Poblacht Dhaonlathach an Chongó: Athnuachan déanta ag an Aontas ar bhearta sriantacha agus ochtar curtha le liosta na ndaoine atá faoi réir na mbeart sriantach sin

Chinn an Chomhairle ochtar a chur le liosta na ndaoine atá faoi réir bearta sriantacha i bhfianaise na staide i bPoblacht Dhaonlathach an Chongó (PDC). Rinneadh na bearta sriantacha atá ann cheana a athnuachan go ceann bliana.

Ar an ochtar a liostaítear tá cúigear comhaltaí de ghrúpaí armtha éagsúla (M23, ADF, CODECO, FDLR agus Mai-Mai Yakatumba), chomh maith le comhalta d’arm an Chongó, polaiteoir ón gCongó agus fear gnó Beilgeach. Tá a bhformhór freagrach as sáruithe agus mí-úsáidí tromchúiseacha ar chearta an duine agus as an gcoinbhleacht armtha a chothú i bPoblacht Dhaonlathach an Chongó. Liostaíodh daoine eile as foréigean a ghríosú agus as leas a bhaint as an gcoinbhleacht trí dhúshaothrú nó trádáil aindleathach acmhainní nádúrtha.

San iomlán, tá 17 nduine aonair faoi réir bearta sriantacha de chuid an Aontais, bearta a rinneadh a athnuachan le déanaí go dtí an 12 Nollaig 2023 agus a bhfuil toirmeasc taistil agus reo sócmhainní i gceist leo. Anuas air sin, níl cead ag saoránaigh ná ag cuideachtaí de chuid an Aontais cistí a chur ar fáil dóibh siúd atá ar an liosta.

Rinneadh an cinneadh seo i gcomhthéacs cur chuige comhtháite ón Aontas chun tacú leis na hiarrachtaí atá á ndéanamh ag údaráis Phoblacht Dhaonlathach an Chongó oirthear na tíre a chobhsú. Léiríonn sé rannpháirtíocht ghníomhach an Aontais i réigiún na Mór-Lochanna, d’fhonn rannchuidiú le haghaidh a thabhairt ar bhunchúiseanna na neamhshláine agus deiseanna a dhéanamh díobh do na tíortha sa réigiún agus dá bpobail.

Leanfaidh an Chomhairle de dhlúthfhaireachán a dhéanamh ar an staid sa tír, agus féadfaidh sí bearta sriantacha breise a mheas i bhfianaise forbairtí.

Foilsíodh na gníomhartha dlí ábhartha, ina bhfuil ainmneacha na ndaoine aonair atá liostaithe, in Iris Oifigiúil an Aontais.

Cúlra

Is in 2016 a ghlac an Chomhairle smachtbhannaí aonair uathrialacha den chéad uair i bhfianaise na staide in PDC agus mar fhreagairt, go háirithe, ar sháruithe ar chearta an duine agus ar bhacainní a cuireadh ar an bpróiseas toghchánaíochta.

An 5 Nollaig 2022, chinn an Chomhairle na critéir ainmniúcháin i gCinneadh 2010/788/CBES a leasú chun go bhféadfaí bearta sriantacha aonair a chur i bhfeidhm i gcoinne daoine nádúrtha nó dlítheanacha, eintitis nó comhlachtaí a chothaíonn an choinbhleacht armtha, an éagobhsaíocht nó an neamhshlándáil i bPoblacht Dhaonlathach an Chongó, a thacaíonn leis an méid sin nó a thairbhíonn de, chomh maith leo siúd atá freagrach as foréigean a ghríosú, nó as an gcoinbhleacht armtha, an éagobhsaíocht agus an neamhshlándáil a dhúshaothrú i bPoblacht Dhaonlathach an Chongó, lena n-áirítear trí dhúshaothrú agus trádáil aindleathach acmhainní nádúrtha.

• Cinneadh cur chun feidhme agus rialachán ón gComhairle a bhaineann le bearta sriantacha i bhfianaise na staide i bPoblacht Dhaonlathach an Chongó, Iris Oifigiúil an Aontais Eorpaigh (lena n-áirítear liosta de dhaoine aonair atá faoi smachtbhannaí)
• Poblacht Dhaonlathach an Chongó: síneadh bliana curtha ag an gComhairle leis na smachtbhannaí reatha i gcoinne deichniúir (preaseisiúint, an 9 Nollaig 2021)