Baġit tal-UE għall-2016: Il-Kunsill jaqbel dwar il-pożizzjoni tiegħu

Fid-9 ta’ Lulju 2015, il-Kumitat tar-Rappreżentanti Permanenti tal-Kunsill qabel dwar il-pożizzjoni tiegħu dwar l-abbozz ta’ baġit tal-UE għall-2016, abbażi ta’ test ta’ kompromess tal-presidenza tal-Lussemburgu. 

Prijoritajiet tal-Kunsill

Il-Kunsill appoġġa l-fondi proposti mill-Kummissjoni għal għadd ta’ oqsma ta’ prijorità. Dawn jinkludu l-Fond Ewropew għal Investimenti Strateġiċi (EFSI) immirati biex jagħtu spinta lill-ekonomija, miżuri biex jiġu ġestiti l-flussi migratorji, l-għajnuna umanitarja u Erasmus. Il-pożizzjoni tal-Kunsill tirrifletti wkoll il-pjan ta’ pagament maqbul mal-Parlament Ewropew f’Mejju 2015 biex jintemmu gradwalment it-talbiet ta’ pagament pendenti għall-programmi ta’ koeżjoni 2007-2013.

"Ninsab fiduċjuż li l-pożizzjoni tal-Kunsill dwar l-abbozz ta’ baġit tal-UE għall-2016 tipprovdi riżorsi adegwati għall-mobilizzazzjoni ta' investimenti produttivi, biex tingħata spinta lit-tkabbir u lill-impjiegi u biex twieġeb għall-bżonnijiet politikament l-aktar urġenti bħall-ġestjoni migratorja. Fl-ekonomija tal-lum huwa ta’ importanza kbira li ċ-ċittadini jiksbu valur għal flushom u li r-riżorsi tal-UE jintużaw b'mod mirqum u responsabbli. Għalhekk nemmen li l-ftehim politiku tal-Kunsill joħloq bilanċ tajjeb bejn il-konsolidazzjoni fiskali u l-investimenti strateġiċi li l-Ewropa teħtieġ biex jittaffew l-effetti negattivi tas-sitwazzjoni ekonomika u soċjali attwali", qale Pierre Gramegna, ministru għall-finanzi tal-Lussemburgu u President tal-Kunsill. 

Iż-żamma ta’ marġini 

Minħabba l-bosta sfidi li qed tiffaċċja l-UE fl-ambjent politiku u ekonomiku attwali, il-Kunsill iqis li jkun għaqli li jinżamm marġini finanzjarju suffiċjenti. Għalhekk tħallew marġini adegwati taħt il-limiti massimi tal-qafas finanzjarju pluriennali (QFP) biex l-UE tkun tista' tirreaġixxi f'każ ta' sitwazzjonijiet mhux previsti. Fuq il-bażi taċ-ċifri għall-eżekuzzjoni tal-baġit f’dawn l-aħħar snin u filwaqt li jiġu stabbiliti kapaċitajiet realistiċi ta’ assorbiment għall-futur, il-Kunsill jemmen li €153.27 biljun f’impenji u €142.12 biljun f’pagamenti se jippermettu lill-UE biex fl-2016 tilħaq l-għanijiet tal-politika tagħha. Dan huwa €563.6 miljun f’impenji u €1.4 biljun f’pagamenti anqas minn dak li pproponiet il-Kummissjoni. 

Rati ta’ tkabbir għolja għall-politika esterna, il-migrazzjoni u l-kompetittività 

Il-pożizzjoni tal-Kunsill tipprevedi għal tnaqqis f’impenji totali ta’ 5.36% u żieda f’pagamenti totali ta’ 0.59%  meta mqabbel mal-baġit tal-UE għall-2015 kif emendat bil-baġits emendatorji numri 1 sa 5. Impenji ta’ €16.5 biljun ġew miżjuda reċentement għall-baġit tal-2015 bħala salvagwardja għall-approprjazzjonijiet li baqgħu ma ntużawx fl-2014 minħabba l-adozzjoni tard ta’ ċerti programmi tal-QFP. Fir-rigward tal-pagamenti, il-pożizzjoni tal-Kunsill toffri rati ta’ tkabbir b’żewġ ċifri għal azzjonijiet tal-politika esterna (+22.5 %)u għal miżuri relatati mas-sigurtà u ċ-ċittadinanza, bħall-migrazzjoni (+15.4%). Ir-riċerka u miżuri oħra mmirati sabiex tiżdied il-kompetittività jibbenefikaw minn żieda ta’ 8.6% 

Sommarju tal-abbozz tal-pożizzjoni tal-Kunsill jinsab fit-tabella hawn taħt: 

Il-passi li jmiss

Il-Kunsill huwa mistenni jadotta formalment il-pożizzjoni tiegħu permezz ta’ proċedura bil-miktub fil-bidu ta’ Settembru. Din se sservi bħala mandat għall-Presidenza tal-Lussemburgu biex tinnegozja l-baġit tal-UE tal-2016 mal-Parlament Ewropew.

• Pożizzjoni tal-Kunsill dwar l-abbozz ta' baġit tal-UE għall-2016
• Baġits emendatorji tal-UE għall-2015
• Il-baġit tal-UE għall-2016