Skip to content

Il-Kunsill tal-Unjoni Ewropea

Il-Kunsill tal-UE huwa fejn il-ministri nazzjonali minn kull pajjiż tal-UE jiltaqgħu biex jinnegozjaw u jadottaw il-liġijiet tal-UE.

Punti ewlenin

Ħamest ibnadar itiru fuq arbli bojod twal quddiem sema ikħal ċar, li juru l-bnadar tal-Unjoni Ewropea, tal-Albanija, tal-Montenegro, tal-Moldova u tal-Ukrajna f'ringiela mix-xellug għal-lemin.
  • 14 ta' Lulju 2026
Progress fit-tkabbir tal-UE b'erba' konferenzi dwar l-adeżjoni

Progress fit-tkabbir tal-UE b'erba' konferenzi dwar l-adeżjoni

L-UE kellha konferenzi dwar l-adeżjoni mal-Ukrajna, mal-Montenegro, mal-Moldova u mal-Albanija, li mmarkaw stadji importanti fi triq kull pajjiż lejn sħubija fl-UE u għamlu aktar progress fit-tkabbir tal-UE.

Bħalissa l-Irlanda għandha l-presidenza tal-Kunsill

L-Irlanda għandha l-presidenza tal-Kunsill sal-31 ta' Diċembru 2026. Din hija t-tmien darba li l-pajjiż kien fit-tmun tal-Kunsill, din id-darba bħala parti minn triju ta' presidenzi mal-Litwanja u l-Greċja. Il-Presidenza Irlandiża ser tkun iggwidata mill-prinċipju tas-saħħa fl-għaqda.

Qanpiena li tagħti bidu lil-laqgħat 'il fuq mill-kaxxa tagħha, ħdejn il-logo tal-presidenza Irlandiża.

X'jagħmel il-Kunsill

Il-Kunsill tal-Unjoni Ewropea (spiss imsejjaħ sempliċiment "il-Kunsill") ilaqqa' flimkien il-ministri mill-gvernijiet tas-27 stat membru tal-UE. Il-kompitu ewlieni tal-Kunsill huwa t-tfassil tal-liġijiet.

Jadotta wkoll il-baġit tal-UE, jikkoordina l-politiki, jikkonkludi ftehimiet internazzjonali f'isem l-UE u jiżviluppa l-politika estera u ta' sigurtà tal-UE.

Il-Kunsill tal-UE huwa entità legali waħda. Madankollu, fil-prattika, il-ministri jiltaqgħu fil-Kunsill fi gruppi tematiċi differenti, magħrufa bħala l-"konfigurazzjonijiet tal-Kunsill".

Oqsma ta' xogħol

Laqgħat tal-Kunsill

Kif jaħdem il-Kunsill

Il-ministri tal-gvernijiet nazzjonali jadottaw il-leġiżlazzjoni tal-UE fil-laqgħat tal-Kunsill. Qabel ma l-ministri tal-istati membri jivvutaw dwar kwistjoni, din l-ewwel tiġi eżaminata u diskussa mill-korpi preparatorji tal-Kunsill. Għall-biċċa l-kbira tal-leġiżlazzjoni, il-Kunsill jiddeċiedi flimkien mal-Parlament Ewropew permezz tal-proċedura leġiżlattiva ordinarja.

Il-presidenza tal-Kunsill tal-UE, li tinbidel b'rotazzjoni kull sitt xhur minn pajjiż tal-UE għal dak li jkun imiss, hija responsabbli biex tmexxi l-ħidma tal-Kunsill.

Il-punti kollha jgħaddu mill-korpi preparatorji (il-gruppi ta' ħidma u l-Coreper) qabel ma l-ministri jieħdu deċiżjoni dwarhom.

Il-Kunsill jaġixxi bħala koleġiżlatur mal-Parlament Ewropew fil-biċċa l-kbira tal-oqsma. Jieħu wkoll deċiżjonijiet biex jesprimi pożizzjonijiet politiċi.

Il-Kunsill juża tliet tipi differenti ta' sistemi ta' votazzjoni skont is-suġġett: maġġoranza kwalifikata, maġġoranza sempliċi u unanimità. Il-maġġoranza kwalifikata tintuża fil-biċċa l-kbira tal-każijiet.

Il-presidenza tal-Kunsill tistabbilixxi l-aġenda u tmexxi l-ħidma tal-Kunsill. Il-presidenza tinbidel b'rotazzjoni kull sitt xhur minn pajjiż tal-UE għal dak li jkun imiss.

Bħala medja, kull sena jsiru aktar minn 4 000 laqgħa fil-livelli differenti tal-Kunsill. Madwar 70 sa 80 minnhom huma laqgħat ministerjali. Il-laqgħat ministerjali jsiru l-aktar fi Brussell, ħlief fix-xhur ta' April, Ġunju u Ottubru, meta jsiru fil-Lussemburgu.

Storja

Ara l-istadji importanti tal-Kunsill, mill-ħolqien tiegħu sal-lum.

  • 1958

    25 ta' Jannar

    Jitwieled il-Kunsill

    L-ewwel laqgħa tal-Kunsill tal-KEE ssir taħt il-presidenza tal-ministru għall-affarijiet barranin tal-Belġju.

  • 1993

    1 ta' Novembru

    Trattat ta' Maastricht

    It-Trattat ta' Maastricht jara l-ħolqien ta' oqsma ta' politika ġodda bħall-politika estera u ta' sigurtà komuni u l-ġustizzja u l-affarijiet interni.

  • 2009

    1 ta' Diċembru

    It-Trattat ta' Liżbona

    L-użu tal-votazzjoni b'maġġoranza kwalifikata għat-teħid ta' deċiżjonijiet fil-Kunsill huwa estiż skont it-Trattat ta' Liżbona.