An Chomhairle Gnóthaí Eacnamaíocha agus Airgeadais, 08/11/2019, 8 Samhain 2019

Príomhthorthaí

Maoiniú don troid i gcoinne an athraithe aeráide

Ghlac an Chomhairle conclúidí maidir le maoiniú don troid i gcoinne an athraithe aeráide agus roimh COP25, comhdháil na Náisiún Aontaithe maidir leis an athrú aeráide, a bheidh ar siúl i Maidrid ón 2 go dtí an 13 Nollaig 2019.

Tá an tAontas ag cur in iúl an athuair go bhfuil sé dáiríre faoina thiomantas aghaidh a thabhairt ar na dúshláin a bhaineann leis an athrú aeráide. Ó 2013, táimid tar éis ár ranníocaíochtaí airgeadais a dhúbailt chun cabhrú le tíortha atá i mbéal forbartha a n-astaíochtaí gás ceaptha teasa a laghdú agus chun dul i ngleic le tionchar an athraithe aeráide. Mika Lintilä, Aire Airgeadais na Fionlainne

Is iad an tAontas agus na Ballstáit i gcónaí a chuireann an chuid is mó den mhaoiniú ar fáil don troid i gcoinne an athraithe aeráide. B'fhiú €21.7 billiún a ranníocaíochtaí iomlána in 2018, méadú ar an €20.4 billiún in 2017.

• Maoiniú don troid i gcoinne an athraithe aeráide: Méadú go €21.7 billiún ar ranníocaíochtaí an Aontais agus na mBallstát in 2018 (preaseisiúint, 8 Samhain 2019)

Cánachas

Cánachas digiteach

Rinne na hairí machnamh le linn Uachtaránacht na Fionnlainne ar staid na hoibre le plé leanúnach OECD maidir le dúshláin chánach a eascraíonn as digiteáil an gheilleagair agus mhalartaigh siad tuairimí ar an mbealach ar aghaidh sa réimse sin sna míonna amach romhainn.

Is léir ón bplé go bhfuil tacaíocht ann don bhealach ar aghaidh atá molta ag na Uachtaránacht agus leanfar den obair, ar an mbonn sin, i gcomhlachtaí ullmhúcháin na Comhairle. Leag na hairí béim freisin ar an ngá lena chinntiú go mbeidh na réitigh éagsúla ar an leibhéal idirnáisiúnta ag teacht le dlí an Aontais agus go ndéanfar anailís chríochnúil ar an tionchar a bheidh acu.

Tá dhá shruth oibre i gceist le forbairt leanúnach OECD:

• I gcolún 1, déantar iniúchadh ar na rialacha a bhaineann le hathdháileadh brabús ó ghnólachtaí digitithe trí rialacha nua a chinneadh maidir le cén áit ar cheart cáin a íoc agus cén cion den bhrabús ar cheart cáin a ghearradh air i ndlínse ar leith.
• I gcolún 2, déantar iniúchadh ar dhearadh córais chun a chinntiú go n-íocfaidh gnólachtaí, a bhíonn ag oibriú go hidirnáisiúnta, íosleibhéal cánach arb é is aidhm dó bonn cánach na dtíortha a chosaint ar chreimeadh an bhoinn agus ar aistriú brabúis.

Tá dlús curtha leis an obair in OECD le roinnt míonna anuas agus is é an aidhm atá ag OECD teacht ar chomhaontú polaitiúil maidir le struchtúr iomlán na n-athchóirithe faoi mhí Eanáir 2020 agus go mbeidh tuarascáil deiridh ann faoi dheireadh 2020.

• Nóta ón Uachtaránacht faoi staid na himeartha maidir le cánachas digiteach (28 Deireadh Fómhair 2019)

  Níl an acmhainn seo ar fáil faoi láthair ach amháin sa teanga (sna teangacha) seo a leanas:

  BG ES CS DA DE ET EL EN FR HR IT LV LT HU MT NL PL PT RO SK SL FI SV
• Cánachas digiteach (eolas cúlra)

Rialacha CBL

Tháinig an Chomhairle ar chomhaontú inniu maidir le dhá athchóiriú ar rialacha CBL.

