Stqarrija konġunta tal-kapijiet ta' stat jew ta' gvern tal-UE u l-mexxejja tal-istituzzjonijiet tal-UE dwar l-attakki terroristiċi fi Brussell

L-Unjoni Ewropea tibki lill-vittmi tal-attakki terroristiċi tal-lum fi Brussell. Kien attakk fuq is-soċjetà miftuħa demokratika tagħna.  

L-istituzzjonijiet komuni Ewropej tagħna huma ospitati fi Brussell, grazzi għall-ġenerożità tal-gvern tal-Belġju u tal-poplu Belġjan. L-Unjoni Ewropea u l-Istati Membri tagħha jinsabu spalla ma' spalla mal-Belġju b’solidarjetà u huma determinati li jiffaċċjaw din it-theddida flimkien bil-mezzi kollha neċessarji.

Dan l-aħħar attakk iservi biss biex isaħħaħ ir-rieda tagħna li niddefendu l-valuri u t-tolleranza Ewropej mill-attakki tal-intolleranti. Ser inkunu magħquda u sodi fil-ġlieda kontra l-mibegħda, l-estremiżmu vjolenti u t-terroriżmu.