Evitar tat‑taxxa korporattiva: il‑Kunsill jadotta regoli dwar l‑iskambju ta' informazzjoni relatata mat‑taxxa dwar kumpaniji multinazzjonali

Fil-25 ta’ Mejju 2016, il-Kunsill adotta regoli dwar ir-rapportar minn kumpaniji multinazzjonali ta’ informazzjoni relatata mat-taxxa u l-iskambju ta’ dik l-informazzjoni bejn l-istati membri.

Id-direttiva hija l-ewwel element ta’ pakkett ta’ proposti mill-Kummissjoni maħruġ f’Jannar 2016 sabiex isaħħaħ ir-regoli kontra l-evitar tat-taxxa korporattiva. Id-direttiva tibbaża fuq rakkomandazzjonijiet tal-2015 tal‑OECD li jindirizzaw l‑erożjoni tal‑bażi tat‑taxxa u t‑trasferiment tal‑profitt (BEPS).

Id‑direttiva ser timplimenta l-azzjoni nru 13 tal-OECD kontra l-BEPS, li tittratta r-rapportar pajjiż b’pajjiż mill-kumpaniji multinazzjonali, fi strument tal-UE li jorbot legalment. Hija tkopri gruppi ta’ kumpaniji b'total ta' dħul konsolidat tal‑grupp ta' mill‑anqas €750 miljun.

L-għan prinċipali tad-direttiva hu li l-kumpaniji multinazzjonali ma jitħallewx jisfruttaw it-teknikalitajiet ta’ sistema tat-taxxa, jew disparitajiet bejn sistemi tat-taxxa differenti, biex inaqqsu jew jevitaw l-obbligazzjonijiet tagħhom tat-taxxa.

Informazzjoni li trid tiġi rrapportata mill-kumpaniji multinazzjonali

B’żieda fit-trasparenza, id-direttiva tesiġi li l-kumpaniji multinazzjonali jirrapportaw informazzjoni -- imqassma pajjiż b’pajjiż -- dwar dħul, profitti, taxxi mħallsa, kapital, qligħ, assi tanġibbli u n-numru ta’ impjegati.

Din l-informazzjoni trid tiġi rrapportata, diġà mis-sena fiskali 2016, lill-awtoritajiet tat-taxxa tal-istat membru fejn il-kumpanija omm tal-grupp ikollha r-residenza fiskali tagħha.

Jekk il-kumpanija omm tal-grupp ma tkunx resident fiskali fl-UE u ma tippreżentax rapport, trid tagħmel dan permezz tas-sussidjarji tagħha fl-UE. Dan ir-“rapportar sekondarju” ser ikun fakultattiv għas-sena fiskali 2016, iżda obbligatorju mis-sena fiskali 2017.

Skambju ta’ informazzjoni

Id-direttiva tirrikjedi li l‑awtoritajiet fiskali jiskambjaw dawn ir‑rapporti awtomatikament, sabiex ikunu jistgħu jiġu vvalutati r-riskji tal-evitar tat‑taxxa relatati mal‑ipprezzar ta' trasferiment^[1]. Għal dan il‑għan, hija tibbaża fuq il‑qafas eżistenti tal‑UE għall-iskambju awtomatiku bejn l‑awtoritajiet tat‑taxxa, stabbilit bid‑direttiva 2011/16/UE. Biex jiġu ffrankati l-ispejjeż tal-implimentazzjoni ser jintuża netwerk komuni ta' komunikazzjoni eżistenti.

Id-direttiva tiffissa skadenzi ta’:

• 12-il xahar wara tmiem is-sena fiskali sabiex il-kumpaniji jippreżentaw l-informazzjoni;
• tliet xhur oħra sabiex l-amministrazzjonijiet tat-taxxa jiskambjaw l-informazzjoni awtomatikament.

Hija tirrikjedi wkoll li l-istati membri jistipulaw ir-regoli dwar il-pieni li japplikaw fil-każ ta’ ksur.

Approċċ komuni tal‑UE

Id-direttiva ser tiżgura implimentazzjoni armonizzata fl-UE tar-rakkomandazzjoni tal-OECD dwar ir-rapportar pajjiż b’pajjiż.

Id-direttiva ġiet adottata mingħajr diskussjoni f’laqgħa tal-Kunsill Affarijiet Ekonomiċi u Finanzjarji, wara ftehim milħuq fit-8 ta’ Marzu 2016.

Inizjattivi oħra

Il-pakkett kontra l-evitar tat-taxxa maħruġ f’Jannar 2016 isegwi minn għadd ta’ inizjattivi tal-UE fl-2015. Dawn jinkludu direttiva, adottata f’Diċembru 2015, dwar deċiżjonijiet transfruntiera dwar it-taxxa.

F’Diċembru 2014, il-Kunsill Ewropew semma “ħtieġa urġenti li jiġu avvanzati l-isforzi fil-ġlieda kontra l-evitar tat-taxxa u l-ippjanar aggressiv tat-taxxa, kemm fil-livell dinji kif ukoll f'dak tal-UE”.

^[1] L-ipprezzar ta' trasferiment huwa l-prezz imħallas għal prodotti u servizzi skambjati bejn entitajiet li jikkostitwixxu grupp korporattiv.

• Direttiva ta’ Mejju 2016 dwar l‑iskambju ta' informazzjoni relatata mat‑taxxa ta' kumpaniji multinazzjonali
• Anti-tax-avoidance proposals by the European Commission
• Press release on December 2015 adoption of the directive on cross-border tax rulings