Gwardja Ewropea tal-Fruntiera u tal-Kosta: il-Kunsill jadotta regolament rivedut

Illum il-Kunsill adotta regolament ġdid dwar il-Gwardja Ewropea tal-Fruntiera u tal-Kosta, element importanti tal-approċċ komprensiv tal-UE għall-migrazzjoni u l-ġestjoni tal-fruntieri.

L-Aġenzija Ewropea għall-Gwardja tal-Fruntiera u tal-Kosta (Frontex) qed tiġi msaħħa f'dak li jirrigwarda l-persunal u tagħmir tekniku. Qed tingħata wkoll mandat usa' biex tappoġġa l-attivitajiet tal-istati membri, speċjalment fir-rigward tal-kontroll tal-fruntieri, ir-ritorn u l-kooperazzjoni ma' pajjiżi terzi. Ir-regolament il-ġdid ser jinkorpora s-Sistema Ewropea ta' Sorveljanza tal-Fruntieri (EUROSUR) fil-qafas tal-Gwardja Ewropea tal-Fruntiera u tal-Kosta, biex jittejjeb il-funzjonament tagħha.

Ġestjoni tal-fruntieri esterni li tiffunzjona tajjeb hija essenzjali għaż-żamma ta' żona Schengen li tiffunzjona bis-sħiħ u ġestjoni effiċjenti u umana tal-migrazzjoni. Dawn ir-regoli l-ġodda ser jippermettu lill-Frontex taqdi rwol akbar fl-appoġġ lill-istati membri fir-rigward tal-kontroll tal-fruntieri, ir-ritorn u l-kooperazzjoni ma' pajjiżi terzi. Maria Ohisalo, Ministru għall-Intern tal-Finlandja

Korp permanenti ta' gwardji tal-fruntiera u tal-kosta u esperti fir-ritorn

Biex tiġi żgurata ġestjoni koerenti tal-fruntieri esterni tal-UE u biex tkun tista' tirrispondi għal kriżijiet, il-Frontex ser ikollha korp permanenti għad-dispożizzjoni tagħha. Dan il-korp, li għandu jiġi stabbilit gradwalment, ser jikkonsisti minn mhux aktar minn 10 000 membru tal-persunal operazzjonali sal-2027. Ser ikun jinkludi membri tal-persunal operazzjonali tal-Frontex, kif ukoll mill-istati membri ssekondati għal perjodu twil jew inkella stazzjonati għal żmien qasir, u riżerva għal reazzjoni rapida li ser tinżamm sa tmiem l-2024.

Ritorn

Ir-regoli proposti ser jippermettu lill-Frontex tipprovdi appoġġ tekniku u operazzjonali lill-istati membri fl-operazzjonijiet ta' ritorn. L-aġenzija ser tipprovdi appoġġ fuq talba tal-istat membru kkonċernat jew fuq l-inizjattiva tagħha stess u bi qbil mal-istat membru kkonċernat. Dan l-appoġġ ser ikopri l-oqsma kollha tar-ritorn, mill-attivitajiet preparatorji sal-attivitajiet tar-ritorn, ta' wara r-ritorn u ta' wara l-wasla.

Kooperazzjoni ma' pajjiżi terzi

Ir-regoli proposti ser jikkontribwixxu biex tissaħħaħ il-kooperazzjoni ma' pajjiżi terzi, billi jagħtu lill-aġenzija kamp ta' azzjoni usa' u ma jillimitawx il-possibbiltajiet għal operazzjonijiet konġunti ma' pajjiżi ġirien.

• Regolament dwar il-Gwardja Ewropea tal-Fruntiera u tal-Kosta
• Gwardja Ewropea tal-Fruntiera u tal-Kosta: il‑Kunsill jikkonferma qbil dwar mandat aktar b'saħħtu (stqarrija għall‑istampa, 1 ta' April 2019)
• Tisħiħ tal-fruntieri esterni tal-UE (informazzjoni ġenerali)