek.

Sessjonijiet ta' informazzjoni

Il-gruppi jistgħu jitolbu sessjoni ta' informazzjoni esklużiva fejn espert tal-Kunsill jaqsam l-għarfien tiegħu, kif ukoll l-esperjenza tiegħu ta' xi jfisser li taħdem fil-Kunsill, "dar l-istati membri".

Is-sessjonijiet ta' informazzjoni tagħna:

• jieħdu bejn siegħa u sagħtejn (skont il-programm)
• huma disponibbli bl-24 lingwa uffiċjali tal-UE
• huma adatti għal kull min għandu aktar minn 15-il sena

Sessjoni ta' informazzjoni fi grupp tagħtik iċ-ċans li tipparteċipa f'konverżazzjoni interattiva ma' wieħed mill-esperti tagħna u titgħallem u twessa' l-għarfien tiegħek dwar l-UE, ir-rwol tal-Kunsill tal-UE u l-Kunsill Ewropew.

Kif tibbukkja ż-żjara tiegħek fi grupp

Il-mexxej tal-grupp jew rappreżentant tal-istabbiliment edukattiv jew tal-korp tal-istudenti għandu jagħmel talba biex jibbukkja. Il-mexxej tal-grupp jagħti informazzjoni dwar il-grupp matul il-proċess ta' reġistrazzjoni u jkun il-punt ewlieni ta' kuntatt għall-grupp.

Għal raġunijiet ta' organizzazzjoni, nirriżervaw id-dritt li ngħaqqdu żewġ gruppi kompatibbli flimkien.

Iż-żjarat fi gruppi u s-sessjonijiet ta' informazzjoni tagħna huma popolari ħafna u nirrakkomandaw li jiġu bbukkjati minn qabel sew.

Biex ikollok aktar ċans tirriżerva d-data u l-ħin preferuti tiegħek, nirrakkomandaw li titlob biex tibbukkja mill-inqas tliet xhur qabel. Tista' tara l-kalendarju tad-dati disponibbli ladarba tibda l-proċess biex tibbukkja.

Fl-ebda każ ma nistgħu niggarantixxu li t-talba tiegħek tkun tista' tintlaqa'.

Individwi jew gruppi żgħar

Individwi u gruppi żgħar (inqas minn 20 persuna) jistgħu:

• iżuru ċ-ċentru tal-viżitaturi tal-Kunsill
• jibbukkjaw waħda miż-żjarat iggwidati tal-binjiet tal-Kunsill li jsiru kull ġimgħa

Iċ-ċentru tal-viżitaturi tal-Kunsill

Żur iċ-ċentru tal-viżitaturi tal-Kunsill biex titgħallem dwar il-ħidma tal-Kunsill u tal-UE permezz ta' esperjenza multimedjali immersiva.

Id-dħul fiċ-ċentru tal-viżitaturi tal-Kunsill huwa mingħajr ħlas.

Ħinijiet tal-ftuħ

Mit-Tnejn sal-Ġimgħa: 10:30 - 16:00 (10:00 - 13:00 f'Awwissu)

Iċ-ċentru tal-viżitaturi jkun magħluq:

• fil-festi pubbliċi Belġjani
• meta l-istituzzjonijiet tal-UE jkunu magħluqin
• fil-jiem meta jkun hemm laqgħat tal-Kunsill Ewropew
• bejn l-10 u l-14 ta' Awwissu 2026 minħabba xogħlijiet

Kif tibbukkja ż-żjara tiegħek

Meta tippjana li żżur iċ-ċentru tal-viżitaturi tal-Kunsill, jekk jogħġbok qis li:

• iż-żjarat jistgħu jieħdu sa siegħa
• il-kontenut huwa disponibbli bl-24 lingwa uffiċjali tal-UE
• l-esperjenza hi adatta għal kull min għandu aktar minn 15-il sena
• kull viżitatur għandu jiġi rreġistrat individwalment

Żjara fiċ-ċentru tal-viżitaturi ma tinkludix żjara ggwidata tal-binjiet tal-Kunsill. Madankollu, bħala viżitatur ikollok aċċess għaż-żoni pubbliċi tal-binjiet tal-Kunsill, fosthom is-sular t'isfel tal-ispazju b'arkitettura rinomata fil-bini Europa li għandu l-għamla ta' fanal.

