Politika lingwistika

Liema lingwi jintużaw f'dan is-sit web?

Is-sit web juża l-24 lingwa uffiċjali tal-UE:

il-Bulgaru, il-Kroat, iċ-Ċek, id-Daniż, l-Olandiż, l-Ingliż, l-Estonjan, il-Finlandiż, il-Franċiż, il-Ġermaniż, il-Grieg, l-Ungeriż, l-Irlandiż, it-Taljan, il-Latvjan, il-Litwan, il-Malti, il-Pollakk, il-Portugiż, ir-Rumen, is-Slovakk, is-Sloven, l-Ispanjol u l-Iżvediż.

Kif jintużaw il-lingwi fuq is-sit web tal-Kunsill?

Is-sit web juża tliet politiki lingwistiċi differenti:

1. kontenut ippubblikat fl-24 lingwa uffiċjali tal-UE
2. kontenut ippubblikat biss bl-Ingliż jew bl-Ingliż u bil-Franċiż
3. kontenut ippubblikat bl-Ingliż, bil-Franċiż u bi kwalunkwe lingwa oħra rilevanti

Il-politika lingwistika standard hija li l-kontenut kollu jiġi ppubblikat bil-lingwi uffiċjali kollha tal-UE fl-istess ħin. Dan jinkludi dokumenti uffiċjali fir-reġistru pubbliku tal-Kunsill.

L-unika eċċezzjoni għar-regola hija ċertu kontenut ippubblikat fit-taqsima "laqgħat" u t-taqsima "aħbarijiet u media" tas-sit web.

Laqgħat

L-informazzjoni dwar il-laqgħat tal-Kunsill u tal-Grupp tal-Euro, bħall-punti ewlenin għad-diskussjoni u l-post u d-data tal-laqgħa hija disponibbli bil-lingwi uffiċjali kollha tal-UE. Sommarju tal-iżviluppi ewlenin u d-deċiżjonijiet meħudin f'kull laqgħa jiġi ppubblikat ukoll fil-lingwi uffiċjali kollha tal-UE. Madankollu, għadd ta' dokumenti b'informazzjoni aktar dettaljata huma ppubblikati bl-Ingliż u bil-Franċiż jew bl-Ingliż biss.

L-informazzjoni dwar il-laqgħat tal-Kunsill Ewropew hija ppubblikata bil-lingwi kollha tal-UE.

Prodotti tal-istampa

Minħabba n-natura speċjalizzata tal-qarrejja tagħhom, għadd ta' prodotti tal-istampa jiġu ppubblikati bl-Ingliż jew bl-Ingliż u l-Franċiż biss. Dawn jinkludu:

• dikjarazzjonijiet mill-Grupp tal-Euro u l-President tal-Grupp tal-Euro
• l-ippjanar ta' kull ġimagħtejn tal-uffiċċju tal-istampa
• taħbiriet konsultattivi tal-media ppubblikati qabel avvenimenti speċifiċi, bħal summits ma' pajjiżi mhux tal-UE
• dikjarazzjonijiet, kummenti u taħdidiet mill-President tal-Kunsill Ewropew - dawn ta' spiss jiġu ppubblikati wkoll b'lingwi rilevanti oħra, abbażi tas-suġġett tagħhom

Minħabba li jkun hemm bżonn issir komunikazzjoni malajr mal-istampa dwar ċerti kwistjonijiet, l-istqarrijiet għall-istampa ta' spiss jiġu ppubblikati l-ewwel bil-lingwa oriġinali tagħhom qabel ma jiġu tradotti għat-23 lingwa l-oħra tal-UE. Aħna nagħmlu ħilitna biex nippubblikaw il-verżjonijiet tradotti malajr kemm jista' jkun wara l-verżjoni oriġinali, u kull verżjoni lingwistika ġdida tiġi ppubblikata malli tkun disponibbli.

Għalfejn ma nistax insib informazzjoni bil-lingwa tiegħi?

Is-SĠK għandu l-għan li jipprovdi lil min juża s-sit web tiegħu b'informazzjoni kemm jista' jkun aġġornata bil-lingwa li l-aktar li jifhmu.

Madankollu, għandna baġit u riżorsi limitati għat-traduzzjoni. Sfortunatament dan ifisser li ma nistgħux nittraduċu l-kontenut kollu tagħna bil-lingwi kollha tal-UE fil-ħin. Għalhekk nikkonċentraw ir-riżorsi tagħna biex niżguraw li l-kontenut ewlieni jkun disponibbli bil-lingwi uffiċjali kollha, filwaqt li nillimitaw l-għażliet tal-lingwi għal kontenut maħsub għal qarrejja speċjalizzati, bħall-ġurnalisti.

Minkejja li xi kontenut tas-sit web jaf ma jkunx disponibbli bil-lingwa tiegħek, xorta tista' taċċessa l-leġiżlazzjoni tal-UE u dokumenti uffiċjali tal-Kunsill u l-Kunsill Ewropew bl-24 lingwa uffiċjali kollha tal-UE permezz tar-reġistru pubbliku.

• Fittex dokumenti