Il-presidenza tal-Kunsill tal-UE

X'tagħmel il-presidenza

Il-presidenza tal-Kunsill hija responsabbli biex tmexxi 'l quddiem il-ħidma tal-Kunsill fuq il-leġiżlazzjoni tal-UE, iżżomm il-kontinwità tal-aġenda tal-UE, u tiżgura l-ordni fil-proċessi leġiżlattivi u l-kooperazzjoni fost l-istati membri.

Ir-rwol tagħha huwa vitali għall-istabbiltà tal-UE u għat-twettiq tal-funzjonijiet leġiżlattivi tagħha.

Ħames kompiti ewlenin

Il-kompiti ewlenin tal-presidenza jinkludu: tippjana, tikkoordina u tippresiedi l-laqgħat, tirrappreżenta lill-Kunsill, tinnegozja ma' istituzzjonijiet oħra tal-UE, tikkomunika dwar l-attivitajiet tiegħu u sservi bħala intermedjarju imparzjali biex tilħaq ftehimiet fil-Kunsill.

Tippjana, tikkoordina u tippresiedi l-laqgħat

Il-presidenza tippjana, tikkoordina u tippresiedi l-laqgħat li jsiru mill-Kunsill (ħlief għall-Kunsill Affarijiet Barranin) u mill-biċċa l-kbira tal-korpi preparatorji tal-Kunsill.

Tkun intermedjarju imparzjali

Isservi bħala intermedjarju imparzjali fid-diskussjonijiet, filwaqt li tissuġġerixxi soluzzjonijiet ta' kompromess bil-ħsieb li jintlaħaq qbil fil-Kunsill.

Tirrappreżenta lill-Kunsill

Il-presidenza tirrappreżenta lill-Kunsill fir-relazzjonijiet tiegħu mal-Parlament Ewropew, il-Kummissjoni Ewropea u l-istituzzjonijiet l-oħra tal-UE.

Tinnegozja ma' istituzzjonijiet oħra tal-UE

Tinnegozja f'isem il-Kunsill biex jintlaħaq ftehim dwar fajls leġiżlattivi ma' istituzzjonijiet oħra tal-UE.

Tikkomunika dwar l-attivitajiet tagħha

Il-presidenza tgħin biex il-pubbliku jiġi infurmat dwar l-attivitajiet tal-Kunsill, pereżempju billi tħejji laqgħat għall-istampa.

Skont id-definizzjoni tagħha stess, il-presidenza hija newtrali. Ir-rwol tagħha huwa li taġixxi bħala intermedjarju imparzjali. Il-pajjiż li jkollu l-presidenza ma jistax jiffavorixxi la l-preferenzi tiegħu stess u lanqas dawk ta' stat membru partikolari.

Peress li hemm 27 stat membru u dawn ikollhom il-presidenza għal sitt xhur kull wieħed, kull membru, ikun kemm ikun kbir jew żgħir, ikollu l-presidenza tal-Kunsill kull 13-il sena u nofs.

Il-presidenza taħdem b'koordinazzjoni mill-qrib ma':

• il-President tal-Kunsill Ewropew
• ir-Rappreżentant Għoli tal-Unjoni għall-Affarijiet Barranin u l-Politika ta' Sigurtà

Hija tappoġġa l-ħidma tagħhom u xi drabi tista' tintalab twettaq ċerti kompiti għar-rappreżentant għoli, pereżempju billi tirrappreżenta lill-Kunsill Affarijiet Barranin (KAB) quddiem il-Parlament Ewropew jew billi tippresiedi l-KAB meta dan jiddiskuti kwistjonijiet ta' politika kummerċjali komuni.

Presidenza b'rotazzjoni

Kull pajjiż tal-UE jkollu l-presidenza tal-Kunsill għal sitt xhur kull darba. L-ordni li fiha kull stat membru jkollu l-presidenza tiġi stabbilita b'deċiżjoni tal-Kunsill.

Matul il-perjodu ta' sitt xhur, il-presidenza tippresiedi laqgħat fil-livelli kollha fil-Kunsill, u tgħin biex tiġi żgurata l-kontinwità tal-ħidma leġiżlattiva.

• Lista ta' presidenzi tal-Kunsill tal-Unjoni Ewropea

Min ser ikollu l-presidenza li jmiss?

Triju ta' presidenzi

Gruppi ta' tliet stati membri li jkollhom presidenzi suċċessivi jaħdmu flimkien mill-qrib bħala "triju".

Din is-sistema ta' triju ġiet introdotta bit-Trattat ta' Liżbona fl-2009. It-triju jistabbilixxi għanijiet fit-tul u jħejji aġenda komuni li tiddetermina t-temi u l-kwistjonijiet prinċipali li jkunu ser jiġu indirizzati mill-Kunsill tul perjodu ta' 18-il xahar.

Abbażi ta' dan il-programm tat-triju, kull wieħed mit-tliet pajjiżi jħejji l-programm tiegħu ta' sitt xhur f'aktar dettall.

It-triju attwali huwa magħmul minn:

• l-Irlanda
• il-Litwanja
• il-Greċja

• Programm tat-triju għall-Irlanda, il-Litwanja u l-Greċja

Ara wkoll

• Kif inhi organizzata l-ħidma tal-Kunsill Ewropew