Maoiniú don troid i gcoinne an athraithe aeráide: Ranníocaíochtaí an Aontais Eorpaigh agus na mBallstát suas le €21.7 billiún in 2018

Le hais 2013, is fiú breis agus dúbailt na ranníocaíochtaí ón Aontas agus ó na Ballstáit, agus cuidíonn sin le tíortha i mbéal forbartha a n-astaíochtaí gás ceaptha teasa a laghdú agus dul i ngleic le hiarmhairtí an athraithe aeráide.

Deimhníodh an méid iomlán i gcomhthéacs na gconclúidí a ghlac na hairí airgeadais ar an 8 Samhain, agus COP25 ar na bacáin, comhdháil na Náisiún Aontaithe maidir leis an athrú aeráide, a bheidh ar siúl i Maidrid ón 2 go dtí an 13 Nollaig 2019.

Is iad an tAontas agus na Ballstáit i gcónaí a chuireann an chuid is mó den mhaoiniú ar fáil don troid i gcoinne an athraithe aeráide. B'fhiú €21.7 billiún a ranníocaíochtaí iomlána in 2018, méadú ar an €20.4 billiún in 2017. Díríodh na ranníocaíochtaí go rathúil ar thionscnaimh chun an t-athrú aeráide a mhaolú agus a oiriúnú i dtíortha i mbéal forbartha.

Céim thábhachtach atá sa ranníocaíocht sin i dtreo chur chun feidhme an chomhaontaithe maidir leis an athrú aeráide ar thángthas air i bPáras i mí na Nollag 2015 agus atá ceangailteach ó thaobh dlí de.

Léiríonn an figiúr is déanaí a dhiongbháilte atá an tAontas cur lena ranníocaíocht idirnáisiúnta i ndáil leis an troid i gcoinne an athraithe aeráide i dtreo $100 billiún in aghaidh na bliana a socraíodh do thíortha tionsclaithe faoi 2020 agus ar aghaidh go dtí 2025. Leagfaidh na páirtithe sprioc nua chainníochtaithe chomhchoiteann síos faoi 2025. I ndáil leis sin, tugtar ar aird sna conclúidí gealltanas an Aontais páirt a ghlacadh sa phlé sin ó mhí na Samhna 2020 ar aghaidh.

Cuirtear i dtreis sna conclúidí freisin an tábhacht atá le cur chun feidhme práinneach uaillmhianach de Chomhaontú Pháras. Iarrtar iontu dul chun cinn gasta uaillmhianach a dhéanamh maidir le sreafaí airgeadais, ionas go mbainfear amach leo leibhéal íseal astaíochtaí gás ceaptha teasa agus forbairt atá seasmhach ó thaobh na haeráide. Maidir leis sin, cuirtear chun suntais iontu an dul chun cinn a rinneadh le déanaí i dtaca le hathchóirithe reachtacha ar leibhéal an Aontais ar an airgeadas inbhuanaithe (tacsanomaíocht, tagarmharcanna, nochtuithe).

• Conclúidí 2019 ón gComhairle maidir leis an maoiniú don troid i gcoinne an athraithe aeráide