"Bainimid úsáid as fianáin lena chinntiú go bhfeabhsaítear d’eispéireas brabhsála. Tá gá le fianáin riachtanacha chun tacú le gnéithe bunriachtanacha de shuíomh gréasáin na Comhairle. Cuidíonn na fianáin roghnacha linn tuarascálacha staidrimh anaithnide, comhiomlánaithe a tháirgeadh chun freastal níos fearr ar do chuid riachtanas.
Le cead uaitse, úsáidfimid fianáin le sonraí comhlánaithe anaithnide a tháirgeadh maidir le brabhsáil agus iompraíocht na gcuairteoirí ar ár suíomh gréasáin. Úsáidfimid na sonraí sin chun feabhas a chur ar an eispéireas agat ar ár suíomh.
An Chomhairle Gnóthaí Eachtracha, 24 Meitheamh 2024
Na príomhthorthaí
Fogha na Rúise faoin Úcráin
Ghlac an Chomhairle an 14ú pacáiste de bhearta sriantacha eacnamaíocha agus aonair lena ndírítear ar earnálacha ardluacha gheilleagar na Rúise agus lena ndéantar níos deacra é dul timpeall ar smachtbhannaí an Aontais.
Ina dhiaidh sin, phléigh an Chomhairle Gnóthaí Eachtracha an fogha atá á thabhairt ag an Rúis faoin Úcráin, tar éis d’Aire Gnóthaí Eachtracha na hÚcráine, Dmytro Kuleba, a chomhghleacaithe san Aontas a chur ar an eolas trí fhíschomhdháil faoi na forbairtí is déanaí ar an láthair agus faoi riachtanais is tábhachtaí na hÚcráine.
Díríodh an plé ina dhiaidh sin ar thacaíocht mhíleata an Aontais don Úcráin.
Ní foláir dúinn níos mó aerchosaintí, níos mó armlóin agus níos mó tacaíochta a chur ar fáil don Úcráin chun a hacmhainneachtaí tionsclaíocha féin a fhorbairt. Tá Putin ar an ionsaí i gcónaí, agus is ar an mbonneagar fuinnimh atá sé ag díriú go príomha. Is léir go bhfuil sé i gceist ag Putin a léiriú go bhfuil an Úcráin leochaileach; ní mór dúinn a léiriú go dtacóimid leis an Úcráin.
Josep Borrell, Ardionadaí do Ghnóthaí Eachtracha agus don Bheartas Slándála
Ba dhíol sásaimh do na hairí an cinneadh a glacadh maidir le brabúis amhantair ó shócmhainní blocáilte na Rúise a úsáid; leithdháilfear ar an tSaoráid Eorpach Síochána iad. Leis sin, beifear in ann na brabúis amhantair a eascraíonn as sócmhainní Rúiseacha a blocáladh san Eoraip de thoradh bearta sriantacha a oibríochtú chun tairbhe na hÚcráine go pras. Ba cheart gurb é €1.4 billiún an méid a bheidh ar fáil le linn na míosa seo chugainn.
Chuir an tArdionadaí i bhfios go raibh gealltanais slándála an Aontais don Úcráin á dtabhairt chun críche ag an gComhairle, agus go mbeidh an tAontas, leis an gcinneadh sin, ag cur teachtaireacht shoiléir chuig an Rúis maidir lena thiomanta atá sé leanúint de thacaíocht a thabhairt don Úcráin.
An staid sa Mheánoirthear
Phléigh an Chomhairle Gnóthaí Eachtracha a bhfuil ag titim amach sa Mheánoirthear, ag díriú ar an staid mar atá ar an láthair, lena n-áirítear an staid dhaonnúil in Gaza agus fulaingt na ngiall.
Chuir an tArdionadaí i bhfios nach léir i gcónaí go bhfuil sos cogaidh ar na bacáin, 3 seachtaine tar éis d’Uachtarán na Stát Aontaithe, Joe Biden, a threochlár i dtreo sos cogaidh a chur síos agus tar éis go bhfuair sé tacaíocht láidir idirnáisiúnta, go háirithe tacaíocht ón Aontas. Leag sé béim freisin ar na deacrachtaí dosháraithe a bhaineann le tacaíocht dhaonnúil in éagmais na tacaíochta sin.
Sa chomhthéacs sin, phléigh an Chomhairle tacaíocht d’Údarás na Palaistíne agus do UNRWA, chomh maith le gníomhaireachtaí eile de chuid na Náisiún Aontaithe.
Phléigh na hairí freisin an teannas atá ag dul i méid ag teorainn thuaidh Iosrael agus an baol tromchúiseach go leathnóidh an foréigean sa réigiún. Chuir an tArdionadaí in iúl go dtacaíonn sé leis na hiarrachtaí idirghabhála gníomhacha atá faoi stiúir na Stát Aontaithe agus na Fraince chun an choimhlint idir Iosrael agus Hezbollah a mhaolú, agus go dtacaíonn sé leis an Liobáin agus an Chipir, a bhí faoi bhagairt ag Hezbollah.
