Trádáil idir an tAontas agus an Astráil: fíricí agus figiúirí

An comhaontú saorthrádála agus comhar polaitiúil idir an tAontas agus an Astráil

Tá comhar seanbhunaithe idir an tAontas agus an Astráil agus tá na luachanna agus na prionsabail bhunúsacha chéanna acu, mar atá an daonlathas, an smacht reachta, cearta an duine, dea-rialachas agus geilleagar margadhbhunaithe. Ó 2022 i leith, is é an creat-chomhaontú polaitiúil is bun leis an gcaidreamh idir an tAontas agus an Astráil, lena ndoimhnítear an comhar maidir leis an mbeartas eachtrach, an trádáil, an fhorbairt inbhuanaithe, an t-athrú aeráide agus taighde.

A mhéid a bhaineann leis na naisc trádála idir an dá chomhpháirtí, tá bailchríoch á cur faoi láthair ag an Aontas agus ag an Astráil ar an gcaibidlíocht maidir le comhaontú saorthrádála. Tá an chaibidlíocht i bhfeidhm ó bhí 2018 ann.

De réir na meastachán a rinne an Coimisiún Eorpach, nuair a chuirfear an comhaontú chun feidhme, d’fhéadfadh méadú thart ar aon trian teacht ar thrádáil earraí agus seirbhísí idir an dá chomhpháirtí.

Tá roinnt socruithe maidir le comhar eacnamaíoch agus trádála, cuir i gcás comhaontú um aitheantas frithpháirteach chun bacainní teicniúla ar thrádáil i dtáirgí tionsclaíocha a laghdú, i gcreat-chomhaontú polaitiúil 2022. Bunaítear leis freisin idirphlé trádála agus infheistíochta chun baint na mbacainní neamhtharaifí a éascú, an trédhearcacht a fheabhsú agus sreafaí déthaobhacha trádála agus infheistíochta a chur chun cinn. Ina theannta sin, áirítear, sa chomhaontú, forálacha maidir le comhar i ndáil le soláthar poiblí, rochtain chomhpháirtí amháin ar mhargadh an chomhpháirtí eile agus a mhalairt a fheabhsú agus dea-chleachtais maidir le creataí rialála a bhabhtáil.

An 28 Bealtaine 2024, shínigh an tAontas agus an Astráil meabhrán tuisceana lenar bunaíodh comhpháirtíocht straitéiseach i ndáil le mianraí inbhuanaithe criticiúla straitéiseacha.

An 18 Márta 2026, shínigh an tAontas agus an Astráil comhpháirtíocht slándála agus cosanta. Cuirfidh an chomhpháirtíocht borradh faoin gcomhar sna réimsí seo a leanas: tacaíocht don Úcráin, an tslándáil mhuirí, an tslándáil spáis, an chibearshlándáil, cur i gcoinne bagairtí hibrideacha, an fhrithsceimhlitheoireacht agus bainistiú géarchéime, agus réimsí eile nach iad.

• Comhpháirtíochtaí slándála agus cosanta