Kunsill Affarijiet Ekonomiċi u Finanzjarji, 08/11/2019, 8 ta' Novembru 2019

Riżultati ewlenin

Finanzjament għall-klima

Il-Kunsill adotta konklużjonijiet dwar il-finanzjament għall-klima qabel il-COP25, il-konferenza tan-NU dwar it-tibdil fil-klima, li ser issir f'Madrid mit-2 sat-13 ta' Diċembru 2019.

L-UE, għal darba oħra, qed turi s-serjetà tagħha rigward l-impenn tagħha biex jiġu indirizzati l-isfidi li joħloq it-tibdil fil-klima. Mill-2013 'l hawn, il-kontribuzzjonijiet finanzjarji żdiedu b'aktar mid-doppju biex il-pajjiżi li qed jiżviluppaw jiġu megħjuna jnaqqsu l-emissjonijiet ta' gassijiet serra u jindirizzaw l-impatt tat-tibdil fil-klima. Mika Lintilä, ministru għall-finanzi tal-Finlandja

L-UE u l-istati membri tagħha jibqgħu l-akbar kontributuri ta' finanzjament pubbliku għall-klima. Il-kontribuzzjonijiet totali tagħhom ammontaw għal €21.7 biljun fl-2018, minn €20.4 biljun fl-2017.

• Finanzjament għall-klima: Fl-2018, il-kontribuzzjonijiet tal-UE u tal-istati membri żdiedu għal €21.7 biljun (stqarrija għall-istampa, 8 ta' Novembru 2019)

Tassazzjoni

Tassazzjoni diġitali

Il-ministri ħadu kont tas-sitwazzjoni attwali tal-ħidma waqt il-Presidenza Finlandiża dwar id-diskussjonijiet li għaddejjin tal-OECD rigward l-isfidi tat-tassazzjoni li jirriżultaw mid-diġitalizzazzjoni tal-ekonomija, u kellhom skambju ta' fehmiet dwar it-triq 'il quddiem f'dan il-qasam fix-xhur li ġejjin.

Id-diskussjonijiet urew appoġġ għat-triq 'il quddiem proposta mill-Presidenza u l-ħidma ser tkompli fuq dik il-bażi fil-korpi preparatorji tal-Kunsill. Il-ministri enfasizzaw ukoll il-ħtieġa li jiġi żgurat li s-soluzzjonijiet varji fil-livell internazzjonali jkunu kompatibbli mal-liġi tal-UE u li l-impatt tagħhom ikun analizzat bir-reqqa.

L-iżvilupp tal-OECD li għaddej jikkonsisti minn żewġ linji ta' ħidma:

• il-Pilastru 1 jeżamina r-regoli rigward ir-riallokazzjoni tal-profitti ta' negozji diġitalizzati billi jiddetermina regoli ġodda dwar fejn għandha titħallas it-taxxa u liema porzjon tal-profitti għandu jiġi intaxxat f'ġurisdizzjoni partikolari.
• il-Pilastru 2 jesplora t-tfassil ta' sistema biex jiġi żgurat li kumpanniji li joperaw fuq livell internazzjonali jħallsu livell minimu ta' taxxa bil-għan li tiġi protetta l-bażi għat-taxxa mill-erożjoni tal-bażi u t-trasferiment tal-profitt.

Il-ħidma fl-OECD intensifikat matul l-aħħar xhur u l-għan tal-OECD huwa li jkun hemm qbil politiku dwar l-arkitettura globali tar-riformi sa Jannar 2020 u rapport finali sa tmiem l-2020.

• Nota tal-Presidenza dwar is-sitwazzjoni attwali dwar it-tassazzjoni diġitali (28 ta' Ottubru 2019)
• Tassazzjoni diġitali (informazzjoni ġenerali)

Regoli tal-VAT

Illum, il-Kunsill laħaq qbil dwar żewġ riformi tar-regoli eżistenti tal-VAT.

L-ewwel riforma tikkonċerna d-detezzjoni ta' frodi fiskali fi transazzjonijiet transfruntieri ta' kummerċ elettroniku. Ir-regoli l-ġodda ser jippermettu lill-istati membri jiġbru, b'mod armonizzat, ir-rekords li l-fornituri ta' servizzi ta' pagament, bħall-banek, iqiegħdu għad-dispożizzjoni b'mod elettroniku. Barra minn hekk, ser tiġi stabbilita sistema elettronika ċentrali ġdida għall-ħżin tal-informazzjoni dwar il-ħlas u għall-ipproċessar ulterjuri ta' din l-informazzjoni minn uffiċjali nazzjonali kontra l-frodi.

• Kummerċ elettroniku: Il-Kunsill laħaq qbil proviżorju dwar regoli ġodda għall-iskambju tad-data dwar pagamenti tal-VAT (stqarrija għall-istampa, 8 ta' Novembru 2019)

It-tieni riforma tikkonċerna r-regoli tal-VAT applikabbli għal negozji żgħar. Ir-regoli l-ġodda ser inaqqsu l-piż amministrattiv u l-ispejjeż ta' konformità għall-impriżi ż-żgħar u jgħinu biex jinħoloq ambjent fiskali li ser jgħin lill-SMEs jikbru u jagħmlu kummerċ transfruntier.

• VAT: Il-Kunsill jilħaq qbil proviżorju dwar regoli simplifikati għan-negozji ż-żgħar (stqarrija għall-istampa, 8 ta' Novembru 2019)

Dazji tas-sisa

Il-Kunsill laħaq qbil proviżorju dwar miżuri li jtejbu l-ambjent tan-negozju għall-kummerċ f'merkanzija soġġetta għad-dazju tas-sisa, permezz ta' titjib ulterjuri tal-kondizzjonijiet għall-kompetizzjoni ġusta u tnaqqis tal-piż amministrattiv għall-kumpanniji.

