Libja: L-UE tneħħi s-sanzjonijiet fuq persuna waħda

Illum il-Kunsill iddeċieda li ma jżommx lil Khalifa Ghwell, eks prim ministru u ministru għad-difiża tal-Kungress Nazzjonali Ġenerali tal-Libja mhux rikonoxxut internazzjonalment, fuq il-lista ta' individwi u entitajiet soġġetti għal miżuri restrittivi tal-UE fid-dawl tar-rwol tagħhom f'atti li jheddu l-paċi, l-istabbiltà u s-sigurtà tal-Libja, jew li jostakolaw jew jimminaw it-tlestija b'suċċess tat-tranżizzjoni politika tagħha.

Khalifa Ghwell ilu soġġett għal miżuri restrittivi tal-UE – projbizzjoni fuq l-ivvjaġġar u ffriżar tal-assi – mill-2016, u l-elenkar attwali tiegħu jiskadi fit-2 ta' April.

Il-miżuri restrittivi tal-UE huma maħsuba biex iġibu bidla fil-politika jew l-attività minn entitajiet u individwi responsabbli għal imġiba malinja, u huma ta' natura proporzjonata, immirata, u mhux punittiva. It-tneħħija mil-lista hija xierqa kull meta l-kriterji għall-elenkar ma jibqgħux jiġu ssodisfati.

Fil-futur, l-UE tkompli tappella lill-komunità internazzjonali u lill-atturi rilevanti kollha fil-Libja biex jikkonformaw mar-Riżoluzzjonijiet kollha tal-Kunsill tas-Sigurtà tan-NU u f'dan ir-rigward, tfakkar fl-istrument tagħha ta' sanzjonijiet kontra dawk li possibbilment jistgħu jkunu ta' xkiel.

• Dikjarazzjoni mir-Rappreżentant Għoli f'isem l-Unjoni Ewropea dwar l-approvazzjoni tal-Gvern il-ġdid ta' Unità Nazzjonali (11 ta' Marzu 2021)
• Libja: L-UE tneħħi lil Agila Saleh u lil Nuri Abu Sahmain mil-lista tas-sanzjonijiet (stqarrija għall-istampa, 2 ta' Ottubru 2020)