L-UE tintroduċi regoli ġodda dwar it-trasparenza u l-immirar tar-reklamar politiku

Illum il-Kunsill adotta regolament ġdid dwar it-trasparenza u l-immirar tar-reklamar politiku, bl-għan li jiġġieled kontra l-manipulazzjoni tal-informazzjoni u interferenza minn barranin fl-elezzjonijiet.

Ir-regolament ser jagħmilha faċli għaċ-ċittadini biex jagħrfu r-reklami politiċi, jifhmu min jinsab warajhom u jkunu jafu jekk irċevewx reklam immirat, sabiex ikunu f'pożizzjoni aħjar biex jagħmlu għażliet infurmati. Ser jiżgura wkoll li r-reklamar politiku jsir b'rispett sħiħ tad-dritt għall-privatezza u li l-libertà tal-opinjoni u l-libertà tal-espressjoni jiġu protetti.

Elementi ewlenin tar-regolament il-ġdid

Ir-regoli l-ġodda jkopru t-trasparenza u l-immirar tar-reklamar politiku fir-rigward ta' elezzjoni, referendum, jew proċess leġiżlattiv fil-livell tal-UE jew fi stat membru. La jaffettwaw il-kontenut tar-reklami politiċi u lanqas aspetti oħra tar-reklamar politiku, bħat-twettiq ta' kampanji politiċi, li jibqgħu soġġetti għar-regoli nazzjonali speċifiċi tal-istati membri.

Il-kontenut taħt ir-responsabbiltà editorjali, kif ukoll il-fehmiet espressi f'kapaċità personali, mhumiex koperti.

Skont ir-regoli:

• Ir-reklami politiċi jridu jkunu disponibbli b'tikketta ta' trasparenza u avviż ta' trasparenza li jista' jiġi rkuprat faċilment. Dawn iridu jidentifikaw b'mod ċar ir-reklami politiċi bħala tali u jipprovdu xi informazzjoni ewlenija dwarhom, inkluż l-isponsor tagħhom, l-elezzjoni jew ir-referendum li magħhom huma marbuta, l-ammonti mħallsa, u kwalunkwe użu ta' tekniki ta' mmirar.
• L-immirar tar-reklamar politiku online ser ikun permess biss taħt kundizzjonijiet stretti. Id-data trid tinġabar mis-suġġett tad-data u tista' tintuża biss wara li s-suġġett tad-data jkun ta kunsens espliċitu u separat għall-użu tagħha għar-reklamar politiku. Kategoriji speċjali ta' data personali, bħal data li tiżvela oriġini razzjali jew etnika jew opinjonijiet politiċi, ma jistgħux jintużaw għat-tfassil ta' profil.
• Sabiex tiġi evitata l-interferenza barranija, ser ikun hemm projbizzjoni fuq il-forniment ta' servizzi ta' reklamar lil sponsors ta' pajjiżi terzi tliet xhur qabel elezzjoni jew referendum.

Il-passi li jmiss

Issa r-regolament ser jiġi ffirmat, ippubblikat fil-Ġurnal uffiċjali tal-UE u jidħol fis-seħħ 20 jum wara. Il-biċċa l-kbira tad-dispożizzjonijiet tiegħu ser jibdew japplikaw 18-il xahar wara d-dħul fis-seħħ tar-regolament, jiġifieri fil-ħarifa tal-2025.

• Regolament dwar it-trasparenza u l-immirar tar-reklamar politiku
• Riżultat tal-vot
• Trasparenza u mmirar tar-reklamar politiku: Il-koleġiżlaturi tal-UE jilħqu ftehim dwar regolament ġdid (stqarrija għall-istampa, 7 ta' Novembru 2023)