Akkreditazzjoni tal-media

Badge ta' sena 2026

B'din il-badge ma jkollokx aktar għalfejn tapplika separatament għal akkreditazzjoni għal kull avveniment. Tagħtik ukoll aċċess għall-Kunsill matul il-jiem ta' ħidma meta ma jkunx hemm summits jew avvenimenti ta' livell għoli.

Il-badge ta' sena hija disponibbli biss għal:

• nazzjonali tal-UE/EFTA residenti fil-Belġju
• nazzjonali mhux tal-UE li għexu fil-Belġju għal mill-inqas 5 snin.

L-applikazzjonijiet għas-sena kalendarja 2026 issa għalqu.

Ir-reġistrazzjonijiet ser jerġgħu jinfetħu matul l-2026.

• Applika
• Aktar tagħrif dwar il-badge ta' sena

Ikkuntattjana

Jekk għandek bżonn l-għajnuna bl-akkreditazzjonijiet, ikkuntattja liċ-ċentru stampa:

Akkreditazzjoni għal summits u avvenimenti ta' livell għoli

Ir-rappreżentanti tal-media li jixtiequ jkopru summits tal-UE u avvenimenti ta' livell għoli personalment huma meħtieġa jirreġistraw minn qabel.

L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.

Biex tirċievi aġġornamenti dwar l-akkreditazzjoni, tista':

• Tirreġistra għall-allerti bl-email biex tirċievi avviżi għall-media
• Segwi @eucouncilpress fuq X

Akkreditazzjoni għal laqgħat ministerjali u avvenimenti oħra

Il-professjonisti tal-media li jixtiequ jirrappurtaw dwar laqgħat ministerjali u kwalunkwe laqgħa oħra (bl-eċċezzjoni ta' summits u avvenimenti ta' livell għoli) għandhom tliet opzjonijiet:

• badge ta' ġurnata
• badge ta' sena
• il-badge interistituzzjonali tal-UE

Akkreditazzjoni ta' ġurnata

Tista' tinkiseb mill-uffiċċju tas-sigurtà fid-daħla għaċ-ċentru stampa. Jekk jogħġbok ġib id-dokumenti li ġejjin:

• passaport jew karta tal-identità validi
• kard tal-istampa nazzjonali valida jew ittra ffirmata mill-kap editur tal-organizzazzjoni tal-media tiegħek li tikkonferma l-istatus tiegħek bħala ġurnalista u ssemmi liema avveniment qed tkopri

Badge ta' sena

Il-badge ta' sena għas-summits tal-UE tista' tintuża wkoll biex jinkiseb aċċess għall-Kunsill f'jiem ta' ħidma regolari.

• Aktar tagħrif dwar il-badge ta' sena

Badge interistituzzjonali tal-UE

L-istituzzjonijiet tal-UE għandhom skema konġunta ta' akkreditazzjoni għall-korrispondenti bbażati fi Brussell. Hija amministrata mill-Kummissjoni Ewropea.

Id-detenturi tal-badge interistituzzjonali għandhom aċċess għall-faċilitajiet tal-istampa tal-Kunsill, tal-Kummissjoni Ewropea u tal-Parlament Ewropew.

• Uffiċċju tal-akkreditazzjoni tal-Kummissjoni

Termini u kundizzjonijiet

Il-ġurnalisti akkreditati kollha jridu jimxu mar-Regoli ġenerali applikabbli għaċ-ċentru stampa u ma' kwalunkwe regola addizzjonali speċifika li tiġi stabbilita mis-Segretarjat Ġenerali tal-Kunsill.

Fl-ebda ċirkostanza ma jistgħu jippubblikaw stampa jew immaġni tal-badge riċevuta jew kwalunkwe immaġni fejn din il-badge tidher fuq l-internet jew fuq il-media soċjali. Bl-istess mod, huma jintrabtu li ma jippubblikawx stampa jew immaġni ta' din il-badge minn parti terza fuq l-internet jew fuq il-media soċjali.

• Aqra r-regoli ġenerali applikabbli għaċ-ċentru stampa

L-uffiċċju stampa tas-Segretarjat Ġenerali tal-Kunsill jirriżerva d-dritt li jirrevoka l-akkreditazzjonijiet ta' kwalunkwe ġurnalist li l-imġiba tiegħu tfixkel l-andament bla xkiel tal-media jew attivitajiet oħra tal-Istituzzjonijiet Ewropej.