Baineann an chéad athchóiriú le calaois chánach a bhrath in idirbhearta ríomhthráchtála trasteorann. Cuirfidh na rialacha nua ar chumas na mBallstát na taifid a chuireann soláthraithe seirbhísí íocaíochta ar fáil go leictreonach a bhailiú ar bhealach comhchuibhithe, amhail na bainc. Ina theannta sin, bunófar lárchóras leictreonach nua chun faisnéis íocaíochta a stóráil agus chun go ndéanfaidh oifigigh frith-chalaoise náisiúnta tuilleadh próiseála ar an bhfaisnéis sin.

• An ríomhthráchtáil: an Chomhairle tagtha ar chomhaontú sealadach maidir le rialacha nua i ndáil le sonraí íocaíochta CBL a mhalartú (preaseisiúint, 8 Samhain 2019)

Baineann an dara hathchóiriú le rialacha CBL is infheidhme maidir le gnólachtaí beaga. Leis na rialacha nua, laghdófar na hualaí riaracháin agus na costais chomhlíonta d'fhiontair bheaga agus beidh siad ina gcabhair chun timpeallacht fhioscach a chruthú, rud a chabhróidh le FBManna méadú agus trádáil trasteorann a dhéanamh.

• CBL: an Chomhairle tagtha ar chomhaontú sealadach maidir le rialacha simplithe le haghaidh gnólachtaí beaga (preaseisiúint, 8 Samhain 2019)

Dleachtanna máil

Tháinig an Chomhairle ar chomhaontú sealadach faoi bhearta chun feabhas a chur ar an timpeallacht ghnó do thrádáil earraí atá faoi réir dleachtanna máil trí na dálaí a fheabhsú a thuilleadh le haghaidh iomaíocht chóir agus an t-ualach riaracháin ar chuideachtaí a laghdú.

Tháinig an Chomhairle ar chomhaontú maidir leis na tograí seo a leanas:

• an treoir maidir le socruithe ginearálta do dhleacht mháil
• an treoir maidir le comhar riaracháin i ndáil le hábhar na gclár leictreonach

Is cánacha indíreacha iad dleachtanna máil ar dhíol nó ar úsáid táirgí ar leith, amhail tobac nó fuinneamh. Is í an tír dá n-íoctar na cánacha sin a fhaigheann an t-ioncam iomlán uathu. Ó 1992 i leith, tá rialacha comhchoiteanna i bhfeidhm i dtíortha an Aontais chun a chinntiú go gcuirtear dleachtanna máil i bhfeidhm ar an mbealach céanna agus ar na táirgí céanna ar fud an Aontais

• Dleacht mháil: an Chomhairle tagtha ar chomhaontú faoi chreat nuachóirithe le haghaidh táirgí faoi réir dleacht mháil (preaseisiúint, 8 Samhain 2019)

Anuas air sin, tá an Chomhairle tar éis teacht ar chur chuige ginearálta, gan phlé, maidir le díolúine ó CBL agus ó dhleacht mháil i dtaca leis an iarracht cosanta faoi chuimsiú chreat an Aontais.

• Téacs chur chuige ginearálta na Comhairle maidir le dleacht mháil don chosaint (24 Deireadh Fómhair 2019)

  Níl an acmhainn seo ar fáil faoi láthair ach amháin sa teanga (sna teangacha) seo a leanas:

  BG ES CS DA DE ET EL EN FR HR IT LV LT HU MT NL PL PT RO SK SL FI SV

Phléigh na hairí freisin athchóiriú a dhéanamh ar struchtúir na dleachta máil ar alcól agus ar dheochanna alcólacha. Cé go ndearnadh dul chun cinn suntasach le linn na caibidlíochta, níor tháinig na hairí ar chomhaontú maidir leis an téacs sin. Leanfaidh an Chomhairle de bheith ag obair ar an leibhéal teicniúil d'fhonn teacht ar chomhréiteach a bheidh inghlactha ag na Ballstáit go léir i mí na Nollag.

