Sonraí easnaimh i Valencia: Gearradh fíneáil ar an Spáinn as bréagtuairisciú

An 13 Iúil 2015, d'fhorchuir an Chomhairle fíneáil €18.93 milliún ar an Spáinn toisc cúbláil a rinneadh ar shonraí easnaimh i bPobal Féinrialaitheach Valencia (Comunidad Valenciana).

Baineann an fíneáil den chuid is mó le caiteachas sláinte gan a bheith á thaifeadadh agus leis an bprionsabal um fhabhrú gan a bheith á chomhlíonadh ag an oifig réigiúnach iniúchóireachta.

Tar éis imscrúdú a rinneadh faoi stiúir an Choimisiúin, fuarthas go raibh tromfhaillí in oifig réigiúnach iniúchóireachta Phobal Féinrialaithe Valencia. Mar thoradh ar an bhfaillí sin rinne an Spáinn tuairisciú mícheart ar a sonraí rialtais ghinearálta i mí an Mhárta 2012 chuig Eurostat, oifig staidrimh an Aontais Eorpaigh. Cuireadh stop leis an mí-thuairisciú sin in 2012.

Seo í an chéad uair ar gearradh fíneáil toisc cúbláil sonraí faoi Rialachán 1173/2011. Glacadh an Rialachán in 2011 mar chuid de neartú fhaireachas fioscach an Aontais.

Is ionchur sár-riachtanach iad sonraí maidir le heasnamh agus fiachas rialtais do chomhordú na mbeartas eacnamaíoch ar leibhéal an Aontais. Féadfaidh an Chomhairle, ag gníomhú di ar mholadh ón gCoimisiún, cinneadh a dhéanamh fíneáil a fhorchur ar Bhallstát sa limistéar euro d'fhonn faireachas buiséadach a fhorghníomhú. An aidhm atá leis sin ná stáit a dhíspreagadh ó fhaisnéis mícheart a thabhairt ar shonraí easnaimh agus fiachais, bíodh an fhaisnéis sin mícheart d’aonghnó nó mar gheall ar thromfhaillí.

Rinneadh an cinneadh ag cruinniú den Chomhairle Talmhaíochta agus Iascaigh, gan phlé.

• Cinneadh lena ndéantar fíneáil a fhorchur maidir le hionramháil sonraí i gComhphobal Uathrialach Valencia