Min hu eliġibbli?

L-akkreditazzjoni tal-media hija aċċessibbli biss għall-ġurnalisti minn organizzazzjoni bona fide tal-media.

It-talbiet jiġu eżaminati mill-uffiċċju stampa tal-Kunsill skont kriterji definiti flimkien mal-Assoċjazzjoni tal-Istampa Internazzjonali (API).

It-talbiet għall-badge ta' sena huma wkoll soġġetti għal verifika tas-sigurtà. Għaldaqstant, l-informazzjoni ppreżentata ser tintuża mis-Segretarjat Ġenerali tal-Kunsill tal-Unjoni Ewropea (SĠK) u tintbagħat lil Awtorità tas-Sigurtà Nazzjonali waħda jew aktar.

Il-ġurnalisti li japplikaw għall-akkreditazzjoni tal-media fil-Kunsill Ewropew iridu jissodisfaw il-kriterji li ġejjin:

• iridu jkunu impjegati ta' organizzazzjoni bona fide tal-media jew ġurnalisti freelance li regolarment ikopru l-affarijiet tal-UE għal organizzazzjoni bona fide tal-media.
• il-ġurnaliżmu għandu jkun is-sors ewlieni ta' dħul tagħhom.

X'inhi media bona fide?

Biex titqies bħala media bona fide, l-organizzazzjoni tiegħek trid:

• tkun editorjalment indipendenti u organizzazzjoni kummerċjali mingħajr restrizzjonijiet ta' distribuzzjoni
• tkun miftuħa dwar kif tiġi ffinanzjata u minn min
• tagħti informazzjoni dwar l-attivitajiet tal-Istituzzjonijiet Ewropej

Rekwiżiti addizzjonali għall-media online: is-sit web għandu jkun sit web tal-media online professjonali li jimxi mar-regoli stabbiliti għall-organizzazzjonijiet tal-media (ara hawn fuq), u jkollu indirizz tat-triq u numru tat-telefown speċifiċi u verifikabbli.

Il-biċċa l-kbira tal-kontenut tas-sit web għandu:

• jittratta aħbarijiet, kummentarji jew analiżi oriġinali
• jittratta affarijiet tal-UE
• jiġi aġġornat mill-inqas darba fil-ġimgħa

Min mhux eliġibbli?

• pubblikazzjonijiet stampati jew online li huma pubblikazzjonijiet ta' komunikazzjoni, sensibilizzazzjoni jew promozzjoni ta' organizzazzjonijiet mhux governattivi jew mingħajr skop ta' qligħ.
• gruppi ta' riflessjoni jew gruppi ta' interess.
• il-Kunsill ser jirrifjuta applikazzjonijiet minn persuni li mhumiex ġurnalisti jew li huma lobbyists jew konsulenti, jew individwi li għandhom attività sekondarja professjonali li huwa jqis inkompatibbli ma' akkreditazzjoni tal-istampa.

X'inhuma l-kriterji użati biex tiġi eżaminata l-applikazzjoni tiegħek?

It-talbiet kollha għall-akkreditazzjoni jiġu eżaminati mill-uffiċċju stampa tas-Segretarjat Ġenerali tal-Kunsill. Għal dan il-għan, tista' tintalab tipprovdi informazzjoni/dokumentazzjoni addizzjonali (eż. prova tax-xogħol, kuntratti ta' impjieg, prova tad-dħul, eċċ.). Is-Segretarjat Ġenerali jista' jikkonsulta l-Assoċjazzjoni tal-Istampa Internazzjonali (API).

Jekk l-applikazzjoni tiegħek għall-akkreditazzjoni tiġi rrifjutata minħabba li ma titqiesx ġurnalist minn media bona fide, tista' tappella din id-deċiżjoni permezz ta' email:

• Ibgħat email

It-talba tiegħek trid tinkludi evidenza dettaljata li tissodisfa l-kriterji msemmija hawn fuq. It-talba tiegħek għal rieżami ser tiġi eżaminata mill-uffiċċju stampa tas-Segretarjat Ġenerali tal-Kunsill, flimkien mal-Assoċjazzjoni tal-Istampa Internazzjonali (API). Waqt li tistenna l-appell tiegħek, l-uffiċċju stampa tas-Segretarjat Ġenerali tal-Kunsill jista' jiddeċiedi li jagħtik jew ma jagħtikx akkreditazzjoni temporanja.