• Dleacht mháil: an Chomhairle tagtha ar chomhaontú faoi chreat nuachóirithe le haghaidh táirgí faoi réir dleacht mháil (preaseisiúint, 8 Samhain 2019)

Comhalta nua bhord feidhmiúcháin BCE a ainmniú

D'eisigh an Chomhairle moladh chuig an gComhairle Eorpach maidir le hainmniúchán Isabel Schnabel, ar ollamh í in Ollscoil Bonn faoi láthair agus ar comhalta í de Chomhairle Saineolaithe Eacnamaíochta na Gearmáine, mar iarrthóir chun teacht i gcomharbacht ar Sabine Lautenschläger ar bhord feidhmiúcháin an Bhainc Ceannais Eorpaigh.

Táthar ag súil go ndéanfaidh an Chomhairle Eorpach cinneadh foirmiúil maidir leis an gceapachán faoi dheireadh na bliana, tar éis dul i gcomhairle le Parlaimint na hEorpa agus le comhairle rialaithe BCE.

• Bord feidhmiúcháin BCE: A thacaíocht d'aontoil tugtha ag an nGrúpa Euro d’iarrthóireacht Isabel Schnabel, (preaseisiúint an Ghrúpa Euro, 7 Samhain 2019))
• Ceapachán bhord feidhmiúcháin BCE – grafaic faisnéise ón gComhairle

Criptea-airgeadra "stablecoin"

Chuir an Uachtaránacht na hairí ar an eolas faoi dhréachtráiteas comhpháirteach ón gComhairle agus ón gCoimisiún maidir leis an gcriptea-airgeadra "stablecoin" a chomhaontófar ag cruinniú Ecofin i mí na Nollag.

• Dréachtráiteas comhpháirteach ón gComhairle agus ón gCoimisiún maidir leis an gcriptea-airgeadra "stablecoin" (6 Samhain 2019)

  Níl an acmhainn seo ar fáil faoi láthair ach amháin sa teanga (sna teangacha) seo a leanas:

  EN

Díospóireacht chomhpháirteach ag na hairí oideachais agus oiliúna

Bunaithe ar phlépháipéar uachtaránachta, bhí díospóireacht phoiblí ag airí airgeadais agus oideachais ar an ábhar seo a leanas: 'Bonn láidir eacnamaíoch don Eoraip: an éifeachtacht, an éifeachtúlacht agus an cháilíocht a shaothrú san oideachas agus san oiliúint'. Ba é sin an chéad deis a bhí ag na hairí airgeadais agus oideachais tuairimí a mhalartú maidir le tábhacht an chaipitil dhaonna mar bhonn d'fholláine na hEorpa. Leagadh béim sa phlé ar uaillmhian na Comhairle Eorpaí dlús a chur leis an infheistíocht i scileanna agus oideachas na ndaoine.

• Plépháipéar ón Uachtaránacht "Bunús láidir eacnamaíoch don Eoraip" (25 Deireadh Fómhair 2019)

Le haghaidh tuilleadh faisnéise, féach leathanach cruinnithe na Comhairle Oideachais.

• An Chomhairle Oideachais, Óige, Cultúir agus Spóirt (Oideachas), 8 Samhain 2019

Ina theannta sin, ghlac na hairí conclúidí ón gComhairle maidir le staidreamh an Aontais, chuir an Bord Fioscach Eorpach a thuarascáil bhliantúil don bhliain 2019 faoina mbráid agus cuireadh ar an eolas iad maidir leis na cruinnithe idirnáisiúnta is déanaí (cruinniú airgeadais G20 an 14-20 Deireadh Fómhair agus cruinnithe bliantúla an Chiste Airgeadaíochta Idirnáisiúnta in Washington DC).