Ráiteas ón Ardionadaí thar ceann an Aontais Eorpaigh maidir le tíortha áirithe a bheith ag seasamh le bearta sriantacha i bhfianaise ghníomhaíochtaí na Rúise i ndíchobhsú staid na hÚcráine

An 23 Deireadh Fómhair 2025, ghlac an Chomhairle Cinneadh (CBES) 2025/2032 ón gComhairle¹.

Le Cinneadh (CBES) 2025/2032 ón gComhairle, forchuireadh srianta breise i bhfianaise ghníomhaíochtaí na Rúise i ndíchobhsú staid na hÚcráine, i measc nithe eile, lena gcuirtear srian ar ioncam fuinnimh na Rúise trí thoirmeasc a chur ar allmhairí gáis nádúrtha leachtaithe (GNL) ón Rúis, trí thoirmeasc iomlán a chur ar Rosneft agus Gazprom Neft maidir le hallmhairí ola agus gáis isteach san Aontas, agus tríd an toirmeasc ar allmhairiú athraithigh gáis peitriliam leachtaithe (GPL) a leathnú. Forchuireadh leis an gCinneadh freisin bearta sriantacha ar shoithí an scáthchabhlaigh chomh maith le toirmeasc ar idirbhearta i gcoinne oibreoirí a chumasaíonn sruthanna ioncaim fuinnimh na Rúise. Leathnaíodh freisin an toirmeasc ar idirbhearta ar bhainc bhreise sa Rúis agus ar bhainc tríú tír san Áise Láir, agus forchuireadh srianta nua ar chárta íocaíochta agus ar chóras mear-íocaíochta na Rúise (Mir agus SBP). Cuireadh toirmeasc freisin ar chriptea-airgeadra A5A7 a úsáid, agus tugadh isteach toirmisc ar sholáthar criptea-sheirbhísí agus seirbhísí teicneolaíochta airgeadais áirithe. Leis an gCinneadh, leathnaíodh srianta agus toirmisc ar onnmhairiú chun cur as do choimpléasc tionsclaíoch míleata na Rúise agus é a lagú a thuilleadh. Áiríodh sa Chinneadh freisin bearta lena ndírítear ar Chriosanna Eacnamaíocha Speisialta na Rúise, tugadh isteach toirmisc sheirbhíse lena gcuirtear bac ar rochtain na Rúise ar ardchumais dhigiteacha agus toirmeasc ar sheirbhísí ath-árachais. Ina dhiaidh sin, tugadh isteach leis an gCinneadh oibleagáid ar thaidhleoirí Rúiseacha a bhíonn ag taisteal ar fud an Aontais i dtíortha nach iad a dtír chreidiúnaithe iad an Ballstát lena mbaineann a chur ar an eolas roimh ré. Féadfaidh Ballstáit an Aontais ceanglas údarúcháin a fhorchur ar thaidhleoirí Rúiseacha ar mian leo taisteal chuig a gcríocha, bunaithe ar víosaí nó ar cheadanna cónaithe atá eisithe ag stát eile.

Tá an Albáin, an Bhoisnia agus an Heirseagaivéin, an Íoslainn, an Iorua, Lichtinstéin, Montainéagró, an Mhacadóin Thuaidh agus an Úcráin ag seasamh leis an gCinneadh sin ón gComhairle.

Áiritheoidh siad go mbeidh a mbeartais náisiúnta i gcomhréir leis an gCinneadh ón gComhairle.

Tá an gealltanas sin tugtha dá aire ag an Aontas Eorpach agus is díol sásaimh dó é.

¹ IO L, 2025/2032, 23.10.2025, ELI: http://data.europa.eu/eli/dec/2025/2032/oj