An Grúpa Euro, 27/01/2014, 27 Eanáir 2014

Tabhairt isteach rathúil an euro sa Laitvia

Chuir an Grúpa Euro fáilte roimh aire Airgeadais na Laitvia agus thréaslaigh sé an t-athrú rathúil go dtí an euro a rinneadh sa Laitvia leis.

Thug aire Airgeadais na Laitvia, Andris Vilks, faisnéis nuashonraithe d'Airí an Ghrúpa Euro maidir leis an bpróiseas mín um an athrú a cuireadh chun feidhme sa Laitvia amhail ón 1 Eanáir i mbliana.

Rinneadh dea-ullmhúchán don athrú roimh ré. Bhí boinn agus nótaí euro i seilbh léir mór Laitviach cheana féin agus iad ag druidim i dtreo dháta an athraithe. Bhí na bainc agus an earnáil mhiondíola réidh freisin. Bhí nótaí bainc euro á ndáileadh ag uathmheaisíní bainc go dea-moch Lá Caille agus d'oscail na bainc is mó brainsí ar mhaithe le seirbhísí airgid thirim a chur ar fáil. Athraíodh teirminéil chártaí na siopaí go dtí an euro in am ionas gurbh fhéidir tús a chur le gnó tar éis an bhriste don bhliain nua an 2 Eanáir.

Faoin am seo, tá deireadh rathúil curtha leis an tréimhse trasdula dhá sheachtain nuair a bhí an euro agus an lats i gcúrsaíocht ag an am céanna. Ón 15 Eanáir i leith ní féidir aon íocaíochtaí a dhéanamh ach leis an euro.

Dúirt Uachtarán an Ghrúpa Euro gur dea-chomhartha iad na forbairtí eacnamaíocha sa Laitvia agus thréaslaigh sé an próiseas mín um an athrú leis an Laitvia.

Athbhreithniú deiridh ar chlár na Spáinne tugtha chun críche go rathúil

Phléigh na hAirí freisin torthaí an cúigiú athbhreithniú ar chlár na hearnála airgeadais sa Spáinn, arb é an t-athbhreithniú deiridh é. Ba dhíol sásaimh dóibh gur tugadh an clár sin chun críche go rathúil, rud a bhí go héifeachtach maidir le haghaidh a thabhairt ar leochaileacht san earnáil airgeadais. Spreagadh údaráis na Spáinne leanúint den athchóiriú a chur ar aghaidh in earnálacha eile de bhreis ar earnáil na baincéireachta ionas go bhféadfar dul i ngleic go héifeachtach le dúshláin mhaicreacnamaíocha atá fós ann.

Is díol sásaimh do chomhpháirtithe na hÁise an claonadh dearfach eacnamaíoch san Eoraip

Chuir Uachtarán an Ghrúpa Euro a chomhghleacaithe ar an eolas i ndáil lena thuras go dtí an Áise. Mheas sé gur aithin comhpháirtithe na hÁise go raibh neart déanta ag an Eoraip maidir leis na dúshláin a bhí os a comhair amach a shárú agus go raibh feabhas tagtha ar mhuinín na n-infheisteoirí.

Tosaíochtaí an Ghrúpa Euro

Tosaíocht mhór a bheidh ag tíortha an Ghrúpa Euro le linn na míonna amach anseo is ea na hathchóirithe struchtúracha atá ag teastáil chun tacú leis an bhfás a chur chun cinn. Beidh sé díreach chomh tábhachtach céanna an tAontas Baincéireachta a thabhairt chun críche agus bailchríoch a chur ar an gcreat oibríochtúil le haghaidh ionstraim athchaipitlithe dhírigh an tSásra Cobhsaíochta Eorpaigh (SCE). Leanfar de dhlúthfhaireachán a dhéanamh ar chur chun feidhme clár leantach maidir le coigeartú sa Ghréig, sa Phortaingéil agus sa Chipir.

Tionólfar an chéad chruinniú eile den Ghrúpa Euro an 17 Feabhra.

• Grianghraif agus físeáin de chruinniú an Ghrúpa Euro an 27 Eanáir 2014