Comhrac na sceimhlitheoireachta agus an antoisceachais fhoréignigh: conclúidí formheasta ag an gComhairle maidir le naisc sheachtracha-inmheánacha a threisiú

D’fhormheas an Chomhairle conclúidí lena ndírítear ar fheabhas a chur ar na hiarrachtaí chun aghaidh a thabhairt ar an sceimhlitheoireacht agus ar an antoisceachas foréigneach. Mar aon leis na conclúidí ón gComhairle maidir le tosaíochtaí a bheidh ann amach anseo chun iarrachtaí comhpháirteacha frithsceimhlitheoireachta an Aontais Eorpaigh agus a Bhallstát a neartú a formheasadh an tseachtain seo caite, léirítear le conclúidí an lae inniu go bhfuil rún daingean ag an Aontas comhoibriú le tíortha comhpháirtíochta agus saoránaigh an Aontais a chosaint.

Leagtar béim sna conclúidí ar an gcaoi a bhfuil bagairt na sceimhlitheoireachta agus an fhoréigin antoiscigh éirithe níos ilghnéithí agus níos ilroinnte. Tugann an Chomhairle dá haire agus is cúis mhór imní di an méadú atá tagtha ar chumas Chúige Da’esh Khorasan (ISKP), oibríochtaí seachtracha a spreagadh agus a chur i gcrích, san Eoraip freisin. Cuireann an Chomhairle i dtreis an staid slándála san Afraic atá ag dul in olcas agus an chaoi a bhfuil an ghéarchéim leanúnach sa Mheánoirthear ag spreagadh an radacaithe ar fud an domhain. Dhearbhaigh an Chomhairle go bhfuil sí meáite i gcónaí ar an sceimhlitheoireacht a chomhrac san Iaráic agus sa tSiria.

I bhfianaise na bagartha sin atá ag síorathrú, cuireann an Chomhairle i dtreis gur den sé ríthábhacht na naisc sheachtracha-inmheánacha a threisiú. Ní mór aghaidh a thabhairt ar an sceimhlitheoireacht agus ar an antoisceachas foréigneach trí chur chuige comhleanúnach lena gcomhtháthaítear comhbheartas eachtrach agus slándála agus gníomhaíochtaí an Aontais i réimse an cheartais agus gnóthaí baile.

Dearbhaíonn an Chomhairle freisin gurb é an t-aon fhreagairt inbhuanaithe ar an sceimhlitheoireacht agus ar an antoisceachas foréigneach ná freagairt atá bunaithe ar an daonlathas, ar an smacht reachta, ar an trédhearcacht, an gcuntasacht agus ar an bhfreagrúlacht ó thaobh inscne de.

Cuirtear i dtreis sna conclúidí ón gComhairle nach mór leanúint d’infheistíocht a dhéanamh sa chomhar frithsceimhlitheoireachta idir an tAontas agus tríú tíortha trí idirphlé agus trí thionscadail fothaithe acmhainneachta. Leagtar béim bhreise sna conclúidí ar an ngá atá le leas iomlán a bhaint as acmhainneacht iomlán Líonra Saineolaithe Frithsceimhlitheoireachta/Slándála an Aontais, go háirithe chun tacú le forbairt agus gníomhaíocht bheartas frithsceimhlitheoireachta an Aontais.

Chun éifeachtacht agus comhordú iarrachtaí frithsceimhlitheoireachta an Aontais a mhéadú a thuilleadh, iarrann an Chomhairle go ndéanfaí tionscnaimh Fhoireann na hEorpa lena dtugtar le chéile saineolas agus acmhainní an Aontais agus na mBallstát.

• Conclúidí ón gComhairle maidir le naisc sheachtracha-inmheánacha a threisiú i gcomhrac na sceimhlitheoireachta agus an antoisceachais fhoréignigh
• An sceimhlitheoireacht a chomhrac: conclúidí formheasta ag an gComhairle maidir le tosaíochtaí a bheidh ann amach anseo chun an sceimhlitheoireacht a chomhrac (preaseisiúint, an 12 Nollaig 2024)

  Níl an acmhainn seo ar fáil faoi láthair ach amháin sa teanga (sna teangacha) seo a leanas:

  EN
• Freagairt an Aontais ar an sceimhlitheoireacht (eolas cúlra)
• An sceimhlitheoireacht: conclúidí glactha ag an gComhairle lena leagtar amach gníomhaíochtaí breise chun Eorpaigh a chosaint (preaseisiúint, an 9 Meitheamh 2022)