Kunsill tal-ministri AKP-UE, 28-29/05/2015, 28 u 29 ta' Mejju 2015

Riżultati ewlenin

Ninsab kuntenta ħafna bid-diskussjonijiet skjetti, sostantivi u kostruttivi li kellna ma' sħabna mill-pajjiżi tal-AKP. L-iskambji ta’ fehmiet tagħna dwar għadd ta’ kwistjonijiet ewlenin bħall-aġenda għall-iżvilupp ta’ wara l-2015 u l-migrazzjoni għal darb’oħra ssottolinjaw l-importanza tas-sħubija tagħna. Zanda Kalniņa-Lukaševica, Segretarju Parlamentari tal-Istat Latvjana għall-Affarijiet tal-UE

Fil-laqgħa annwali tagħhom fit-28 u d-29 ta’ Mejju 2015, il-ministri tal-UE u tal-AKP ffokaw id-diskussjonijiet tagħhom fuq l-aġenda għall-iżvilupp sostenibbli ta' wara l-2015, b’mod partikolari l-finanzjament għall-iżvilupp u t-tibdil fil-klima. Huma ntrabtu li jaħdmu flimkien lejn it-tħejjija tad-diskussjonijiet globali dwar dawn il-kwistjonijiet f’Addis Ababa, New York u Pariġi aktar tard din is-sena.

Wara l-ġrajjiet traġiċi reċenti fil-Mediterran, kellhom ukoll skambju ta' fehmiet dwar il-kwistjoni tal-migrazzjoni u l-iżvilupp. Huma kkundannaw in-netwerks li jorganizzaw it-traffikar tal-bnedmin b’nuqqas ta’ rispett totali għall-ħajja tal-bnedmin u talbu biex tittieħed azzjoni urġenti kontra dawn in-netwerks. Approvaw ukoll rakkomandazzjonijiet dwar it-traffikar u l-faċilitazzjoni tad-dħul klandestin ta’ migranti.

Il-Kunsill kellu skambju ta’ fehmiet dwar il-ġejjieni tal-iżvilupp tas-settur privat fil-pajjiżi tal-AKP.

Il-ministri ddiskutew ukoll diversi kwistjonijiet b'rabta mal-kummerċ, b’mod partikolari l-qagħda attwali tal-Ftehimiet ta’ Sħubija Ekonomika, l-impatt tat-TTIP fuq il-pajjiżi tal-AKP, kif ukoll kwistjonijiet speċifiċi dwar prodotti bażiċi ta’ rilevanza partikolari għall-pajjiżi tal-AKP.

Huma kellhom skambju ta’ fehmiet dwar is-Sena Ewropea għall-Iżvilupp u dwar it-tibdil fil-klima fid-dawl tal-konferenza li se ssir f’Pariġi aktar tard din is-sena.