Biex iżżur iċ-ċentru tal-viżitaturi tal-Kunsill jeħtieġ tibbukkja online mill-inqas sebat ijiem ta' xogħol qabel.

Żjarat iggwidati kull ġimgħa

Kull nhar ta' Ġimgħa fit-8:00 ta' filgħodu tista' tingħaqad ma' żjara ggwidata tal-binjiet tal-Kunsill, immexxija minn membru tal-persunal tal-Kunsill.

Waqt żjara ggwidata jkollok l-opportunità li tara l-ħidma interna tal-Kunsill, u titgħallem aktar dwar l-arkitettura tal-binjiet Justus Lipsius u Europa. Iż-żjara tinkludi waqfa fl-ispazju b'arkitettura rinomata fil-bini Europa li għandu l-għamla ta' fanal.

Iż-żjara hija adatta għal kull min għandu aktar minn 15-il sena u hija mingħajr ħlas.

Iż-żjarat iggwidati jdumu madwar siegħa u jsiru bil-Franċiż u bl-Ingliż.

Bidu kmieni jiżgura li l-viżitaturi jkunu jistgħu jaraw l-aktar partijiet importanti tal-bini Europa, li jingħalqu għall-viżitaturi tul il-bqija tal-ġurnata.

Billi l-Kunsill bħala istituzzjoni huwa post tax-xogħol, kultant ċerti żoni fil-binjiet jistgħu jingħalqu għall-pubbliku mingħajr avviż.

Jeħtieġ li ż-żjara tkun ibbukkjata. Trid tagħmel it-talba tiegħek għal prenotazzjoni mill-inqas sebat ijiem ta' xogħol qabel. L-ispazji jiġu allokati skont id-disponibbiltà tagħhom.

Żjarat iggwidati f'Awwissu

Matul ix-xahar ta' Awwissu, iż-żjarat iggwidati huma disponibbli tliet darbiet fil-ġimgħa, kif ġej:

• It-Tlieta mid-09:00 sal-10:00
• Il-Ħamis mill-14:00 sat-15:00
• Il-Ġimgħa mid-09:00 sal-10:00

Informazzjoni prattika

Fejn għandek tiġi

Is-sessjonijiet ta' informazzjoni u ż-żjarat iggwidati jsiru fil-binjiet tal-Kunsill fi Brussell.

Żomm f'moħħok li l-kontrolli tas-sigurtà jaf jieħdu xi ftit tal-ħin. Għalhekk iż-żjarat kollha fi gruppi jingħataw ħin li fih jeħtieġ ikunu waslu fil-bini rilevanti tal-Kunsill, u dan irid jiġi rrispettat.

Il-binjiet tal-Kunsill jintlaħqu faċilment bit-trasport pubbliku. Fil-qrib hemm stazzjonijiet tal-ferrovija u tal-metro, kif ukoll waqfiet għall-karozzi tal-linja.

Ir-roundabout Schuman ilha minn Frar 2025 għaddejja minn żvilupp mill-ġdid gradwali, li jista' jaffettwa l-aċċess għall-binjiet tal-Kunsill.

Nirrakkomandaw ħafna t-trasport pubbliku, billi l-parkeġġ huwa estremament limitat u l-mobbiltà tal-karozzi fid-distrett Ewropew hija ristretta minħabba x-xogħol ta' kostruzzjoni li għaddej bħalissa.

Sigurtà u aċċessibbiltà

Kull membru tal-grupp jew viżitatur jeħtieġ iġib miegħu passaport validu jew karta tal-identità nazzjonalivalida biex jidħol fil-binjiet tagħna. Naċċettaw l-oriġinali biss, u kopji ma jiġux aċċettati. Ma naċċettaw l-ebda tip ieħor ta' identifikazzjoni personali.

