Cúnamh oifigiúil um fhorbairt: an tAontas agus na Ballstáit ina sholáthraí is mó ar domhan i gcónaí

D’fhormheas an Chomhairle conclúidí maidir le spriocanna an Aontais i réimse na Cabhrach um Fhorbairt sa tríú tuarascáil bhliantúil déag chuig an gComhairle Eorpach, lena ndeimhnítear gurb iad an tAontas agus a Bhallstáit ina sholáthraí is mó ar domhan den chúnamh oifigiúil um fhorbairt (COF). Déantar anailís sa tuarascáil ar threochtaí maidir leis na gealltanais agus an comhlíonadh ar chúnamh oifigiúil an Aontais um fhorbairt.

I dtimpeallacht mhaoiniúcháin atá ag éirí níos casta, ar a raibh tionchar mór ag cogadh foghach na Rúise ar an Úcráin, paindéim COVID-19 agus tionchair an athraithe aeráide, chailliúint na bithéagsúlachta agus an truaillithe, is foinse mhór airgeadais do na tíortha is boichte é an cúnamh oifigiúil um fhorbairt i gcónaí, agus tá ról lárnach aige i gcónaí maidir le Clár Oibre 2030 a bhaint amach.

Thug an Chomhairle dá haire sa tuarascáil uaithi gur shroich ODA comhchoiteann an Aontais EUR 95.9 billiún in 2023, méadú ó EUR 93.3 billiún in 2022 agus EUR 71.6 billiún in 2021. Léiríonn an méadú sin ó bhí 2021 ann go bhfuil iarracht á déanamh an athuair ag an Aontas agus na Ballstáit tacú le tíortha atá i mbéal forbartha agus le daoine ar leochaileach a gcás, trí chur chuige Fhoireann na hEorpa.

Dá bhrí sin, choimeád an tAontas agus a Bhallstáit a seasamh mar an soláthróir ODA is mó ar domhan, ós iad a thugann 42 % den ODA go domhanda in 2022 agus 2023 agus dhaingnigh siad a gceannaireacht sa chlár oibre domhanda le haghaidh forbairt inbhuanaithe.

In 2023, 0.57 % d’ollioncam náisiúnta (OIN) an Aontais a bhí in ODA comhchoiteann an Aontais. Cé gur laghdú beag é sin i gcomparáid le sciar 0.59 % de OIN an Aontais in 2022, tá sé fós i bhfad níos airde ná sciar 0.49 % in 2021, agus níos airde ná comhiomlán chomhaltaí an Choiste Cúnaimh Forbartha nach Ballstáit den Aontas iad, arb éard a bhí ina ODA in 2023 ná 0.31 % de OIN.

Leagann an Chomhairle béim ar a phráinní atá sé go ndéanfadh an tAontas agus a Bhallstáit tuilleadh chun spriocanna aonair a bhaint amach chomh maith le gealltanas comhchoiteann an Aontais maidir le 0.70 % de OIN a sholáthar mar ODA, agus 0.20 % a chur ar fáil mar ODA do na tíortha is lú forbairt faoi 2030.

• Tuarascáil Bhliantúil 2023 chuig an gComhairle Eorpach maidir le Spriocanna an Aontais i réimse na Cabhrach um Fhorbairt
• Cúnamh Oifigiúil um Fhorbairt in 2023 (OCDE)