"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
UE-Mercosur: il-President Costa ser jivvjaġġa lejn il-Brażil u l-Paragwaj
Il-President tal-Kunsill Ewropew, António Costa, flimkien mal-President tal-Kummissjoni Ewropea, Ursula von der Leyen, ser jattendu ċ-ċerimonja tal-iffirmar tal-ftehim bejn l-UE u l-Mercosur f'Asunción, il-Paragwaj fis-17 ta' Jannar 2026. Qabel iċ-ċerimonja, fis-16 ta' Jannar, il-President Costa u l-President von der Leyen ser iżuru Rio de Janeiro biex jiltaqgħu mal-President Lula tal-Brażil.
Iffirmar tal-ftehim UE-Mercosur
Wara 25 sena ta' negozjati, nhar is-Sibt 17 ta' Jannar ser jiġu ffirmati l-ftehimiet bejn l-Unjoni Ewropea u l-Mercosur f'Asunción, il-Paragwaj, bil-parteċipazzjoni tal-President Costa u l-President von der Leyen. Dan il-pass isegwi l-adozzjoni mill-Kunsill fid-9 ta' Jannar ta' żewġ deċiżjonijiet li jawtorizzaw l-iffirmar tal-Ftehim ta' Sħubija bejn l-UE u l-Mercosur (EMPA) u tal-Ftehim Kummerċjali Interim (iTA) bejn iż-żewġ naħat. Dan huwa pass importanti fir-relazzjoni fit-tul tal-UE mas-sħab tal-Mercosur – l-Arġentina, il-Brażil, il-Paragwaj, u l-Urugwaj – li jirrifletti l-impenn tal-Unjoni Ewropea li tibni sħubijiet madwar id-dinja biex tiddiversifika l-kummerċ u tafferma mill-ġdid ordni multilaterali bbażat fuq ir-regoli.
L-approvazzjoni tal-Ftehim bejn l-Unjoni Ewropea u l-Mercosur, li joħloq l-akbar żona ta' kummerċ ħieles fid-dinja, hija aħbar eċċellenti għaż-żewġ naħat tal-Atlantiku.
Dan ser iġib benefiċċji reali għaċ-ċittadini u n-negozji Ewropej, jagħti spinta lis-sovranità u l-awtonomija strateġika tal-UE, u jsawwar l-ekonomija globali skont il-valuri kondiviżi tagħna.
Huwa ser isaħħaħ id-drittijiet tal-ħaddiema, il-protezzjoni ambjentali, u s-salvagwardji għall-bdiewa Ewropej, filwaqt li juri li s-sħubijiet kummerċjali bbażati fuq ir-regoli huma ta' benefiċċju għal kulħadd.
Aktar minn 700 miljun persuna ser jibbenefikaw mill-Ftehim bejn l-UE u l-Mercosur. L-Ewropa hija miftuħa għan-negozju, u qed tibni pontijiet lejn prosperità kondiviża mas-sħab globali tagħna.
António Costa, President tal-Kunsill Ewropew
Żjara uffiċjali fil-Brażil
Qabel iċ-ċerimonja tal-iffirmar tal-ftehimiet bejn l-UE u l-Mercosur f'Asunción, il-President Costa, flimkien mal-President von der Leyen ser iżuru l-Brażil għal laqgħa trilaterali mal-President Inácio Lula da Silva f'Rio de Janeiro. Il-Brażil huwa sieħeb ewlieni għall-Unjoni Ewropea fil-qasam tal-kummerċ, l-investiment, il-klima, il-multilateraliżmu, l-ordni bbażat fuq ir-regoli, id-demokrazija, u d-drittijiet tal-bniedem. L-aħħar presidenza Brażiljana tal-Mercosur kienet kruċjali biex jitmexxew 'il quddiem in-negozjati għall-ftehim bejn l-Unjoni Ewropea u l-Mercosur, u b'hekk twittiet it-triq għall-iffirmar tiegħu aktar tard din il-ġimgħa fil-Paragwaj. Din iż-żjara uffiċjali ser issaħħaħ din l-alleanza b'saħħitha u ser tkompli ssaħħaħ ir-relazzjoni bilaterali.
Opportunitajiet għall-istampa fil-Brażil u l-Paragwaj
Wara l-laqgħa trilaterali fil-Brażil bejn il-President Costa, il-President von der Leyen, u l-President Lula, il-mexxejja ser jagħmlu dikjarazzjonijiet għall-istampa għall-ħabta tas-13.30 ħin lokali [17.30 CET], segwiti minn ritratt tal-grupp ippjanat għas-13.55 [17.55 CET]. L-avveniment ser jixxandar dirett fuq il-media soċjali u l-EBS.
Iċ-ċerimonja tal-iffirmar f'Asunción, il-Paragwaj, ser tibda fis-13.00 ħin lokali [17.00 CET] nhar is-Sibt, 17 ta' Jannar 2026. Din ser tkun segwita minn ritratt tal-grupp għall-ħabta tas-14.00 [18.00 CET] u konferenza stampa għall-ħabta tas-14.20 [18.20 CET]. L-avveniment ser jixxandar dirett fuq l-EBS.
Informazzjoni ġenerali
Il-ftehimiet ser jistabbilixxu qafas għal djalogu politiku, kooperazzjoni u relazzjonijiet kummerċjali fi sħubija modernizzata u komprensiva. Il-ftehimiet ser jeħtieġu l-approvazzjoni tal-Parlament Ewropew qabel ma jkunu jistgħu jiġu konklużi formalment mill-Kunsill. Ir-ratifika mill-istati membri kollha tal-UE ser tkun meħtieġa wkoll biex l-EMPA jidħol fis-seħħ.
Il-Brażil ilu sieħeb strateġiku tal-UE mill-2007. L-UE hija t-tieni l-akbar sieħeb kummerċjali tal-Brażil u l-akbar investitur barrani tiegħu, b'aktar minn €300 biljun fi stokks ta' investiment dirett. Minn meta l-President Lula ħa l-kariga fl-2023, ir-rabtiet bejn l-UE u l-Brażil kisbu dinamiżmu ġdid, kemm bi djalogi politiċi u settorjali mġedda kif ukoll ġodda dwar il-klima, l-enerġija, it-trasformazzjoni diġitali, is-sigurtà, u s-saħħa pubblika. Il-konklużjoni tan-negozjati tal-Ftehim bejn l-UE u l-Mercosur tat aktar impetu lir-relazzjoni. L-UE u l-Brażil jikkooperaw ukoll mill-qrib fin-NU u l-G20, fil-qafas tas-summit UE-CELAC, u permezz ta' inizjattivi ġodda bħall-Alleanza Globali Kontra l-Ġuħ u l-Faqar u l-koalizzjoni tal-G20 għall-produzzjoni reġjonali tal-vaċċini.
Il-President Costa reċentement iltaqa' mal-President Lula f'Novembru 2025 fil-marġini tal-COP30 fil-Brażil, u fis-summit UE-CELAC fil-Kolombja.
