Comhpháirtithe ar son an iltaobhachais, an dlí idirnáisiúnta, na síochána agus an rathúnais
Tionólfaidh Uachtarán na Comhairle Eorpaí, António Costa, i gcomhar le hUachtarán na Céinia, William Ruto, agus Príomh-Aire Cheanada, Mark Carney, cruinniú mullaigh na gComhpháirtithe ar son an iltaobhachais, an dlí idirnáisiúnta, na síochána agus an rathúnais (cruinniú mullaigh P4M) an 21 Meán Fómhair 2026 ar imeall Sheachtain Ardleibhéil Chomhthionól Ginearálta na Náisiún Aontaithe.
Is é is aidhm dár dtionscnamh a bheith ina ardán oscailte do chomhpháirtithe ó gach cearn den domhan atá réidh chun prionsabail choiteanna a chosaint agus oibriú i dtreo réitigh phraiticiúla. Is deis a bheidh ann don idirphlé, don chomhghuaillíocht a fhorbairt agus do chomhar praiticiúil a dhéanamh. Tacóidh sé le hobair na Náisiún Aontaithe agus le formáidí iltaobhacha eile, cuideoidh sé le naisc a fhorbairt sna réigiúin éagsúla, agus cuideoidh sé freisin le hathchóiriú agus nuachóiriú na n-institiúidí iltaobhacha a chur chun cinn – rud a chuirfidh le gníomhaíocht nithiúil a dhéanamh de ghealltanais chomhroinnte.
An tUachtarán António Costa
Agus méadú ag teacht ar an mbrú atá ar na hinstitiúidí iltaobhacha i ngeall ar theannas geopholaitiúil, coinbhleachtaí agus dúshláin dhomhanda atá ag teacht chun cinn amhail an t-athrú aeráide agus an intleacht shaorga, féachfar le grúpa éagsúil tíortha as réigiúin éagsúla a thabhairt le chéile ag an gcruinniú mullaigh seo ar mhaithe leis an gcóras iltaobhach a neartú agus a chosaint agus an tsíocháin agus rathúnas cuimsitheach a chur chun cinn, trí dhíospóireacht a chothú ar an leibhéal polaitiúil is airde.
Beidh preasagallamh ag na ceannairí tar éis an imeachta.
Cúlra
Is ar imeall an 81ú seisiún de Chomhthionól Ginearálta na Náisiún Aontaithe a thionólfar an t-imeacht. Tabharfaidh Uachtarán na Comhairle Eorpaí, António Costa aitheasc uaidh, thar ceann an Aontais Eorpaigh, ar an Déardaoin an 24 Meán Fómhair.
Teagmhálacha Preasa
An t-athbhreithniú deireanach: an 18 Meán Fómhair 2026
