Summit UE-Ċina, Brussell, 29/06/2015, 29 ta' Ġunju 2015

Is-17-il summit bilaterali bejn l-Unjoni Ewropea u ċ-Ċina sar nhar it-Tnejn 29 ta’ Ġunju fi Brussell, li ċċelebra l-40 anniversarju tar-relazzjonijiet diplomatiċi bejn l-UE u ċ-Ċina.

L-UE kienet irrappreżentata minn Donald Tusk, President tal-Kunsill Ewropew, u minn Jean-Claude Juncker, President tal-Kummissjoni Ewropea.

Iċ-Ċina kienet irrappreżentata mill-Prim Ministru Li Keqiang.

• Dikjarazzjoni konġunta tal-UE u ċ-Ċina, 29 ta’ Ġunju 2015

Ir-relazzjonijiet politiċi u ekonomiċi bejn l-UE u ċ-Ċina

Il-mexxejja qablu li jsaħħu l-Aġenda Strateġika 2020 bejn l-UE u ċ-Ċina, adottata fis-summit tal-2013 f’Beijing li tiffoka fuq:

• il-paċi u sigurtà
• il-prosperità
• l-iżvilupp sostenibbli
• l-iskambji bejn iċ-ċittadini

Kwistjonijiet ta’ migrazzjoni u mobbiltà kienu wkoll fuq l-aġenda tas-summit, b’diskussjoni dwar l-istabbiliment ta’ ftehim reċiproku dwar l-eżenzjoni mill-viża għad-detenturi ta' passaporti diplomatiċi. 

L-UE u ċ-Ċina qablu li jkomplu jiżviluppaw il-kooperazzjoni tagħhom b'rabta mad-difiża u s-sigurtà. Huma enfasizzaw ukoll l-impenn tagħhom lejn il-protezzjoni u l-promozzjoni tad-djalogu dwar id-drittijiet tal-bniedem. 

Il-President Tusk esprima wkoll it-tħassib tal-UE b'rabta mal-libertà ta’ espressjoni u assoċjazzjoni fiċ-Ċina, inkluż is-sitwazzjoni tal-persuni li jagħmlu parti minn minoranzi bħat-Tibetani u l-Uighurs. 

Sfidi globali

Il-mexxejja ddiskutew ukoll il-kooperazzjoni multilaterali dwar kwistjonijiet kummerċjali, tal-klima u ta' żvilupp. Fil-marġni tas-summit, sar summit dwar in-negozju bejn l-UE u ċ-Ċina.

Negozjati dwar it-tibdil fil-klima

L-UE u ċ-Ċina ddiskutew il-promozzjoni ta’ investimenti b’livell baxx ta’ emissjonijiet tal-karbonju u li ma jagħmlux ħsara lill-ambjent fil-livell bilaterali u internazzjonali. Huma qablu li jimmiraw għal ftehim ġust u ambizzjuż waqt il-konferenza internazzjonali dwar il-klima f’Pariġi f’Diċembru 2015.

• Dikjarazzjoni konġunta tal-UE u ċ-Ċina dwar it-tibdil fil-klima, 29 ta’ Ġunju 2015

Kwistjonijiet ta' politika reġjonali u estera

L-iżviluppi reċenti fil-viċinati rispettivi tal-UE u ċ-Ċina kienu fuq l-aġenda taċ-ċena, speċjalment is-sitwazzjoni fl-Ukrajna u fix-Xlokk tal-Asja.

Suġġetti oħra ta’ politika estera li ġew indirizzati kienu: Il-Libja, is-Sirja, il-Jemen, l-Iraq u l-Iran.

Sfond

• Informazzjoni ta' sfond

Ara wkoll

• Relazzjonijiet tal-UE maċ-Ċina (SEAE)
• Relazzjonijiet kummerċjali tal-UE maċ-Ċina (Kummissjoni Ewropea - Kummerċ)