Míniú ar aontas na margaí caipitil

An fáth a bhfuil sé ríthábhachtach margaí caipitil na hEorpa a dhoimhniú

Tá margaí caipitil atá oscailte, dea-fheidhmiúil agus comhtháite ríthábhachtach don Aontas chun a mhargadh aonair a fhorbairt a thuilleadh agus chun infheistíochtaí a mhealladh. Cuireann siad fás agus nuálaíocht chun cinn, cruthaíonn siad poist agus feabhsaíonn siad iomaíochas.

Le blianta beaga anuas, tá feabhas suntasach curtha ag an Aontas ar fheidhmiú a chuid margaí caipitil trí aontas na margaí caipitil a fhorbairt, tionscnamh chun fíormhargadh aonair le haghaidh caipitil a chruthú ar fud an Aontais.

D’ainneoin an dul chun cinn suntasach i bhfás mhargaí caipitil an Aontais le blianta beaga anuas, arb ionann é agus beagnach 50% de OTI ó bhí 2014 ann, tá bearna shuntasach fós ann i bhforbairt na margaí sin.

• Pacáiste 2021 maidir le haontas na margaí caipitil
• Pacáiste 2022 maidir le haontas na margaí caipitil
• An straitéis infheistíochta miondíola

Dá bhrí sin, ní mór don Aontas feabhas a chur ar a chuid iarrachtaí chun a mhargaí caipitil a fhorbairt tuilleadh.

Dhéanfadh margaí caipitil Eorpacha níos forbartha agus níos comhtháite an méid seo a leanas:

• deis a thabhairt do chuideachtaí, go háirithe FBManna, a bhfoinsí cistiúcháin a éagsúlú
• infheistiú trasteorann a éascú agus níos mó infheistíochta eachtraí a mhealladh chuig an Aontas
• córas airgeadais an Aontais a dhéanamh níos cobhsaí, níos athléimní agus níos iomaíche
• roghanna do choigilteoirí a mhéadú agus costais mhaoiniúcháin do ghnólachtaí a laghdú
• ról an euro mar airgeadra infheistíochta idirnáisiúnta a neartú
• tacú le hinfheistíocht sa nuálaíocht agus rannchuidiú leis an aistriú glas agus leis an aistriú digiteach

Chomh maith le haontas baincéireachta a fheidhmíonn go maith, rannchuideodh margaí caipitil doimhne agus leachtacha le hathléimneacht fhoriomlán an aontais eacnamaíoch agus airgeadaíochta (AEA).

Bonneagar mhargaí airgeadais an Aontais

Tá comhtháthú mhargaí caipitil na hEorpa measartha beag i gcónaí. Cuireann earnáil baincéireachta láidir dea-rialáilte an Aontais cuid mhór de na riachtanais mhaoinithe ar fáil do ghnólachtaí san Eoraip. Agus arís, is bainc agus cuideachtaí árachais den chuid is mó a chuireann deiseanna coigilte agus infheistíochta ar fáil do shaoránaigh.

Bonneagar mhargadh airgeadais an Aontais / an limistéar euro

Tá margaí caipitil na hEorpa fós ilroinnte ar bhonn náisiúnta, agus a gcomhtháthú airgeadais ag titim chun deiridh ar na leibhéil a bhí ann roimh an ngéarchéim airgeadais dhomhanda. Mar aon le méid réasúnta beag na margaí caipitil sin, cuireann an ilroinnt sin bac ar chomhroinnt riosca trasteorann. Laghdaíonn sé sin athléimneacht an Aontais i leith suaití.

Rochtain ar chaipiteal a scaoileadh do ghnólachtaí

Ní mór don Aontas a chinntiú go mbeidh na deiseanna maoinithe a theastaíonn uathu ag cuideachtaí Eorpacha.

Go háirithe le linn na céime nuathionscanta agus chéim an mhéadaithe, bhainfeadh cuideachtaí tairbhe as margaí Eorpacha doimhne dea-fheidhmiúla le haghaidh caipiteal riosca. Sa lá atá inniu ann, is í an infheistíocht coigríche croílár na mbabhtaí cistiúcháin don mhéadú. Is minic nach mbíonn dóthain caipitil ag gnólachtaí dinimiciúla agus nuálacha an Aontais chun dul san iomaíocht ar bhonn domhanda, agus bíonn orthu cistiú a lorg thar lear nó athlonnú thar lear. Is minice a fhaigheann gnólachtaí de chuid na Stát Aontaithe gnólachtaí nuathionscanta teicneolaíochta de chuid na hEorpa, mar shampla, ná a mhalairt. Tá níos lú rochtana ar infheistíochtaí caipitil fiontair i gcomparáid leis na Stáit Aontaithe, áit a raibh infheistíochtaí caipitil fiontair 10 n-uaire níos airde ná mar a bhí san Aontas in 2022.

Léirítear i dtaighde CAI go mbíonn difríochtaí sna costais chistiúcháin do ghnólachtaí i dtíortha éagsúla mar thoradh ar ilroinnt mhargaí caipitil na hEorpa.

Mar gheall ar thearcfhorbairt mhargaí caipitil an Aontais faoi láthair, níl gnólachtaí in ann tairbhe iomlán a bhaint as an gcistiú agus an infheistíocht a d’fhéadfadh margaí dea-chomhtháthaithe caipitil na hEorpa a chur ar fáil.

Bíonn tionchar aige sin ar a tharraingtí atá an tAontas mar shuíomh infheistíochta, ar chinntí gnólachtaí uas-scálú agus a bheith liostaithe san Aontas.

Litearthacht airgeadais a fheabhsú ar fud an Aontais

Ní mór do shaoránaigh an Aontais an t-eolas agus na scileanna is gá a bheith acu chun cinntí airgeadais a dhéanamh, bíodh sé maidir le cinneadh a dhéanamh cuntas bainc a oscailt, iasacht a fháil nó infheistíochtaí a dhéanamh. Ba cheart go mbeadh gach duine in ann tuiscint a fháil ar na rioscaí a bhaineann le hairgead a fháil ar iasacht nó a infheistiú.

Tá na leibhéil litearthachta airgeadais san Aontas fós íseal, áfach. De réir shuirbhé Eorabharaiméadair maidir le litearthacht airgeadais a foilsíodh in 2023, níl tuiscint sách maith ag thart ar leath de dhaonra fásta an Aontais ar choincheapa bunúsacha airgeadais.

Léiríonn 64% de shaoránaigh an Aontais meánleibhéal litearthachta airgeadais agus léiríonn 18% de shaoránaigh an Aontais leibhéal íseal litearthachta airgeadais.

D’fhonn cabhrú le muintir na hEorpa roghanna airgeadais níos eolaí a dhéanamh agus iad a spreagadh chun infheistíocht a dhéanamh i margaí airgeadais na hEorpa, d’fhormheas an Chomhairle conclúidí maidir le litearthacht airgeadais an 14 Bealtaine 2024. Is é an aidhm atá ann treoir a thabhairt don Choimisiún agus do na Ballstáit maidir le gníomhaíochtaí chun eolas agus tuiscint na saoránach ar airgeadas a fheabhsú.

• Aontas na margaí caipitil: Conclúidí maidir le litearthacht airgeadais formheasta ag an gComhairle (preaseisiúint, an 14 Bealtaine 2024)

Cé acu de na táirgí airgeadais seo a leanas atá agat faoi láthair nó a bhí agat le 2 bhliain anuas?

Féach freisin

• Amlíne - Cur síos ar aontas na margaí caipitil