Kummerċ UE-Mercosur: fatti u ċifri
Ir-relazzjoni kummerċjali bejn l-Unjoni Ewropea u l-Mercosur tgħaqqad aktar minn 700 miljun konsumatur madwar l-Ewropa u l-Amerka t'Isfel. L-UE bħalissa qed taħdem fuq l-adozzjoni tal-ftehim kummerċjali bejn l-UE u l-Mercosur.
X'inhu l-Mercosur?
Il-Mercosur huwa s-Suq Komuni tan-Nofsinhar – blokk kummerċjali tal-Amerka t'Isfel stabbilit fl-1991. Il-membri tiegħu huma l-Arġentina, il-Brażil, il-Paragwaj u l-Urugwaj. Il-Venezwela ngħaqdet fl-2012 iżda s-sħubija tagħha ġiet sospiża fl-2017. F'Diċembru 2012 ġie ffirmat il-Protokoll ta' Adeżjoni tal-Bolivja mal-Mercosur. Dan il-protokoll għad irid jiġi ratifikat mill-parlamenti tal-pajjiżi tal-Mercosur.
Flimkien, il-pajjiżi tal-Mercosur jiffurmaw is-sitt l-akbar ekonomija tad-dinja b'popolazzjoni totali ta' 270 miljun ruħ.
L-istatistika kollha tal-Mercosur ta' hawn taħt tirreferi għall-erba' pajjiżi sħaħ tal-Mercosur: l-Arġentina, il-Brażil, il-Paragwaj u l-Urugwaj.
Kummerċ tal-merkanzija
L-UE hija t-tieni l-akbar sieħba tal-Mercosur fil-kummerċ tal-merkanzija, u fl-2024 kienet tkopri kważi 17% tal-kummerċ totali tal-Mercosur. Il-Mercosur huwa l-għaxar l-akbar sieħeb tal-UE fil-kummerċ tal-merkanzija.
Fl-2024, il-kummerċ tal-UE mal-Mercosur kellu valur ta' aktar minn €111 biljun: €55.2 biljun f'esportazzjonijiet u €56 biljun f'importazzjonijiet. Aktar minn 80% tal-fluss kummerċjali kien bejn l-UE u l-Brażil.
Bejn l-2014 u l-2024, il-kummerċ tal-merkanzija bejn l-UE u l-Mercosur kiber b'aktar minn 36%: l-importazzjonijiet żdiedu b'aktar minn 50%, filwaqt li l-esportazzjonijiet żdiedu b'25%.
€56 biljun f'importazzjonijiet mill-Mercosur
€55.2 biljun f'esportazzjonijiet lejn il-Mercosur
Prodotti ewlenin li l-UE tesporta lejn il-Mercosur
makkinarju u apparat
sustanzi kimiċi u prodotti farmaċewtiċi
tagħmir għat-trasport
Prodotti ewlenin li l-UE timporta mill-Mercosur
prodotti agrikoli
prodotti minerali
polpa u karta
Kummerċ fis-servizzi
Fl-2023 (l-aktar sena reċenti li għaliha hemm data disponibbli) il-kummerċ fis-servizzi bejn l-UE u l-Mercosur kellu valur ta' aktar minn €42 biljun. L-UE esportat aktar minn €29 biljun f'servizzi lill-Mercosur filwaqt li l-Mercosur esporta madwar €13.4 biljun f'servizzi lejn l-UE.
€13.4 biljun f'importazzjonijiet mill-Mercosur
€29.2 biljun f'esportazzjonijiet lejn il-Mercosur
Ftehim kummerċjali UE-Mercosur
F'Diċembru 2024, l-UE laħqet ftehim politiku mal-erba' membri fundaturi tal-Mercosur: l-Arġentina, il-Brażil, il-Paragwaj u l-Urugwaj.
F'Settembru 2025, il-Kummissjoni Ewropea adottat proposti għal deċiżjonijiet tal-Kunsill dwar l-iffirmar u l-konklużjoni ta' żewġ strumenti legali paralleli: il-ftehim ta' sħubija bejn l-UE u l-Mercosur (EMPA) u l-ftehim kummerċjali interim (iTA). L-iTA ser jiskadi meta l-EMPA jiġi ratifikat bis-sħiħ mill-istati membri u jidħol fis-seħħ.
Fid-9 ta' Jannar 2026, il-Kunsill ta l-approvazzjoni tiegħu biex jiġu ffirmati l-ftehimiet. Issa l-ftehimiet ser jeħtieġu l-approvazzjoni tal-Parlament Ewropew qabel ma jkunu jistgħu jiġu konklużi formalment mill-Kunsill.
L-iTA qed jiġi applikat b'mod proviżorju mill-1 ta' Mejju 2026, u tneħħew t-tariffi fuq ċerti prodotti mill-ewwel jum, b'hekk jinħolqu regoli prevedibbli għall-kummerċ u l-investiment.
Spjegazzjoni tal-ftehimiet bejn l-UE u l-Mercosur
Investimenti diretti barranin
L-UE hija l-akbar investitur fil-pajjiżi tal-Mercosur bi stokk ta' investiment ta' madwar €390 biljun fl-2023. Minkejja dan, kemm l-esportaturi kif ukoll l-investituri potenzjali jiffaċċaw ostakli fis-swieq tal-Mercosur.
Wieħed mill-għanijiet tal-ftehim bejn l-UE u l-Mercosur huwa li jinħolqu regoli aktar stabbli u prevedibbli għall-kummerċ u l-investiment, permezz ta' regoli aħjar u aktar b'saħħithom, pereżempju fil-qasam tad-drittijiet tal-proprjetà intellettwali (inkluż l-indikazzjonijiet ġeografiċi), l-istandards tas-sikurezza tal-ikel, il-kompetizzjoni u l-prattiki regolatorji tajbin.
L-aħħar reviżjoni: 6 ta' Mejju 2026