An sceimhlitheoireacht san Aontas: fíricí agus figiúirí

Foilsíonn Europol – gníomhaireacht an Aontais i ndáil le comhar i bhforfheidhmiú an dlí – tuarascáil an Aontais maidir le staid agus treochtaí na sceimhlitheoireachta gach bliain. Tugtar figiúirí sa tuarascáil maidir le hionsaithe sceimhlitheoireachta agus gabhálacha a bhaineann leis an sceimhlitheoireacht san Aontas Eorpach agus tá sí bunaithe ar eolas a chuireann Ballstáit an Aontais ar fáil.

• Tuarascáil an Aontais maidir le staid agus treochtaí na sceimhlitheoireachta 2022 (Europol)

Ionsaithe sceimhlitheoireachta san Aontas de réir an chineáil (2010-2021)

Léirítear sa chairt seo na hionsaithe sceimhlitheoireachta a tharla san Aontas idir 2010 agus 2021. San áireamh sna figiúirí tá ionsaithe ar éirigh leo, ar theip orthu agus ar sáraíodh iad agus miondealaítear iad de réir bliana agus de réir an chineáil: jiohádach/reiligiún-spreagtha, an eite dheis, an eite chlé agus an t-ainrialachas, an náisiúnachas eitneach agus an scarúnachas, eile agus neamhshonraithe. Áirítear an Ríocht Aontaithe ar na figiúirí idir 2010 agus 2019.

In 2021 bhí 15 theagmhas sceimhlitheoireachta ann i mBallstáit an Aontais. Bhí líon iomlán na n-ionsaithe in 2021 i bhfad níos ísle ná mar a bhí sna blianta roimhe sin, mar gheall ar laghdú suntasach ar líon na n-ionsaithe a tuairiscíodh mar sceimhlitheoireacht na heite clé.

Idir 2019 agus 2021, sáraíodh 29 bplota jiohádacha nó de chuid na heite deise antoiscí ar fud an Aontais.

Gabhálacha a bhaineann leis an sceimhlitheoireacht san Aontas (2010-2021)

Léirítear sa chairt seo na gabhálacha a bhaineann leis an sceimhlitheoireacht a rinneadh san Aontas idir 2010 agus 2021, de réir bliana agus de réir cineáil: jiohádach/reiligiún-spreagtha, an eite dheis, an eite chlé agus an t-ainrialachas, an náisiúnachas eitneach agus an scarúnachas, eile agus neamhshonraithe. Áirítear an Ríocht Aontaithe ar na figiúirí idir 2010 agus 2019.

Idir 2019 agus 2021, gabhadh 1 560 duine i mBallstáit an Aontais ar amhras go ndearna siad cionta a bhaineann leis an sceimhlitheoireacht.

In 2021, ba é an cion is minice a raibh gabháil mar thoradh air – i measc na ngabhálacha sin a tuairiscíodh – ballraíocht i ngrúpa sceimhlitheoireachta, agus ina dhiaidh sin ionsaí a phleanáil nó a ullmhú. Cúisíodh amhrastaigh eile as sceimhlitheoireacht a mhaoiniú, as an earcaíocht agus gríosú chun na sceimhlitheoireachta.

Ionsaithe sceimhlitheoireachta agus gabhálacha a bhaineann leis an sceimhlitheoireacht san Aontas (2021)

Léirítear sa chairt seo ionsaithe sceimhlitheoireachta agus gabhálacha a bhaineann leis an sceimhlitheoireacht a rinneadh san Aontas in 2021. San áireamh sna figiúirí tá ionsaithe ar éirigh leo, ar theip orthu agus ar sáraíodh iad agus miondealaítear iad de réir na gcineálacha cleamhnachta: jiohádach/reiligiún-spreagtha, an eite dheis, an eite chlé agus an t-ainrialachas, an náisiúnachas eitneach agus an scarúnachas, eile agus neamhshonraithe.

Tharla an líon is mó ionsaithe sa Fhrainc (5), agus sa Ghearmáin (3) agus sa tSualainn (2) ina dhiaidh sin. Thuairiscigh an Ostair, an Danmhairg, an Ungáir, an Bheilg agus an Spáinn ionsaí amháin i ngach tír.

Bhí an dá bhás a taifeadadh in 2021 mar thoradh ar na hionsaithe jiohádacha a rinneadh sa Spáinn agus sa Fhrainc.

Tuilleadh eolais:

• Obair an Aontais chun dul i ngleic leis an sceimhlitheoireacht (scéal digiteach)
• Freagairt an Aontais ar an sceimhlitheoireacht (eolas cúlra)