Príomhthorthaí chruinniú na Comhairle Gnóthaí Eachtracha maidir leis an Libia

Conclúidí ón gComhairle

Ghlac an Chomhairle conclúidí maidir leis an Libia. Is díol sásaimh don Aontas é gur ceapadh Ghassan Salamé mar Ionadaí Speisialta Ard-Rúnaí na Náisiún Aontaithe, a mbeidh ról lárnach idirghabhála aige bunaithe ar Chomhaontú Polaitiúil na Libia.

Aithnítear sna conclúidí gur bagairt é an foréigean a tharla le déanaí ar chobhsaíocht na Libia. Creideann an tAontas nach aon réiteach ar ghéarchéim na Libia úsáid na láimhe láidre. Athdhearbhaíonn an Chomhairle a cuid tacaíochta láidir do Chomhaontú Polaitiúil na Libia, agus don Chomhairle Uachtaránachta agus don Rialtas Comhaontaithe Náisiúnta faoi stiúir Phríomh-Aire Sarraj Fayez, dhá údarás a bunaíodh faoi mar údaráis dhlisteanacha aonair rialtais na tíre. Iarrann an tAontas ar na grúpaí armtha uile staonadh ón bhforéigean, tabhairt faoin ndíshlógadh agus aitheantas a thabhairt do na húdaráis sin arb iad amháin a bhfuil sé de cheart acu faoi Chomhaontú Polaitiúil na Libia forsaí cosanta agus slándála na Libia a rialú.

• Léigh téacs iomlán na gconclúidí ón gComhairle maidir leis an Libia
• Caidreamh idir an tAontas agus an Libia (Bileog eolais)

Gníomhaíochtaí CBSC

Chomhaontaigh an Chomhairle freisin síneadh a chur le misean EUBAM na Libia go dtí an 31 Nollaig 2018. Faoi láthair tá EUBAM na Libia ag cabhrú agus ag obair le húdaráis na Libia i ndáil le bainistiú teorainneacha, le forghníomhú an dlí agus le ceartas coiriúil, agus béim ar leith ar dheisceart na Libia. Oibreoidh an misean freisin i ndáil leis an bpleanáil do mhisean sibhialta eile a d’fhéadfaí a sheoladh ar mhaithe le fothú acmhainní agus cúnamh géarchéime.

Leag an Chomhairle béim freisin ar a thábhachtaí atá Oibríocht Sophia. Is oibríocht chabhlaigh de chuid an Aontais í oibríocht EUNAVFOR MED Sophia a ceapadh le samhail ghnó na smuigléirí daoine agus na ngáinneálaithe ar dhaoine a chur ó mhaith i ndeisceart na Meánmhara Láir. Tá dhá chúraim bhreise ar an oibríocht freisin, eadhon oiliúint a chur ar Gharda Cósta agus ar Chabhlach na Libia agus rannchuidiú le cur chun feidhme thrádbhac arm na Náisiún Aontaithe.

• Suíomh gréasáin EUNAVFOR MED Oibríocht Sophia
• EUBAM na Libia

Smachtbhannaí

Chun samhail ghnó na smuigléirí agus gáinneálaithe daoine a shuaitheadh tuilleadh, thug an Chomhairle isteach srianta ar onnmhairiú agus soláthar báidíní inséidte agus innill transaim don Libia. Beidh bunús slí anois ag Ballstáit an Aontais Eorpaigh chun cosc a chur ar onnmhairiú nó ar sholáthar na n-earraí sin don Libia, áit ar dóchúla ná a mhalairt é go mbeadh siad á n-úsáid ag smuigléirí agus gáinneálaithe ar dhaoine. Beidh feidhm ag na srianta freisin maidir le báidíní agus mótair a chuirtear d’idirthuras tríd an Aontas Eorpach ar an mbealach chuig an Libia. Leis na srianta a glacadh inniu ní chuirfear cosc ar an hearraí sin a onnmhairiú nó a dhíol chun críocha úsáidí dlisteanacha i measc an daonra shibhialta, mar shampla le haghaidh iascairí, a mbeadh mótair ag teastáil dá gcuid bád b’fhéidir.

• Rialachán ón gComhairle an 17 Iúil 2017 maidir le bearta sriantacha i bhfianaise cúrsaí sa Libia
• Teacht ar réitigh i ndáil leis an mbrú imirce (cúlra faisnéise)