Cruinniú mullaigh idir an tAontas Eorpach agus an tSín, an Bhruiséil, 29/06/2015, 29 Meitheamh 2015

Tionóladh an 17ú cruinniú mullaigh déthaobhach idir an tAontas Eorpach agus an tSín ar an Luan an 29 Meitheamh sa Bhruiséil, inar comóradh 40 bliain de chaidreamh taidhleoireachta idir an tAontas Eorpach agus an tSín.

Rinne Donald Tusk, Uachtarán na Comhairle Eorpaí, agus Jean-Claude Juncker, Uachtarán an Choimisiúin Eorpaigh, ionadaíocht ar an Aontas Eorpach.

Bhí an Príomh-Aire Li Keqiang i láthair thar ceann na Síne.

• Ráiteas Comhpháirteach ón Aontas agus ón tSín, an 29 Meitheamh 2015

An caidreamh polaitiúil agus eacnamaíoch idir an tAontas agus an tSín

Chomhaontaigh na ceannairí clár oibre straitéiseach 2020 idir an Aontas Eorpach agus an tSín a athneartú ag an gcruinniú mullaigh a bhí i mBéising in 2013 inar díríodh ar an méid a leanas:

• síocháin agus slándáil
• rathúnas
• forbairt inbhuanaithe
• idirphlé idirphearsanta

Bhí saincheisteanna a bhaineann leis an imirce agus leis an tsoghluaisteacht ar chlár oibre an chruinnithe mullaigh chomh maith, agus pléadh comhaontú maidir le tarscaoileadh víosa frithpháirteach a bhunú le haghaidh sealbhóirí pas taidhleoireachta. 

Chomhaontaigh an tAontas agus an tSín comhaontú chun an comhar eatarthu maidir le cosaint agus le slándáil a fhorbairt tuilleadh. Leag siad béim freisin ar a dtiomantas i ndáil le hidirphlé faoi chearta an duine a chosaint agus a chur chun cinn. 

Chuir an tUachtarán Tusk in iúl freisin go raibh an tAontas imníoch faoi shaoirse cainte agus faoi chomhlachas leis an tSín, lena n-áirítear cás na ndaoine ar de ghrúpaí mionlacha iad, amhail Tibéadaigh agus Uigiúraigh. 

Dúshláin dhomhanda

Phléigh na ceannairí comhar iltaobhach maidir le saincheisteanna a bhaineann le trádáil, leis an aeráid agus le forbairt freisin. Tionóladh cruinniú mullaigh gnó idir an tAontas agus an tSín agus an cruinniú mullaigh ar siúl.

Caibidlíocht maidir leis an athrú aeráide

Phléigh an tAontas agus an tSín cur chun cinn an ísealcharbóin agus infheistíochtaí déthaobhacha agus idirnáisúnta a bheadh fabhrach don aeráid. Chomhaontaigh siad a ndícheall a dhéanamh margadh cothrom agus uaillmhianach a bhaint amach ag an gcomhdháil idirnáisiúnta faoin aeráid a bheidh ar siúl i bPáras i mí na Nollag 2015.

• Ráiteas Comhpháirteach ón Aontas agus ón tSín ar an athrú aeráide, an 29 Meitheamh 2015

Saincheisteanna a bhaineann leis an mbeartas eachtrach agus réigiúnach

Bhí an dul chun cinn a rinneadh le déanaí i gcomharsanacht an Aontais agus na Síne faoi seach ar an gclár oibre le linn an dinnéir, go háirithe cás na hÚcráine agus an cás san Áise Thoir Theas.

Ábhair eile a bhaineann leis an mbeartas eachtrach ar tugadh aghaidh orthu: An Libia, an tSiria, Éimin, an Iaráic agus an Iaráin.

Cúlra faisnéise

• Seisiún faisnéise

Féach freisin

• An Caidreamh idir an tAontas Eorpach agus an tSín (SEGS)
• Caidreamh trádála an Aontais leis an tSín (An Coimisiún Eorpach — Trádáil)