Ar deireadh, phléigh an Chomhairle tacaíocht an Aontais chun teacht ar réiteach polaitiúil ar an gcoinbhleacht agus chomhaontaigh sí an comhar leis na comhpháirtithe idirnáisiúnta a shaothrú agus a threisiú chun próiseas polaitiúil i dtreo réiteach dhá stát a athsheoladh. Pléadh freisin an fhéidearthacht go mbeadh Comhairle Comhlachais ann le hIosrael.
Na Balcáin Thiar
Ina dhiaidh sin, bhí seisear Airí Gnóthaí Eachtracha ó thíortha comhpháirtíochta na mBalcán Thiar in éineacht le hairí Gnóthaí Eachtracha an Aontais chun plé neamhfhoirmiúil a dhéanamh le linn am lóin maidir le rannpháirtíocht choiteann níos láidre i ndáil leis an mbeartas eachtrach agus slándála.
Táimid réidh leis an lánpháirtiú de réir a chéile a dhoimhniú a thuilleadh agus ár dtacaíocht do chomhpháirtithe na mBalcán Thiar a leathnú. Agus táimid ag súil go seasfaidh siad le chéile chun an t-ord idirnáisiúnta a chosaint agus chun an Úcráin a chosaint chomh maith, go háirithe maidir leis na bearta a rinneadh chun ionradh na Rúise ar an Úcráin a chomhrac. Léiríonn a n-ailíniú lenár gComhbheartas Eachtrach agus Slándála a rogha straitéiseach agus a dtiomantas do bhallraíocht an Aontais. Ní féidir dlúthnasc a choinneáil le réimeas Putin agus todhchaí choiteann a thógáil leis an Aontas agus laistigh de ag an am céanna.
Josep Borrell, Ardionadaí do Ghnóthaí Eachtracha agus don Bheartas Slándála
An tSeoirsia
Phléigh an Chomhairle Gnóthaí Eachtracha an tSeoirsia, obair leantach ar an seisiún tuairimíochta a reáchtáladh ag an gComhairle i mí na Bealtaine. Phléigh an Chomhairle na forbairtí polaitiúla sa tír, ina measc glacadh agus forfheidhmiú an dlí maidir le trédhearcacht an tionchair eachtraigh.
Is oth linn go bhfuil bréagaisnéis faoin Aontas Eorpach agus faoina luachanna á scaipeadh go forleathan ó foinsí oifigiúla freisin. Chualamar guthanna Seoirseacha ag an leibhéal is airde, agus ba dhíol iontais dúinn a chlos á maíomh gur ag cothú nasc idir an tír agus an tAontas atá an dlí seo. Déarfaidh mé go neamhbhalbh é. A mhalairt ar fad atá fíor. Is amhlaidh is é an coimhthíos atá á chothú ag an dlí seo agus na forbairtí diúltacha a bhaineann leis idir an tSeoirsia agus an tAontas. [...] Cuirfimid leis an tacaíocht a thugaimid don tsochaí shibhialta agus do na meáin, déanfaimid an bhréagaisnéis a chomhrac agus cuirfimid leis an tacaíocht a thugaimid don phróiseas toghcháin.
Josep Borrell, Ardionadaí do Ghnóthaí Eachtracha agus don Bheartas Slándála
Phléigh an Chomhairle gníomhaíochtaí a d’fhéadfaí a dhéanamh i gcás ina rachadh an staid in olcas agus leanfaidh sí d’fhaireachán a dhéanamh ar an staid agus de bhearta an Aontais a oiriúnú de réir mar is gá.
Réigiún Mór-Lochanna agus an Túinéis
Bhí seisiún tuairimíochta ag an Chomhairle Gnóthaí Eachtracha maidir le Réigiún Mór-Lochanna na hAfraice, ina measc an ghéarchéim leanúnach in Oirthear Phoblacht Dhaonlathach an Chongó (PDC), agus na himpleachtaí réigiúnacha agus geopholaitiúla a bhaineann leis. D’fhógair an tArdionadaí go n-ainmneoidh an tAontas toscaire speisialta chuig an réigiún go luath chun straitéis an Aontais a chur chun feidhme.
Faoi chúrsaí reatha, cuireadh an Chomhairle ar an eolas faoi na forbairtí polaitiúla sa Túinéis agus phléigh sí an gá atá le measúnú a dhéanamh ar an staid ar dtús, agus ina dhiaidh sin a mheas conas is fearr comhpháirtíocht an Aontais leis an tír a bhainistiú agus tacaíocht an Aontais do mhuintir na Túinéise a chaomhnú.
Conclúidí ón gComhairle
Conclúidí maidir leis an méid a leanas formheasta ag an gComhairle:
- an Mheastóireacht Mheántéarma ar ionstraim maoinithe sheachtraigh ICFCI(NDICI) - an Eoraip Dhomhanda
Is iad údaráis rialtais na tíre óstaí a láimhseálfaidh creidiúnú na meán le haghaidh cruinnithe mullaigh idirnáisiúnta a reáchtáiltear lasmuigh den Aontas Eorpach.
