An Grúpa Euro, 8 Samhain 2023

Na príomhthorthaí

Sa ghnáthfhormáid:

Forbairtí maicreacnamaíocha

Mar chuid d’fhaireachán rialta an Ghrúpa Euro ar fhorbairtí eacnamaíocha, chuir na hinstitiúidí a n-anailís ar fáil ar na forbairtí maicreacnamaíocha is déanaí, lena n-áirítear boilsciú, agus ar na himpleachtaí a d’fhéadfadh a bheith ann do chomhordú fioscach.

Ar an mbonn sin, rinne na hairí machnamh ar na príomhdhúshláin atá romhainn don ionchas maicreacnamaíoch agus buiséadach do 2024, agus iad ag ullmhú don phlé a bheidh ag an nGrúpa Euro ar na dréachtphleananna buiséadacha i mí na Nollag.

Iomaíochas an limistéir euro

Mar chuid de shruth oibre nua maidir le hiomaíochas an limistéir euro agus bunaithe ar nóta a d’ullmhaigh an Coimisiún Eorpach, bhí an chéad phlé ag an nGrúpa Euro inar díríodh ar staid na himeartha i dtaca le hiomaíochas an limistéir euro, ar na dúshláin agus ar na comhbhabhtálacha beartais is tábhachtaí amach anseo.

Ós rud é go ndéantar plé ar fud an Aontais Eorpaigh maidir leis an leibhéal iomaíochais atá againn laistigh den gheilleagar domhanda, an chaoi a bhfuil sé ag athrú, agus an méid is gá a dhéanamh, táim tiomanta a chinntiú go mbeidh guth ag an nGrúpa Euro agus ag na hairí airgeadais sa díospóireacht sin agus go ndéanfar a dtuairimí maidir leis an méid is gá dúinn a dhéanamh amach anseo dár ngeilleagair a chur in iúl go soiléir agus béim a leagan orthu.

Paschal Donohoe, Uachtarán an Ghrúpa Euro

• Teachtaireacht ón gCoimisiún maidir le hiomaíochas fadtéarmach an Aontais
• Iomaíochas an limistéir euro: staid na himeartha, dúshláin agus comhbhabhtálacha beartais (an Coimisiún Eorpach)

I bhformáid an aontais baincéireachta:

Nuashonrú ar an aontas baincéireachta

D’éist airí na dtíortha ar baill iad den aontas baincéireachta leis na tuarascálacha leathbhliantúla ó chathaoirligh an tSásra Aonair Maoirseachta agus an Bhoird Réitigh Aonair. Ansin, chuaigh siad i mbun plé ar shláinte an chórais baincéireachta agus ar an méid atá fós le déanamh chun athléimneacht ár gcórais a chaomhnú agus chun aghaidh a thabhairt ar na dúshláin atá romhainn.

D’aithníomar dea-shláinte ár gcórais baincéireachta agus airgeadais, rud a chruthaigh a athléimneacht in aghaidh roinnt suaití. Is toradh é sin ar an ngníomhaíocht chinntitheach a rinneadh ar an leibhéal Eorpach. Paschal Donohoe, Uachtarán an Ghrúpa Euro

• An t-aontas baincéireachta (eolas cúlra)
• Nóta tuairiscithe débhliantúil BRA chuig an nGrúpa Euro
• Forléargas i scríbhinn in oircheall an mhalartaithe tuairimí ag cathaoirleach Bhord Maoirseachta BCE leis an nGrúpa Euro an 8 Samhain 2023 (an Banc Ceannais Eorpach)

I bhformáid chuimsitheach:

Todhchaí mhargaí caipitil agus airgeadais na hEorpa

I bhfianaise an chur chuige a comhaontaíodh sa Ghrúpa Euro i bhformáid chuimsitheach i mí na Bealtaine, lean na hairí lena seisiún tuairimíochta le rannpháirtithe sa mhargadh maidir le todhchaí mhargaí caipitil agus airgeadais na hEorpa. Díríodh ar infheisteoirí institiúideacha, lena n-áirítear cistí infheistíochta Stáit agus cistí pinsin, agus ar rannpháirtíocht mhiondíola.

Tá a fhios againn go léir go bhfuil acmhainneacht ollmhór ann borradh a chur faoin infheistíocht mhiondíola agus institiúideach laistigh den Aontas Eorpach, agus tá tionscnaimh fhíorthábhachtacha ar bun cheana féin ag an gCoimisiún maidir leis sin. Is mian linn cur leis an obair sin agus féachaint ar conas is féidir linn í a thabhairt go dtí an chéad leibhéal eile. Paschal Donohoe, Uachtarán an Ghrúpa Euro

Phléigh an Grúpa Euro lena aíonna conas ranníocaíocht na n-infheisteoirí institiúideacha i margaí caipitil na hEorpa a neartú, agus béim ar leith acu ar straitéisí infheistíochta agus ar conas aghaidh a thabhairt ar ilroinnt mhargaí caipitil an Aontais.

• Todhchaí mhargaí caipitil agus airgeadais na hEorpa (eolas cúlra)
• An Grúpa Euro, an 15 Bealtaine 2023