Il-Kunsill qabel dwar il-proposti li ġejjin:

• id-direttiva dwar arranġamenti ġenerali għad-dazju tas-sisa
• ir-regolament dwar kooperazzjoni amministrattiva dwar il-kontenut ta' reġistri elettroniċi

Id-dazji tas-sisa huma taxxi indiretti fuq il-bejgħ jew l-użu ta' prodotti speċifiċi, bħat-tabakk jew l-enerġija. Id-dħul minn dawn it-taxxi jmur kollu għand il-pajjiż fejn jitħallsu. Mill-1992, il-pajjiżi tal-UE kellhom fis-seħħ regoli komuni biex jiġi żgurat li d-dazji tas-sisa jiġu applikati bl-istess mod u għall-istess prodotti kullimkien fl-UE

• Dazju tas-sisa: Il-Kunsill jaqbel dwar qafas modernizzat għal merkanzija soġġetta għas-sisa (stqarrija għall-istampa, 8 ta' Novembru 2019)

Barra minn hekk, il-Kunsill laħaq approċċ ġenerali, mingħajr diskussjoni, dwar eżenzjoni mill-VAT u d-dazju tas-sisa rigward l-isforz tad-difiża fi ħdan il-qafas tal-UE.

• Test tal-approċċ ġenerali tal-Kunsill dwar id-dazju tas-sisa għad-difiża (24 ta' Ottubru 2019)

Il-ministri ddiskutew ukoll riforma tal-istrutturi tad-dazji tas-sisa fuq l-alkoħol u x-xorb alkoħoliku. Filwaqt li nkiseb progress sinifikanti fin-negozjati, il-ministri ma laħqux qbil dwar dan it-test. Il-Kunsill ser ikompli jaħdem fuq livell tekniku bil-ħsieb li jilħaq kompromess aċċettabbli għall-istati membri kollha f'Diċembru.

• Dazju tas-sisa: Il-Kunsill jaqbel dwar qafas modernizzat għal merkanzija soġġetta għas-sisa (stqarrija għall-istampa, 8 ta' Novembru 2019)

Nomina ta' membru ġdid tal-bord eżekuttiv tal-BĊE

Il-Kunsill ħareġ rakkomandazzjoni lill-Kunsill Ewropew dwar in-nomina ta' Isabel Schnabel, li bħalissa hija professur fl-Univeristà ta' Bonn u membru tal-Kunsill Ġermaniż tal-Esperti Ekonomiċi, bħala l-kandidat tiegħu biex tieħu post lil Sabine Lautenschläger fuq il-bord eżekuttiv tal-Bank Ċentrali Ewropew.

Il-Kunsill Ewropew mistenni jieħu deċiżjoni formali dwar il-ħatra sal-aħħar tas-sena, wara li jkun ikkonsulta mal-Parlament Ewropew u l-Kunsill Governattiv tal-BĊE.

• Bord eżekuttiv tal-BĊE: Il-Grupp tal-Euro jagħti appoġġ għall-kandidatura ta' Isabel Schnabel (stqarrija għall-istampa tal-Grupp tal-euro, 7 ta' Novembru 2019)
• Ħatra tal-bord eżekuttiv tal-BĊE - infografika tal-Kunsill

Stablecoins

Il-Presidenza infurmat lill-ministri dwar abbozz ta' dikjarazzjoni konġunta tal-Kunsill u l-Kummissjoni dwar stablecoins li għandu jintlaħaq qbil dwarha fl-Ecofin ta' Diċembru.

• Abbozz ta' dikjarazzjoni konġunta mill-Kunsill u l-Kummissjoni dwar stablecoins (6 ta' Novembru 2019)

  Din ir-riżorsa bħalissa hi disponibbli biss bil-lingwa jew il-lingwi li ġejjin:

  EN

Dibattitu konġunt mal-ministri għall-edukazzjoni dwar l-edukazzjoni u t-taħriġ

Abbażi ta' dokument ta' diskussjoni tal-Presidenza, il-ministri għall-finanzi u l-edukazzjoni kellhom dibattitu pubbliku dwar is-suġġett li ġej: 'Bażi ekonomika b'saħħitha għall-Ewropa: il-kisba tal-effettività, l-effiċjenza u l-kwalità tal-edukazzjoni u t-taħriġ'. Din kienet l-ewwel opportunità għall-ministri għall-finanzi u l-edukazzjoni biex jiskambjaw fehmiet dwar l-importanza tal-kapital uman bħala l-pedament tal-benessri tal-Ewropa. Id-diskussjoni enfasizzat l-ambizzjoni tal-Kunsill Ewropew biex iżid l-investiment fil-ħiliet u l-edukazzjoni tan-nies.

• Dokument ta' diskussjoni tal-Presidenza "Bażi ekonomika b'saħħitha għall-Ewropa" (25 ta' Ottubru 2019)

Għal aktar informazzjoni, ara l-paġna tal-laqgħa tal-Kunsill Edukazzjoni.

• Kunsill Edukazzjoni, Żgħażagħ, Kultura u Sport (Edukazzjoni), 8 ta' Novembru 2019

Barra minn hekk, il-ministri adottaw konklużjonijiet dwar l-istatistika tal-UE, ingħataw preżentazzjoni mill-Bord Fiskali Ewropew dwar ir-rapporti annwali tiegħu tal-2019 u ġew infurmati dwar il-laqgħat internazzjonali reċenti (il-laqgħa finanzjarja tal-G20 tas-17-18 ta' Ottubru u l-laqgħat annwali tal-FMI tal-14-20 ta' Ottubru f'Washington DC).