an Grúpa Euro, 10/03/2014, 10 Márta 2014

Tá cláir na Cipire agus na Portaingéile ag dul ar aghaidh ar bhealach comhordaithe

Rinne an Grúpa Euro grinnscrúdú ar dhul chun cinn na dtíortha atá rannpháirteach sa chlár agus ba dhíol sásaimh dó na forbairtí a rinneadh sa Chipir agus sa Phortaingéil. Mhol na hAirí go ndéanfadh na páirtithe go léir atá rannpháirteach an t-athbhreithniú leanúnach ar chlár na Gréige a chur i gcrích. 

Ba dhíol sásaimh do na hAirí gur dearbhaíodh go bhfuil clár na Cipire ag dul ar aghaidh ar bhealach comhordaithe. Rinneadh na réamhghníomhaíochtaí uile le haghaidh na chéad eisíocaíochta eile ón Sásra Cobhsaíochta Eorpach de €150 milliún a chur i gcrích. Tugadh moladh don Chipir as a buiséad a chur chun feidhme ar bhealach stuama, lenar cuidíodh le spriocanna fioscacha a chomhlíonadh gan stró in 2013.

Thíolaic an Coimisiún, an Banc Ceannais Eorpach (BCE) agus an Ciste Airgeadaíochta Idirnáisiúnta (CAI) a dtorthaí mar gheall ar chlár coigeartaithe na Portaingéile atá fós ag dul ar aghaidh ar bhealach comhordaithe freisin. D'fhormhuinigh na hAirí na torthaí agus thug siad dá n-aire na céimeanna is déanaí a ghlac an Phortaingéil chun rochtain a fháil ar an margadh an athuair. 

Thug an Coimisiún, BCE agus CAI an t-eolas is déanaí do na hAirí maidir lena misean athbhreithnithe leanúnach sa Ghréig. D'iarr an Grúpa Euro ar an nGréig agus ar na hinstitiúidí sin a seacht ndícheall a dhéanamh chun bailchríoch a chur ar an gcaibidlíocht go pras.

Pléadh torthaí na dtástálacha struis maoirseachta agus an athbhreithnithe ar cháilíocht sócmhainní ar na sé bhanc Ghréigeacha freisin. Tá an Grúpa Euro ag súil go gcuirfear isteach an caipiteal is gá. Ba cheart an caipiteal breise sin a bhailiú go háirithe ó infheisteoirí príobháideacha.

Dearbhaítear téarnamh an limistéir euro le réamhaisnéis geimhridh an Choimisiúin

Roinn an Grúpa Euro tuairimí ar a chéile maidir leis an staid eacnamaíoch agus bhain sé de thátal as go bhfuil an téarnamh sa limistéar euro á atreisiú agus go bhfuil muinín ag feabhsú, ach gur cosúil go leanfaidh an téarnamh de bheith mall agus leochaileach. 

Chuir na hAirí in iúl go bhfuil siad sásta faoi ghealltanais na Fraince agus na Slóivéine na bearta riachtanacha is gá a ghlacadh lena áirithiú go gcloífear go hiomlán leis na moltaí ón gCoimisiún d'fhonn a áirithiú go gceartófar a n-easnaimh iomarcacha go tráthúil.  

Thug na hAirí dá n-aire freisin na hathbhreithnithe cuimsitheacha a rinne an Coimisiún ar mhíchothromaíochtaí maicreacnamaíocha agus fillfidh siad ar an tsaincheist sin a luaithe is a bheidh measúnú déanta ar na bearta atá ceaptha chun dul i ngleic leis na míchothromaíochtaí sin.

Pléifidh an Grúpa Euro tuilleadh ionstraim athchaipitlithe dhírigh an tSásra Cobhsaíochta Eorpaigh a luaithe a bheidh bailchríoch curtha ar an gCiste Aonair Réitigh.

Fillfidh an Grúpa Euro ar an mbealach inar chuir na Ballstáit chun feidhme na gealltanais a rinneadh mar fhreagairt d'anailís an Choimisiúin ar a ndréacht-bhuiséid , ag cruinniú an Ghrúpa Euro an 22 Samhain 2013.  Déanfar an méid sin i gcomhthéacs níos leithne an tSeimeastair Eorpaigh.

Déanfaidh an Coimisiún agus an Grúpa Euro measúnú ar dhréacht-phleananna buiséadacha ón Ostair, ó Lucsamburg agus ón nGearmáin in Aibreán agus i mBealtaine.

Bhí rialtais nua á gcruthú ag na tíortha sin i bhFómhar na bliana 2013 nuair a rinneadh dréacht-bhuiséid eile a mheas.

Tionólfar an chéad chruinniú eile den Ghrúpa Euro an 1 Aibreán 2014.

• Grianghraif agus físeáin de chruinniú an Ghrúpa Euro, an 10 Márta 2014
• Réamhaisnéis eacnamaíoch an Gheimhridh 2014 ón gCoimisiún