Finanzi sostenibbli: il-Kunsill jaqbel dwar il-pożizzjoni tiegħu rigward il-Bonds Ekoloġiċi Ewropej

L-UE qed tieħu aktar passi biex timplimenta l-istrateġija tagħha dwar il-finanzjament tat-tkabbir sostenibbli u t-tranżizzjoni lejn ekonomija newtrali għall-klima u effiċjenti fl-użu tar-riżorsi.

Ir-rappreżentanti permanenti tal-UE approvaw il-pożizzjoni tal-Kunsill dwar proposta biex jinħolqu Bonds Ekoloġiċi Ewropej. Dan ir-regolament jistabbilixxi rekwiżiti uniformi għall-emittenti tal-bonds li jixtiequ jużaw l-isem "Bond Ekoloġiku Ewropew" jew "EuGB" għall-bonds ambjentalment sostenibbli tagħhom magħmula disponibbli għall-investituri fl-Unjoni, u jistabbilixxi sistema ta' reġistrazzjoni u qafas superviżorju għar-rieżaminaturi esterni tal-bonds ekoloġiċi Ewropej.

Il-bonds ambjentalment sostenibbli huma wieħed mill-istrumenti ewlenin għall-finanzjament ta' investimenti relatati ma' teknoloġiji ekoloġiċi, l-effiċjenza fl-użu tal-enerġija u tar-riżorsi kif ukoll l-infrastruttura tat-trasport u l-infrastruttura tar-riċerka sostenibbli.

Issa li l-Kunsill qabel dwar il-pożizzjoni tiegħu rigward il-proposta, jinsab lest li jibda n-negozjati mal-Parlament Ewropew sabiex jintlaħaq qbil dwar verżjoni finali tat-test.

• Regolament dwar il-Bonds Ekoloġiċi Ewropej - mandat għal negozjati mal-Parlament Ewropew
• Finanzjament tat-tranżizzjoni klimatika (informazzjoni ġenerali)