An Grúpa Euro, 26/01/2015, 26 Eanáir 2015

Príomhthorthaí

Aontachas na Liotuáine don limistéar euro

Phléigh na hAirí glacadh an euro ag an Liotuáin an 1 Eanáir 2015. Dúirt siad go raibh an t-athrú ó litas go dtí an t-airgeadra aonair rianúil agus rathúil. Tharraing siad aird freisin ar théarnamh suntasach na tíre ón ngéarchéim eacnamaíoch. 

Bhí Rimantas Šadžius, aire airgeadais na Liotuáine, i láthair ag an gcruinniú mar chomhalta iomlán den chéad uair. 

Toghchán sa Ghréig

Phléigh an Grúpa Euro an staid sa Ghréig tar éis an olltoghcháin an 25 Eanáir 2015. Dúirt Uachtarán an Ghrúpa Euro Jeroen Dijsselbloem go raibh an Grúpa Euro réidh chun dul i mbun oibre leis an rialtas nua. 

Tá sé beartaithe ag an nGrúpa Euro staid reatha chlár coigeartaithe eacnamaíocha na Gréige a phlé ag an gcéad chruinniú eile a bheidh aige i mí Feabhra 2015.

Athbhreithniú ar dhréachtphleananna buiséadacha

Ba dhíol sásaimh don Ghrúpa Euro conclúid an Choimisiún Eorpaigh go gcomhlíonann dréachtbhuiséad nuashonraithe na Laitvia ceanglais an Chomhshocraithe Cobhsaíochta agus Fáis.

D'eisigh an Grúpa Euro ráiteas maidir le dréachtphlean buiséadach nuashonraithe na Laitvia do 2015.

Bhí plé déanta ag na hairí freisin maidir leis an bpróiseas leantach i ndáil le dréachtphleananna buiséadacha ar measadh go raibh baol ann nach mbeadh ceanglais an Chomhshocraithe Cobhsaíochta agus Fáis á gcomhlíonadh acu i mí na Nollag 2014. Cuirfidh an Coimisiún a mheasúnú nuashonraithe i láthair faoi dheireadh mhí Feabhra.

Measúnú an Chiste Airgeadaíochta Idirnáisiúnta (CAI) ar an limistéar euro

Chuir an Ciste Airgeadaíochta Idirnáisiúnta a mheasúnú ar an staid eacnamaíoch sa limistéar euro ar fáil do na hairí.

Phléigh an Grúpa Euro freisin an gá atá ann le gníomhaíocht dhaingean ag Ballstáit an limistéir euro chun fás agus fostaíocht a spreagadh agus chun cumas na ngeilleagar acu a fheabhsú.

Bhí plé gairid ag na hairí maidir leis an athbhreithniú ar rialachas sa limistéar euro. Tionóladh an plé mar ullmhúchán don chruinniú neamhfhoirmiúil cheannairí stáit nó rialtais an Aontais Eorpaigh a bheidh ar siúl i mí Feabhra 2015 a bpléifear staid reatha an Aontais Eacnamaíoch agus Airgeadaíochta ann.

• Ráiteas ón nGrúpa Euro maidir le Dréachtphlean Buiséadach nuashonraithe na Laitvia 2015
• Ráiteas ó Jeroen Dijsselbloem ag an bpreasócáid tar éis chruinniú an Ghrúpa Euro den 26 Eanáir 2015
• Griangraif agus fiseáin de chruinniú an Ghrúpa Euro den 26 Eanáir 2015