X'jagħmel il-Kunsill
Entità ewlenija fit-teħid tad-deċiżjonijiet tal-UE
Il-Kunsill tal-Unjoni Ewropea (li spiss jissejjaħ sempliċiment "il-Kunsill") huwa entità ewlenija fit-teħid tad-deċiżjonijiet tal-UE. Il-Kunsill tal-UE huwa fejn il-ministri tas-27 pajjiż tal-UE jingħaqdu flimkien biex jinnegozjaw u jadottaw il-leġiżlazzjoni tal-UE, jikkoordinaw il-politiki u jieħdu d-deċiżjonijiet.
Ix-xogħol ewlieni tal-Kunsill tal-UE huwa t-tfassil tal-liġijiet. Fil-biċċa l-kbira tal-każijiet, il-Kunsill, flimkien mal-Parlament Ewropew, jinnegozja u jadotta l-liġijiet tal-UE abbażi ta' proposti mill-Kummissjoni Ewropea. Huwa għalhekk li l-Kunsill jissejjaħ ukoll "koleġiżlatur" tal-UE.
Ir-rwol tal-Kunsill: ħames kompiti ewlenin
Jinnegozja u jadotta leġiżlazzjoni tal-UE
Il-ministri tas-27 stat membru kollha tal-UE jiltaqgħu fil-Kunsill biex jinnegozjaw u mbagħad jadottaw il-leġiżlazzjoni tal-UE. Dan huwa x-xogħol ewlieni tagħhom fil-Kunsill meta jaġixxi bħala "koleġiżlatur" tal-UE.
Fil-Kunsill, xogħol il-ministri huwa li jaħdmu flimkien biex isibu soluzzjonijiet fil-livell tal-UE għal problemi komuni. Dan jinvolvi livell ta' flessibbiltà u kompromess, peress li jfittxu soluzzjonijiet komuni li jagħtu benefiċċji kemm għall-UE inġenerali kif ukoll għall-pajjiżi rispettivi tagħhom.
Il-biċċa l-kbira tal-proposti leġiżlattivi tal-UE jeħtieġu adozzjoni konġunta miż-żewġ koleġiżlaturi tal-UE: il-Kunsill tal-UE u l-Parlament Ewropew. B'riżultat ta' dan, għal kull proposta jkun hemm diversi linji ta' negozjati li l-Kunsill jieħu sehem fihom:
- il-ministri jiddiskutu l-fehmiet tagħhom ma' xulxin fil-Kunsill, u jilħqu "approċċ ġenerali" (jew pożizzjoni tal-Kunsill)
- imbagħad il-Kunsill jinnegozja mal-Parlament Ewropew u l-Kummissjoni
Meta l-Kunsill u l-Parlament it-tnejn ikunu qablu dwar it-test finali, l-att leġiżlattiv jiġi adottat.
Jadotta l-baġit tal-UE
Il-Kunsill jadotta l-baġit annwali tal-UE flimkien mal-Parlament Ewropew.
Il-perjodu tal-baġit ikopri sena kalendarja. Is-soltu, il-baġit jiġi adottat f'Novembru/Diċembru u jitħaddem mill-1 ta' Jannar tas-sena ta' wara.
Il-baġit annwali tal-UE huwa bbażat fuq il-qafas finanzjarju pluriennali (jew il-QFP), baġit fit-tul li soltu jiġi stabbilit għal seba' snin.
Jikkoordina l-politika tal-istati membri
Il-Kunsill jikkoordina l-politiki tal-Istati Membri f'oqsma speċifiċi, bħall-politika ekonomika jew dwar l-impjiegi.
F'oqsma oħra, bħall-edukazzjoni, il-kultura, iż-żgħażagħ u l-isport, li huma kompetenzi nazzjonali, il-Kunsill jadotta oqfsa ta' politika u pjanijiet ta' ħidma tal-UE li jistabbilixxu l-prijoritajiet għall-kooperazzjoni bejn l-istati membri u l-Kummissjoni.
Jiżviluppa l-politika estera u ta' sigurtà komuni tal-UE
Il-Kunsill jiddefinixxi u jimplimenta l-politika estera u ta' sigurtà komuni tal-UE abbażi ta' linji gwida stabbiliti mill-Kunsill Ewropew. Dan jinkludi l-politika għall-iżvilupp u l-għajnuna umanitarja tal-UE, id-difiża u l-kummerċ.
Flimkien mar-Rappreżentant Għoli tal-Unjoni għall-Affarijiet Barranin u l-Politika ta' Sigurtà, il-Kunsill jiżgura l-unità, il-konsistenza u l-effettività tal-azzjoni esterna tal-UE.
Jikkonkludi ftehimiet internazzjonali
Il-Kunsill jieħu d-deċiżjoni finali dwar il-konklużjoni tal-ftehimiet internazzjonali tal-UE ma' pajjiżi mhux fl-UE u organizzazzjonijiet internazzjonali. Dawn huma fil-biċċa l-kbira ftehimiet kummerċjali.
Il-Kunsill jagħti mandat u direttivi ta' negozjati lill-Kummissjoni, li tinnegozja f'isem l-UE. Fi tmiem in-negozjati, il-Kunsill jivvota biex jiffirma u jikkonkludi l-ftehim. Il-ftehimiet internazzjonali kollha, minbarra dawk tal-politika estera u ta' sigurtà, jeħtieġu l-approvazzjoni tal-Parlament Ewropew.
Ara wkoll
L-aħħar reviżjoni: 23 ta' Frar 2026