ConSIMium: esperjenza ta' simulazzjoni ta' Kunsill

Esperjenza diretta tal-Kunsill

Studenti universitarji mill-Ewropa kollha għandhom l-opportunità li jieħdu sehem f'ConSIMium, esperjenza ta' simulazzjoni ta' Kunsill.

Darba fis-sena, 27 tim nazzjonali mill-istati membri kollha jiġu Brussell lesti biex jaqdu r-rwoli tagħhom bħala:

• mexxejja tal-UE
• ambaxxaturi
• esperti nazzjonali
• ministri
• ġurnalisti

Għal jumejn, timijiet ta' sitt studenti jissimulaw żewġ laqgħat tal-Kunsill Ewropew u serje ta' laqgħat f'kull livell tal-Kunsill tal-UE dwar suġġetti ta' ġrajjiet kurrenti. Pereżempju, fl-2025 is-suġġetti kienu l-industrija tad-difiża tal-UE, l-akkwist konġunt u l-materja prima kritika, filwaqt li fl-2026 it-timijiet iddiskutew il-kummerċ internazzjonali.

Id-delegazzjonijiet jieħdu sehem f'diversi laqgħat ta' tħejjija ta' esperti nazzjonali (gruppi ta' ħidma) u ta' ambaxxaturi (Coreper - Kumitat tar-Rappreżentanti Permanenti) qabel is-simulazzjoni ta' laqgħa ministerjali, fejn jippruvaw jilħqu kompromess.

Aqra x'jgħidu l-parteċipanti dwar ConSIMium

Din kienet l-ewwel darba li qatt kont f'kamra fejn kien rappreżentat kull stat membru tal-UE. L-atmosfera tant kienet interessanti u tant intensa – kienet esperjenza realistika ħafna.

Clara Binderlehner (l-Awstrija)

Li tara dawn iż-żgħażagħ kollha minn madwar l-UE jiltaqgħu għal ConSIMium iġegħelni nirrealizza li mhux jien biss nemmen fil-kooperazzjoni tal-UE, u li ta' min niġġieled għaliha.

Eva Parodi (l-Italja)

Qabel bdejna s-simulazzjoni, iltqajna mal-ambaxxatur Pollakk tagħna, li tana xi eżempji u pariri mill-ħajja reali dwar kif iseħħu n-negozjati fil-Kunsill. Dan, flimkien ma' ConSIMium, tani ħarsa ġenerali tajba ħafna ta' kif taħdem l-UE.

Filip Szymański (il-Polonja)

Kelli l-opportunità li npoġġi t-teorija fil-prattika, u li nara l-Kunsill reali wara l-kwinti. Opportunità kbira biex niżviluppa l-ħiliet tiegħi ta' negozjar u kooperazzjoni!

Tin Krstačić (il-Kroazja)

ConSIMium hija opportunità kbira biex titgħallem dwar l-UE, b'materjal ta' taħriġ eċċellenti.

Alexandros Kitsikoudis Alexoudis (il-Lussemburgu)

ConSIMium ipprovdielna ħarsa lejn l-UE u d-diplomazija ta' kuljum, u ppermettielna npoġġu fil-prattika dak li qed nitgħallmu fl-università.

Ema Kristina Šprljan (Malta)

Ħu idea ta' ConSIMium

Kif tħossok meta tieħu r-rwol tar-rappreżentanti nazzjonali u tieħu deċiżjonijiet għall-UE kollha? Isma' direttament lill-parteċipanti tal-edizzjoni tal-2024.