Estiż b'sena r-reġim ta' sanzjonijiet kontra attivitajiet ta' tħaffir illegali fil-Lvant tal-Mediterran

Illum il-Kunsill adotta deċiżjoni li testendi b'sena, sat-12 ta' Novembru 2021, il-qafas eżistenti għal miżuri restrittivi b'reazzjoni għall-attivitajiet ta' tħaffir mhux awtorizzati tat-Turkija fil-Lvant tal-Mediterran.

B'hekk l-Unjoni Ewropea ser tkun tista' tibqa' timponi miżuri restrittivi mmirati fuq persuni jew entitajiet involuti f'attivitajiet ta' tħaffir mhux awtorizzati ta' idrokarburi fil-Lvant tal-Mediterran jew li huma responsabbli għalihom.

Is-sanzjonijiet jikkonsistu minn projbizzjoni fuq l-ivvjaġġar lejn l-UE u ffriżar tal-assi għal persuni, u ffriżar tal-assi għal entitajiet. Barra minn hekk, persuni u entitajiet mill-UE huma pprojbiti milli jagħmlu disponibbli fondi lil dawk elenkati.

Bħalissa żewġ individwi huma soġġetti għal sanzjonijiet.

Informazzjoni ġenerali

Ir-reġim ta' sanzjonijiet kontra attivitajiet ta' tħaffir illegali fil-Lvant tal-Mediterran hija segwitu dirett għall-konklużjonijiet tal-Kunsill tal-14 ta' Ottubru 2019, li ġew approvati mill-Kunsill Ewropew fis-17 u t-18 ta' Ottubru 2019, meta l-UE affermat mill-ġdid is-solidarjetà sħiħa tagħha ma' Ċipru, rigward ir-rispett tas-sovranità u d-drittijiet sovrani tiegħu skont id-dritt internazzjonali u stiednet lill-Kummissjoni u lis-Servizz Ewropew għall-Azzjoni Esterna biex iressqu proposti għal qafas għal miżuri restrittivi.

• L-attivitajiet ta' tħaffir illegali tat-Turkija fil-Lvant tal-Mediterran: il-Kunsill jadotta qafas ta' sanzjonijiet (stqarrija għall-istampa, 11 ta' Novembru 2019)
• L-attivitajiet ta' tħaffir illegali tat-Turkija fil-Lvant tal-Mediterran: l-UE żżid żewġ persuni mal-lista ta' sanzjonijiet (stqarrija għall-istampa, 27 ta' Frar 2020)