Ftehimiet tal-UE dwar il-viża ma' pajjiżi mhux tal-UE

Sistema ta' vjaġġar mingħajr viża

Bħalissa l-UE għandha sistema ta' vjaġġar mingħajr viża fis-seħħ ma' 60 pajjiż mhux tal-UE, żewġ reġjuni amministrattivi speċjali taċ-Ċina (Hong Kong u l-Macao) u żewġ awtoritajiet territorjali li mhumiex rikonoxxuti bħala stati minn tal-inqas stat membru wieħed tal-UE (it-Tajwan u l-Kosovo*).

Skont dan ir-reġim, iċ-ċittadini mhux tal-UE ta' dawk il-pajjiżi, ir-reġjuni u l-awtoritajiet territorjali eżentati mill-viża jistgħu jidħlu fiż-żona Schengen għal soġġorni qosra mingħajr ma jeħtieġu viża, soġġett għal kwalunkwe rekwiżit speċifiku ta' passaport applikabbli għan-nazzjonalità tagħhom.

L-UE għandha l-għan li tikseb reċiproċità sħiħa tal-viża, li sseħħ meta ċ-ċittadini tal-pajjiżi taż-żona Schengen ma jkollhomx bżonn viża biex iżuru pajjiżi li ċ-ċittadini tagħhom ukoll ma jkollhomx bżonn viża biex iżuru ż-żona Schengen. Illum l-UE kisbet ir-reċiproċità tal-viża mal-pajjiżi kollha mhux tal-UE eżentati mill-viża, ħlief l-Istati Uniti. Iċ-ċittadini tal-Bulgarija, Ċipru u r-Rumanija għad għandhom bżonn viża biex iżuru l-Istati Uniti.

* Dan l-isem huwa mingħajr preġudizzju għall-pożizzjonijiet dwar l-istatus, u huwa konformi mal-UNSCR 1244/1999 u l-Opinjoni tal-QIĠ dwar id-dikjarazzjoni tal-indipendenza tal-Kosovo.

Proċedura simplifikata tal-viża

L-UE għandha fis-seħħ ftehimiet għall-faċilitazzjoni tal-viża ma' xi pajjiżi li mhumiex fl-UE. Skont din is-sistema simplifikata tal-viża, ċittadini mhux tal-UE jgawdu minn proċeduri ffaċilitati biex jidħlu fiż-żona Schengen għal 90 jum fi kwalunkwe perjodu ta' 180 jum.

Proċeduri ffaċilitati għall-ħruġ ta' viżi jinkludu:

• simplifikazzjoni tad-dokumenti ta' sostenn meħtieġa
• tariffa mnaqqsa jew ebda tariffa għal ċerti kategoriji ta' applikanti
• ħinijiet ta' pproċessar aktar mgħaġġla għall-applikazzjonijiet għal viża
• dispożizzjonijiet dwar il-ħruġ ta' viżi għal dħul multiplu b'validità estiża

Sospensjoni tal-ftehimiet dwar il-viża

L-UE tista' tissospendi l-ftehimiet dwar l-eżenzjoni mill-viża jew il-faċilitazzjoni tal-viża meta pajjiż ma jibqax jissodisfa l-kundizzjonijiet tal-ftehim. Imbagħad japplikaw ir-regoli ġenerali tal-kodiċi tal-UE dwar il-viżi.

Is-sospensjonijiet jistgħu jiġu skattati minn stat membru tal-UE jew mill-Kummissjoni Ewropea.

Bħalissa tliet ftehimiet huma sospiżi parzjalment jew kompletament:

• Russja
• Belarussja
• Vanuatu

Aktar informazzjoni

• Politika tal-UE dwar il-viża (informazzjoni ġenerali)
• Spjegazzjoni dwar iż-żona Schengen (informazzjoni ġenerali)
• Il-viża ta' Schengen (infografika)