An Cruinniú Mullaigh Euro, 16 Nollaig 2021

Na príomhthorthaí

Tionóladh an Cruinniú Mullaigh Euro i bhformáid chuimsitheach, a raibh 27 gceannaire uile an Aontais i láthair ann, agus é ag díriú ar théarnamh eacnamaíoch agus ar dhul chun cinn maidir leis an Aontas Eacnamaíoch agus Airgeadaíochta a bhaint amach.

I ráiteas ó cheannairí an Aontais, d’admhaigh ceannairí an Aontais gur a bhuí leis an bhfreagairt láidir ghasta chomhordaithe a tháinig ón Aontas agus na Ballstáit ó thaobh an bheartais eacnamaíoch de, tá againn téarnamh láidir as géarchéim COVID-19. Dúirt siad freisin go leanann siad de bheith diongbháilte solúbtha ina bhfreagairt.

• Ráiteas ón gCruinniú Mullaigh Euro, an 16 Nollaig 2021

Ionchas eacnamaíoch

Thug ceannairí an Aontais dá n-aire an litir ó Uachtarán an Ghrúpa Euro dar dáta an 10 Nollaig 2021, agus an ráiteas ón nGrúpa Euro maidir leis na dréachtphleananna buiséadacha do 2022. Chuir siad i bhfios go láidir a thábhachtaí atá sé leanúint de dhlúthchomhordú a dhéanamh ar bheartais fhioscacha an limistéir euro chun téarnamh inbhuanaithe cuimsitheach a bhunú.

• Litir ó Uachtarán an Ghrúpa Euro, Paschal Donohoe, chuig Uachtarán an Chruinnithe Mullaigh Euro, Charles Michel, roimh an gCruinniú Mullaigh Euro, an 10 Nollaig 2021
• Ráiteas ón nGrúpa Euro maidir le 22 dhréachtphlean bhuiséadacha

An t-aontas baincéireachta agus aontas na margaí caipitil

Thug ceannairí an Aontais dá n-aire gur den ríthábhacht an t-aontas baincéireachta a chomhlánú agus go mbeadh aontas na margaí caipitil domhain, comhtháite, dea-fheidhmiúil más uainn a chinntiú go mbeidh againn córas cobhsaí airgeadais, más uainn tacú le hiomaíochas an Aontais, agus más uainn an maoiniú is gá don aistriú glas agus don aistriú digiteach a chur ar fáil dóibh.

Ós amhlaidh atá, is fada le ceannairí an Aontais go dtiocfaidh i bhfeidhm an comhaontú lena leasaítear an Conradh lena mbunaítear an Sásra Cobhsaíochta Eorpach agus go dtabharfar isteach an cúlstop don Chiste Réitigh Aonair a luaithe is féidir.

Agus an tiomantas polaitiúil don aontas baincéireachta á dhearbhú acu an athuair, d'iarr ceannairí an Aontais ar an nGrúpa Euro, i bhformáid chuimsitheach, teacht ar chomhaontú maidir le plean oibre céim ar chéim faoi cheangal ama ina léireofar mar a thabharfar i gcrích é.

D’iarr ceannairí an Aontais freisin go gcuirfí dlús le doimhniú aontas na margaí caipitil.

• An t-aontas baincéireachta (eolas cúlra)
• Aontas na margaí caipitil (eolas cúlra)