Gruppi tal-iskola jeħtieġ li jkunu akkumpanjati minn mill-inqas adult wieħed għal kull 10 studenti.

Il-binjiet tal-Kunsill huma aċċessibbli għall-persuni b'mobbiltà mnaqqsa.

Kanċellazzjoni

Nirriżervaw id-dritt li nikkanċellaw żjara skedata għal kwalunkwe grupp li ma jissodisfax ir-rekwiżiti tagħna tas-sigurtà u tal-aċċess.

Jista' jkun li jkollna nikkanċellaw żjarat li jkunu diġà ġew ikkonfermati, anke b'avviż fl-aħħar minuta, f'ċirkostanzi eċċezzjonali li jirriżultaw minn żviluppi politiċi jew laqgħat tal-Kunsill mhux ippjanati.

Żur ir-rappreżentanzi tal-istati membri fi Brussell

Billi l-Kunsill huwa "dar l-istati membri tal-UE", aħna naħdmu mill-qrib mar-rappreżentanzi permanenti tal-istati membri tal-UE. Nissuġġerulek tgħaqqad iż-żjara tiegħek fil-Kunsill ma' żjara f'rappreżentanza permanenti ta' stat membru.

Żur l-istituzzjonijiet l-oħra tal-UE

Il-Parlament Ewropew

Il-Parlament Ewropew huwa bbażat fi Brussell, fi Strażburgu u fil-Lussemburgu. Kull post joffri diversi attivitajiet għall-viżitaturi, li huma maħsuba għal gruppi ta' etajiet u interessi differenti. Il-viżitaturi jistgħu jaraw kif jaħdem il-Parlament Ewropew, kif żviluppa u r-rwol li jaqdi. Għal aktar informazzjoni żur is-sit elettroniku tal-Parlament Ewropew.

Il-Kummissjoni Ewropea

Iċ-ċentru tal-viżitaturi tal-Kummissjoni Ewropea jilqa' gruppi ta' viżitaturi (mill-inqas 15-il persuna). Jagħti preżentazzjonijiet u jospita diskussjonijiet dwar ir-rwol tal-Kummissjoni Ewropea bħala l-eżekuttiv politiku tal-UE. Iż-żjarat għandhom jiġu bbukkjati mill-inqas 10 ġimgħat qabel u jistgħu jiġu adattati għall-interessi u l-etajiet.

Il-Kumitat Ewropew tar-Reġjuni

Il-Kumitat Ewropew tar-Reġjuni jagħti preżentazzjonijiet interessanti lil gruppi ta' viżitaturi (mill-inqas 15-il persuna li jkollhom aktar minn 14-il sena) dwar ir-rwol tar-reġjuni u l-bliet tal-Ewropa fit-tfassil tal-leġiżlazzjoni tal-Unjoni Ewropea. Iż-żjarat għandhom jiġu bbukkjati mill-inqas tmien ġimgħat qabel.

Il-Kumitat Ekonomiku u Soċjali Ewropew

Żur id-dar tas-soċjetà ċivili organizzata għal taħdita interattiva. Skopri t-tliet gruppi tiegħu — li jirrappreżentaw lill-impjegaturi (grupp I), lill-ħaddiema (grupp II) u lill-organizzazzjonijiet tas-soċjetà ċivili (grupp III) — u kif jasserixxu d-drittijiet tagħhom fl-Unjoni Ewropea.

Proċedura għall-ilmenti

Aħna nistinkaw biex noffru l-ogħla standards ta' servizz. Għandek dritt tressaq ilment quddiem l-Ombudsman Ewropew jekk tħoss li s-servizz tal-Kunsill li kont f'kuntatt miegħu ma tax servizz ta' standard għoli.

Madankollu, qabel ma l-Ombudsman jaċċetta lment, jeħtieġ li l-ewwel tgħarraf lis-servizz li jkun indirizza t-talba inizjali tiegħek li ma kontx sodisfatt. Sa fejn ikun possibbli u xieraq, nagħmlu l-almu tagħna biex insibu rimedju għan-nuqqas ta' sodisfazzjon tiegħek.